އަމިއްލަ ހިޔާލު: ލޯކަލް ޓުއަރިޒަމް މިހާރަށް ވުރެ ބޮޑަށް ރެގިއުލޭޓް ކުރަންޖެހޭ!

ގެނބުމުގެ ހާދިސާތަކުގައި ޓުއަރިސްޓުން މަރުވުމަކީ ރާއްޖޭގައި އާ ކަމެއް ނޫނެވެ. މިފަދަ ކޮންމެ ހާދިސާއެއް ހިނގުމުން އެކަން ބަލާ ކަމަށް ކަމާ ބެހޭ އިދާރާތަކުން ބުނުން ފިޔަވައި ފިޔަވަޅެއް އެޅިކަމެއް އެނގޭކަށް ނެތެވެ. ނަމަވެސް މިއިން ގިނަ ހާދިސާތަކުގައި ގައިމުވެސް ކޮންމެވެސް ބައެއްގެ އިހުމާލެއް އޮންނާނެއެވެ. ޓުއަރިޒަމް ދާއިރާގައި ހުރި މިފަދަ ކަންކަން ރެގިއުލޭޓް ކުރެވެނީ ކިހާ މިންވަރަކަށް ހެއްޔެވެ؟ ހާއްސަކޮށް ލޯކަލް ޓުއަރިޒަމްގެ ދާއިރާގައި މިފަދަ ގިނަ މައްސަލަތަކެއް ހުރިކަން ފާހަގަވެއެވެ.

ފަތުރުވެރިން ގެނބުމުގެ ހިތާމަވެރި ހާދިސާތަކެއް

މީގެ ދެ ހަފުތާއެއްހާ ދުވަސް ކުރިން އއ. ރަސްދޫގައި ޗައިނާގެ ޓުއަރިސްޓަކު ގެނބުނު ހާދިސާއާ ގުޅިގެން އޭނާގެ އަނބިމީހާ ވަނީ އޮންލައިން ނޫސް “މިހާރު” އަށް ދިން އިންޓަވިއުއެއްގައި ގިނަ ޝަކުވާތަކެއް ބަންޑުން ކޮށްލާފައެވެ. ނަމަވެސް އޭނާ ފާހަގަކުރި ގިނަ ކަންކަމަކީ ހަގީގަތުގައި ވެސް ލޯކަލް ޓުއަރިޒަމް އިންޑަސްޓްރީގައި ހުރި ބޮޑެތި މައްސަލަތަކެވެ. ރިސޯޓް ތަކުގައި މީހަކު މަރުވުމުން، އެކަމުގައި ޒިންމާދާރު ކުރުވުމުގައި އަދި މައްސަލަ ހައްލުކުރުމުގައި ދިމާވާ ކަންކަމާއި ބަލާއިރު ލޯކަލް ޓޫރިޒަމްގައި މިފަދަ މައްސަލަތައް ހައްލުކުރުމަށް ތައްޔާރުވެފައިވާ މިންވަރު ކުޑަކަން ފާހަގަވެއެވެ.

advertisement

މީގެ ދެ ހަފްތާއެއްހާ ދުވަސް ކުރިން ކ. މާފުށިން ސްނޯކްލިން އަށް ގޮސް އުޅުނު ޗައިނާގެ ޓުއަރިސްޓަކު ވަނީ މަރުވެފައެވެ. އުމުރުން 38 އަހަރުގެ އެ މީހާ ރާއްޖެއައީ އޭނާގެ ކައިވެންޏަށް ފަހު އަނބިމީހާއާ އެކު ހަނީމޫނަށެވެ. ނަމަވެސް މުޅި ރާއްޖެ އަށް ވައިޓް އެލާޓް ނެރެފައި ވަނިކޮށް މާފުށީ ކައިރީގައި އޮތް ސަރަހައްދަކަށް ސްނޯކްލިން އަށް ގޮސް އުޅުމުގެ ތެރޭގައި ފިރިހެން މީހާ މަރުވީއެވެ.

މާފުށީގެ އެކްސްކާޝަންގެ ހިދުމަތް ދޭ ބަޔަކާ އެކު ސްނޯކްލިން އަށް ދިޔަ އަންހެން މީހާ ބުނެފައިވާ ގޮތުގައި މޫދަށް އެރުމުގެ ކުރިން އެކަށީގެންވާ މައުލޫމާތު ދޯނީގެ މީހުން ދީފައެއް ނުވެއެވެ. ބޭނުންކުރި ސާމާނާތުތައް ހުރީ ބާވެ ހަލާކުވެފައެވެ. ފީނަން ނޭނގޭ އެތައް ބަޔަކު ތިބި އިރު 21 މީހުން ގޮވައިގެން މޫދަށް ފޭބީ ތިން މީހުންނެވެ. މިފަދަ ހާދިސާއެއް ހިނގުމުން އަވަސް ފަރުވާ ނުވަތަ ސީޕީއާރު ދޭން އެނގޭނެ މީހަކު ދޯނީގައި ނެތްކަން ވެސް އޭނާ ފާހަގަކުރިއެވެ. އެފަދަ ވަސީލަތްތައް ވެސް ދޯނީގައި ނެތެވެ. އެ ހާދިސާ ހިނގައިގެން އެމަޖެންސީގައި ފަރުވާ ދޭންޖެހުނު އިރު ދޯނީގައި އެނބުރި ރަށަށް ދެވުނީ ވިއްސަކަށް މިނިޓުންނެވެ. ލޯންޗެއް ގެނެސްގެން ބަލިމީހާ އަވަހަށް ގެންދެވޭނެ އިންތިޒާމެއް ހަމަޖެހިފައެއް ވެސް ނެތެވެ.

ގެސްޓްހައުސް ރެގިއުލޭޓް ކުރެވޭނެ ނިޒާމެއް ބޭނުންވޭ!

ރިސޯޓްތަކާއި ހިލާފަށް ލޯކަލް ޓުއަރިޒަމް އޮތީ ވަރަށް ބޮޑަށް ކައުންސިލްތަކުން ރެގިއުލޭޓުކުރުމަށް ދޫކޮށްލެވިފައެވެ. ރިސޯޓްތަކުގައި ކޮންމެ ކަމަކަށް މުވައްޒަފުން ތިބެއެވެ. ކަންކަން ބަލަހައްޓާނެ ފަރާތްތައް ތިބެއެވެ. އެހެން ނަމަވެސް ލޯކަލް ޓުއަރިޒަމް ހިންގަނީ ރަށު ފެންވަރުގައި ކަމަށްވުމުން ކޮންމެ ކަމެއްގައި ވެސް އިސްކަންދީފައި ހުންނަނީ ހަރަދު ކުޑަ ގޮތަށެވެ. މުވައްޒަފުން ވެސް މަދެވެ. ކައުންސިލް ނަގަންޖެހޭ ހުއްދަތަކާއި ސަލާމަތީ ކަންކަން ދޯދިޔާވެފައި ފަރުވާކުޑައެވެ. މިއީ ހުރިހާ ރަށެއްގެ ނުވަތަ ހިދުމަތްދޭ ފަރާތްތަކުގެ ހާލަތަށް ނުވިޔަސް، މަދުބަޔަކު ކުރާކަމަކުން ލޯކަލް ޓޫރިޒަމަށް ދަނީ ނުހަނު ބޮޑެތި ގެއްލުން ލިބެމުންނެވެ.

ރާއްޖެ މަޝްހޫރުވެފައިވާ މިންވަރުން ޓުއަރިސްޓުން އުންމީދުކުރަނީ ވެސް ރަނގަޅު ފެންވަރެއްގެ ހިދުމަތަކަށެވެ. އެއީ ހަމައެކަނި ރިސޯޓް ޓުއަރިޒަމާއި މެދު މީހުންގެ ތަސައްވުރު އޮތް ގޮތެއް ނޫނެވެ. ލޯކަލް ޓުއަރިޒަމްގައި ވެސް ރާއްޖެ މިހާރު މަޝްހޫރުވެފައި ވުމުން ދޭ ހިދުމަތްތައް ރަނގަޅު ވާންޖެހެއެވެ. އެކަންކަން ކަމާއި ބެހޭ އިދާރާތަކުން ވެސް ބަލަންޖެހެއެވެ. ކޮންމެހެން ޓުއަރިޒަމް މިނިސްޓްރީން ޓީމުތައް ފޮނުވައިގެން މޮނީޓާރ ނުކުރި ނަމަވެސް ރަށު ކައުންސިލްތަކަށް ވެސް އެކަން ކުރެވިދާނެއެވެ.

ލޯކަލް ޓުއަރިޒަމް މިހާރަށް ވުރެ ބޮޑަށް ރެގިއުލޭޓް ކުރާނެ ނިޒާމެއް ގާއިމުކުރެވެން ޖެހެއެވެ. ހަމައެކަނި ހުއްދަ ދިނުމަކުން ނުފުދެއެވެ. ހިދުމަތްތަކުގެ ފެންވަރު ބަލަންޖެހެއެވެ. ސްނޯކްލިން އާއި ފީނުން ފަދަ އެކްސްކާޝަންގެ ހިދުމަތްތައް ދޭ ތަންތަނުގައި ގެންގުޅޭ އާލާތްތައް ބެލޭނެ ނިޒާމެއް ގާއިމުވެފައި އޮންނަންޖެހެއެވެ. އެ ތަކެތީގެ ކޮލިޓީ އާއި އެ ތަކެތި ބާވެ ހަލާކުވެފައިވާ ނަމަ އެކަންކަން ރަނގަޅު ކުރެވޭނެ ގޮތްތަކެއް ހުންނަންޖެހެއެވެ. މޫދަށް އެރޭނެ ވަކި ސަރަހައްދުތައް ކަނޑައެޅިފައި ހުންނަ އިރު ލައިފް ގާޑުން ތިބެންޖެހެއެވެ.

މިވަގުތަށް ބަލާއިރު ލޯކަލް ޓުއަރިޒަމް ފެންނަނީ އަޅާލުމެއް ނެތި ވާނެ އެއްޗެއް ވާން ދޫކޮށްލެވިފައި އޮތް ދާއިރާއެއްގެ ގޮތުގައެވެ. ހިދުމަތުގެ ފެންވަރު ބެލުމެއް ނެތެވެ. ދެ ބިދޭސީން ލައިގެން ހިދުމަތް ދޭ ގެސްޓް ހައުސްތައް އެބަހުއްޓެވެ. މޫސުމަށް ބެލުމެއް ނެތި ވިއްސަކަށް މީހުން ގޮވައިގެން ކެޕްޓަނާއި ދެ ފަޅުވެރިން ދަތުރު އެބަދެއެވެ. ބޭނުންކުރާ ތަކެތި ހަލާކުވެފައި ހުންނަ މައްސަލަ ބޮޑެވެ. އެމަޖެންސީ ހާލަތެއްގައި ފަރުވާ ދޭންޖެހިއްޖެ ނަމަ އެންމެ ކުޑަ މިނުން ފަސްޓް އެއިޑް ކިޓް ގިނަ ގެސްޓްހައުސްތަކުގައި ނެތްއިރު، ފަރުވާދޭން އެނގޭ މީހަކުވެސް ނެތެވެ.

ޗައިނާގެ ޓުއަރިސްޓް މީހާގެ މަރާ ގުޅިގެން އޭނާގެ އަންހެނުން ހުރީ ދޫދޭ ގޮތަކަށް ނޫނެވެ. ހަގީގަތުގައި ވެސް މިއީ ދާއިރާގައި ހުރި ގިނަ މައްސަލަތަކެއް ފެންމަތިވި ހާދިސާއެކެވެ. މިކަންކަން އިސްލާހުކުރަން ކަމާ ބެހޭ އިދާރާތަކުން މިހާރަށް ވުރެ ބޮޑަށް ސަމާލުވާންޖެހެއެވެ. އުސޫލްތަކާއި ގަވާއިދުތައް ހަރުދަނާ ކުރަންޖެހެއެވެ. ރަށު ފެންވަރުގައި ކައުންސިލްތަކުން މިހާރަށް ވުރެ ބޮޑަށް ލޯކަލް ޓުއަރިޒަމް ރެގިއުލޭޓް ކުރެވެންޖެހެއެވެ. އެހެން ނޫން ނަމަ މިފަދަ ހާދިސާތައް ތަކުރާރުވުން އިތުވާނެއެވެ.

ރާއްޖޭގެ ރަށްތަކުގައި ހައްދެއް ނެތި ވެށި ހަލާކުކޮށްލައިގެން ޓޫރިޒަމް ތަރައްޤީ ކުރުމަކީ ރާއްޖޭ ބްރޭންޑަށް ލިބޭނެ ބޮޑު ނިކަމެތި ކަމެކެވެ. ރާއްޖޭގެ ބައެއް ސަރައްހަދުތަކުގައި އުސް އިމާރާތްތައް ހެދިކަމުގައިވިޔަސް، ޓޫރިޒަމަށް ހުރިހާ ރަށެއްގައި ބިޔަ ބޮޑެތި އިމާރާތް ހެދުމާމެދު އިންޑަސްޓްރީގެ ތަޖުރިބާކާރުންގެ ކަންބޮޑުވުން އެބައޮތެވެ. ލޯކަލް ޓޫރިޒަމްގެ ޕްރޮޑަކްޓް ވަކިކުރާގޮތް މިހާރަށްވުރެ ތަފްސީލްކޮށް، ގެސްޓްހައުސް ހެދޭނެ އެންމެ ގިނަ އެނދާއި އުސްމިން ކަނޑައަޅައި، އެނދު ގިނަ އުސް އިމާރަތްތަކަކީ ސިޓީ ހޮޓަލްގެ ގޮތުގައި ކަނޑައެޅުން މުހިންމެވެ. އަދި ބިދޭސީ މުވައްޒަފުންނާއި ނުލާ ހިންގާ އެނދު މަދު ތިރި ކުދި ގެސްޓްހައުސް ނުވަތަ ހޯމްސްޓޭ ހިންގާ ފަރާތްތަކަކީ ކޮމިއުނިޓީ ބޭސްޑް ޓޫރިޒަމްގެ ގޮތުގައި ކަނޑައަޅައި، އެފަރާތްތަކަށް ޓެކްސް އަދި އެހެނިހެން އިނާޔަތްދިނުމަކީ އިންޑަސްޓްރީގެ ކުރިމަގަށް މުހިންމުކަމެކެވެ.

“އަމިއްލަ ހިޔާލު” ކެޓަގަރީގެ ދަށުން ޝާއިއުކުރެވޭ ލިޔުންތަކުގައި ހިމެނެނީ ލިޔުން ކޮންޓްރިބިއުޓް ކުރާ ފަރާތްތަކުގެ ހިޔާލެވެ. މި ލިޔުންތަކަކީ ކޮންމެހެން އެމްވީ ޕްލަސްގެ އެޑިޓޯރިއަލް ދައްކުވައިދޭ ލިޔުންތަކެއް ނޫނެވެ. އެމްވީ ޕްލަސްއަށް ލިޔުމެއް ހުށައަޅަން ބޭނުންނަމަ media@plus.mv އަށް އީމެއިލް ކުރެއްވުން އެދެމެވެ.