ރާއްޖޭގައި 6000 އަށްވުރެ ގިނަ މީހުން ކޯވިޑް ވެކްސިން ޖަހައިފި

ރާއްޖޭގައި ކޯވިޑް19 ވެކްސިން ޖެހި މީހުންގެ އަދަދު 6000 އިން މައްޗަށް އަރައިފިއެވެ. އެޗްޕީއޭއިން އާންމުކޮށްފައިވާ ތަފާސްހިސާބުތައް ދައްކާގޮތުން ރާއްޖޭގައި ކޯވިޑް ވެކްސިން ޖެހި މީހުންގެ އަދަދަކީ 6854 އެވެ.

ރާއްޖޭގައި ކޯވިޑް ވެކްސިން ޖަހަން ފަށާފައިވަނީ މިމަހުގެ 1 ވަނަ ދުވަހުއެވެ. އިއްޔެ އެކަނިވެސް ރާއްޖެއިން ޖުމްލަ 2575 މީހުންނަށްވަނީ ކޯވިޑް ވެކްސިން ދީފައެވެ. މިއީ މިހާތަނަށް ރާއްޖޭގައި އެއް ދުވަހަށް، އެންމެ ގިނަ އަދަދަކަށް ވެކްސިން ދިން ދުވަހެވެ. އިއްޔެ މާލެ ސަރަޙައްދުން ވެކްސިން ޖެހީ 2015 މީހުންނެވެ. މާލެ ސަރަޙައްދުން ޖުމްލަ 5588މީހުންވަނީ ވެކްސިން ޖަހާފައެވެ. އިއްޔެ އަތޮޅުތަކުން 560މީހުންނަށް ވެކްސިން ދީފައިވެއެވެ. މިއާއިއެކު އަތޮޅުތަކުން ވެކްސިން ޖެހި މީހުންގެ އަދަދު 1266އަށް އަރައެވެ. އިއްޔެވަނީ މާލެ ސަރަހައްދުގައި ދިރިއުޅޭ 55 އަހަރުން މަތީގެ މީހުންނަށް ވެކްސިން ދޭންވެސް ފަށާފައެވެ.

advertisement

ވެކްސިން ދިނުމުގެ މަސައްކަތް މާލޭގެ 6ސެންޓަރަކާއި، އަތޮޅުތަކުގެ 14 ސެންޓަރެއްގައިވަނީ ފަށާފައެވެ.
ރާއްޖޭގައި ޖަހަމުންދަނީ އޮކްސްފޯޑާ އެސްޓްރާޒެނެކާ ކުންފުނި ގުޅިގެން އުފައްދާފައިވާ ކޮވިޝީލްޑް ވެކްސިންއެވެ. ވެކްސިން ފުރަތަމަ ޖަހަންފެށީ ކޯވިޑް-19އިގެ ކަންކަމުގައި ފްރަންޓްލައިންގައި މަސައްކަތްކުރާ މީހުންގެ ގަޔަށެވެ.
ރާއްޖެއަށް މިހާތަނަށް ގެނެސްފައިވަނީ ކޮވިޝީލްޑް ވެކްސިންގެ 100000 ޑޯޒްއެވެ. ކޮންމެ މީހަކުވެސް ވެކްސިންގެ 2 ޑޯޒް ފުރިހަމަކުރަންޖެހެއެވެ. ރާއްޖެއިންދަނީ މުޅި އާބާދީއަށް ބޭނުންވާ ވެކްސިން ހޯދާ، ވެކްސިން ޖެހޭ ހުރިހާ މީހުންނަށް 6 މަސްތެރޭ ވެކްސިން ދީ ނިންމުމަށް ދަނީ މަސައްކަތް ކުރަމުންނެވެ.