ފަތުރުވެރިންނަށް ޙިދުމަތްދިނުމަށް 624 ތަނެއް ހުޅުވައިފި

ރާއްޖޭގައި ފަތުރުވެރިންނަށް ޙިދުމަތްދޭ 624 ތަނެއް އަލުން ހުޅުވުމުގެ ހުއްދަ ޓޫރިޒަމް މިނިސްޓްރީން ދީފިއެވެ. މީގެތެރޭގައި ރިސޯޓް މެރީނާ، ހޮޓެލް، ސަފާރީ އަދި ގެސްޓްހައުސްތައް ހިމެނެއެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ފަތުރުވެރިކަމަށް 624 ތަނެއް ހުޅުވައި ޙިދުމަތް ދޭން ފަށާފައިވާއިރު، 43656 އެނދު ވަނީ އަލުން ފަތުރުވެރިކަމަށް ނިކުމެފައެވެ.

advertisement

އަލުން ފަތުރުވެރިކަމަށް ނިކުމެފައިވާ ރިސޯޓް އަދި މެރީނާގެ އަދަދު 145 އަށް އަރާފައިވާއިރު، އެނދުގެ އަދަދު ވަނީ 33372 އަށް އަރާފައެވެ. 11 ހޮޓަލްއެއް ހުޅުވާފައިވާއިރު، އެނދުގެ އަދަދު ވަނީ 1458 އަށް އަރާފައެވެ. އަދި 135 ސަފާރީއާއިއެކު ސަފާރީތަކުގައި ފަތުރުވެރިނަށް ޙިދުމަތްދެމުން އަންނަ އެނދުގެ އަދަދު ވަނީ 2610 އަށް އަރާފައިކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައެވެ.

މިނިސްޓްރީގެ ތަފާސް ހިސާބުތައް ދައްކާގޮތުން މިހާތަނަށް މުޅި ރާއްޖެ ހިމެނޭގޮތުން ޖުމްލަ 333 ގެސްޓްހައުސްއެއް ވަނީ އަލުން ހުޅުވާފައެވެ. މިއާއިއެކު ގެސްޓްހައުސްތަކުން ފަތުރުވެރިންނަށް ޙިދުމަތްދޭ އެނދުގެ އަދަދަކީ 6216 އެވެ.

މިއަހަރުގެ މިހާތަނަށް ރާއްޖެއަށް 105،371 ފަތުރުވެރިން ވަނީ އައިސްފައެވެ. އަދި މިއަހަރު ރާއްޖެއަށް 1.5 މިލިއަން ފަތުރުވެރިން ގެނައުމަށް ޓޫރިޒަމް މިނިސްޓްރީން ވަނީ އަމާޒުހިފާފައެވެ.