ރާއްޖެއިން އަބޫދާބީއަށް ދާނަމަ މިހާރު ކަރަންޓީންވާން ޖެހޭނެ

ރާއްޖެއިން އަބޫދާބީއަށް ދާނަމަ ކަރަންޓީނުވާންޖެހޭގޮތައް ހަދައިފިއެވެ. ރާއްޖެއިން އަބޫދާބީއަށް ދާއިރު ކަރަންޓީނުވާންޖެހޭގޮތައް ހަދާފައިމިވަނީ އެޤައުމަށް އެތެރެވާއިރު، ކަރަންޓީންގެ މުއްދަތު ފުރިހަމަ ކުރަން ނުޖެހޭ ޤައުމުތަކުގެ ލިސްޓުން ރާއްޖެ އުނިކޮށްފައިވާތީއެވެ.

އަބޫދާބީއަށް ދާއިރު ކަރަންޓީނުވާން ނުޖެހޭ ޤައުމުތަކުގެ ލިސްޓް އެޤައުމުން ކޮންމެ 2 ހަފްތާއަކުން އަންނަނީ އަޕްޓޭޑް ކުރަމުންނެވެ. މި ލިސްޓުން ރާއްޖޭގެ އިތުރުން 7 ޤައުމެއް ވަނީ އުނިކޮށްފައެވެ. އޭގެތެރޭގައި ހިމެނެނީ ބަހްރެއިން، އޮމާން، ޤަތަރު، ތައިލޭންޑް، ފޯކްލޭންޑް އައިލެންޑްސް އަދި ސެއިންޓް ކިޓްސް އެންޑް ނިވީސްއެވެ.

advertisement

އަބޫދާބީއަށް އެތެރެވާއިރު ކަރަންޓީނުވާން ނުޖެހޭ ޤައުމުތަކުގެ ލިސްޓްގައި މިވަގުތު ހިމެނެނީ 12 ޤައުމެކެވެ. ލިސްޓަށް އަލަށް އަރާފައިވާ ޤައުމުތަކުގެ ތެރޭގައި ހިމެނެނީ ބޫޓާންއާއި އައިސްލޭންޑްއެވެ.

އަބޫދާބީއަށް އެތެރެވާއިރު ކަރަންޓީންވާން ނުޖެހޭ ޤައުމުތަކުގެ ލިސްޓަށް އެންމެ ފުރަތަމަ ރާއްޖެ އަރާފައިވަނީ ޖަނަވަރީ މަހުގެ 25 ވަނަ ދުވަހުއެވެ. ރާއްޖެ މި ލިސްޓުން އުނިކޮށްފައިވަނީ ކޯވިޑް19 ގެ ކޭސްތައް ރާއްޖޭގައި އިތުރުވާން ފެށުމާއި ގުޅިގެންނެވެ. މިހާރު ކޮންމެ ދުވަހަކުވެސް ރާއްޖޭގައި ކޯވިޑް ޖެހޭ މީހުންގެ އަދަދުތައް އުޅޭނީ 100 އިން މަތީގައެވެ.

ގްރީން ލިސްޓުގައި ހިމެނޭ ޤައުމުތަކުން އަބޫދާބީއަށް އެތެރެވާ ފަރާތްތަކުން ކަރަންޓީންގެ މުއްދަތެއް ފުރިހަމަ ކުރާކަށް ނުޖެހޭނެއެވެ. ނަމަވެސް އެފަރާތްތަކުން އަބޫދާބީއަށް އެތެރެވުމަށްފަހު އެއަރޕޯޓުން ޕީސީއާރު ޓެސްޓެއް ހަދަން ޖެހެއެވެ.

އަބޫ ދާބީގެ ގްރީން ލިސްޓުގައި ހިމެނޭ ޤައުމުތަކުގެ ތެރޭގައި، އޮސްޓްރޭލިއާ، ޗައިނާ، ސިންގަޕޯރ އަދި މޮރިޝަސް ހިމެނެއެވެ. މިޤައުމުތަކުގައި ކޯވިޑުގެ ހާލަތަށް އަންނަ ބަދަލުތަކަށް ބަލާ މި ލިސްޓަށް އުނި އިތުރުތައް ގެންނަމުންދާނެ ކަމަށް އަބޫދަބީން ހާމަކުރެއެވެ.