މީޑިއާގެ މިނިވަންކަން އޮބި އަޅައިގެން ނުހުއްޓުވޭނެ!

ހިޔާލު ފާޅުކުރުމާއި ނޫސްވެރިކަމުގެ މިނިވަންކަމަކީ ޑިމޮކްރަސީއެއްގެ އެންމެ އަސާސީ ސިފައެވެ. ގާނޫނު އަސާސީން އެކަން ކަށަވަރުކޮށްދީފައި ވަނީ ވެސް އެހެންވެގެންނެވެ. ރާއްޖޭގައި އެ މިނިވަންކަން ހުޅުވިގެން ދިޔައީ ވެސް ޑިމޮކްރަސީ އަށް ކުރި ވަކާލާތުގެ ތެރެއިންނެވެ. އެކަން ހުއްޓުވައި އޮބިއަޅަން ވަރަށް ގިނަ މަންތިރި ހެދިއެވެ. އެހެން ނަމަވެސް މިއަދާ ހަމައަށް ވެސް އެކަން ވަނީ ފެއިލްވެފައެވެ.

ނޫސްވެރިކަމުގެ މިނިވަންކަން ދެން އަތެއް ނުލެވޭނެ

ކުރީގެ ރައީސް މައުމޫން އަބްދުލް ގައްޔޫމްގެ ވެރިކަމުގެ ތެރޭގައި ހިޔާލުފާޅުކުރުމާއި ނޫސްވެރިކަމުގެ މިނިވަންކަން އޮތީ ވަރަށް ބޮޑަށް ހިފެހެއްޓިފައެވެ. އެހެން ނަމަވެސް ޑިމޮކްރަސީ އަށް ކުރި ދަތުރުގައި ބައެއްގެ ބުރަ މަސައްކަތުން އެ މިނިވަންކަން ހޯދީއެވެ. ހާއްސަކޮށް އެ ކަމަށް އެންމެ ބޮޑަށް ވަކާލާތުކުރަމުން އައީ އެމްޑީޕީންނެވެ. އެމްޑީޕީ ނޫން ބަޔަކު ވެރިކަމަށް އަންނަ ކޮންމެ ފަހަރަކު ހިޔާލުފާޅުކުރުމާއި ނޫސްވެރިކަމުގެ މިނިވަންކަން ރޮދިފަށެއްގެ މައްޗަށް ވެއްޓެއެވެ. ކުރީގެ ރައީސް އަބްދުﷲ ޔާމީންގެ ދައުރުގައި އެ މިނިވަންކަމަށް ހުރަސް އެޅުމުގެ ގޮތުން އެތައް ކަމެއް ކުރިއެވެ. މީޑިއާތައް މިލިއަނުން ޖޫރިމަނާ ކުރިއެވެ. އަބުރުގެ ގާނޫނެއް އުފަންކޮށް ރާއްޖެ ޓީވީ ތިން މިލިއަނަށް ވުރެ ގިނަ ރުފިޔާ އިން ޖޫރިމަނާކުރި އިރު ބައެއް އެހެން މީޑިއާތަކާއި ނޫސްވެރިން ވެސް ބޮޑެތި އަދަދުތަކުން ޖޫރިމަނާ ކުރިއެވެ. ނަމަވެސް އެ ހުރިހާ ފިޔަވަޅުތަކާ އެކު ވެސް ނޫސްވެރިން ނުހިފެހެއްޓުނެވެ.

advertisement

ރައީސް ޔާމީންގެ ވެރިކަމަށް ފަހު ދެން އަނެއްކާ ވެސް އެމްޑީޕީން ވެރިކަމަށް އައުމުން އަބުރުގެ ގާނޫނު އުވާލައި މީޑިއާގެ މިނިވަންކަން ތަން މިނަށް ހުޅުވައިދިނެވެ. ބައެއް މީޑިއާތަކުން މިއިން ޒަމާނެއްގައި ސަރުކާރަށާއި ރައީސަށް ނުކުރާހާ ވަރުގެ އެންޓި ކެމްޕެއިން ކުރިއެވެ. އެހެން ނަމަވެސް ރައީސް އިބްރާހީމް މުހައްމަދު ސޯލިހާއި އެ މަނިކުފާނުގެ ސަރުކާރުން އަދި ޖުމްލަކޮށް އެމްޑީޕީން ދެކުނީ އެއީ ޑިމޮކްރަސީއެއްގައި ނުވެ ނުދާނެ ކަމެއްގެ ގޮތުގައެވެ. ސަރުކާރުގެ ބައެއް ވެރިންނާއި މަޖިލީހުގެ ބައެއް މެންބަރުން އެކަމާ ވަރަށް ހިތްހަމަޖެހިވަޑައި ނުގެން ވާހަކަތައް ދެއްކެވި ނަމަވެސް ސަރުކާރާއި ރައީސް ސޯލިހް ގެންގުޅުއްވީ ހުޅުވިފައިވާ މިނިވަން ނޫސްވެރިކަމަކަށް ޖާގަ ދޭންޖެހޭނެ ކަމުގެ ހަމައެވެ. ސަރުކާރުގެ ކުންފުނިތަކުން ސްޕޮންސަރ ލިބުމުގައި ދަތިތަކެއް ކުރިމަތި ކުރިޔަސް، ނޫސްވެރިން އޮބިއަޅައިގެން ހިފެހެއްޓުމަށް އެއްވެސް މަސައްކަތެއް ނުކުރެޔޭ ބުނުން ދޮގަކަށް ނުވާނެއެވެ.

މީޑިއާ ކޮމިޝަން އުފެއްދުމުގެ ބިލުގައި މީޑިއާއަށް ފިޔަވަޅު އެޅުމުގެ ވާހަކަ!

އަނެއްކާވެސް މީޑިއާގެ މިނިވަންކަން މި ވަނީ ނުރައްކަލުގެ ތެރެއަށް ވެއްޓިފައި ކަމުގެ އަޑުދަނީ ގަދަވަމުންނެވެ. މީޑިއާތަކާއި ދެކޮޅަށް ސީދާ ރައީސް އޮފީހުން އިދާރާތަކަށް ހުށަހަޅާ މައްސަލަތައް އިންތިހާ އަށް އިތުރުވެއްޖެއެވެ. އަމިއްލަ މެންބަރެއްގެ ނަމުގައި މަޖިލީހަށް ވެއްދި މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން އުފެއްދުމުގެ ބިލްގެ މަގުސަދެއް ކަމަށް ބުނެފައި އޮތީ މޯލްޑިވްސް މީޑިއާ ކައުންސިލް (އެމްއެމްސީ) އާއި ބްރޯޑްކާސްޓިން ކޮމިޝަން އެއްކޮށްލުމެވެ. އެއް މަސައްކަތެއް ކުރާ ދެ އިދާރާ ކަމަށް ވުމުން އެ ދެ އިދާރާ އެއްކޮލުމުގެ ވާހަކަ ދައްކާތާ މިހާރު ވިއްސަކަށް އަހަރު ވަނީއެވެ. އެކަމާ މެދު މީޑިއާތައް ނުވަތަ ނޫސްވެރިންގެ މެދުގައި ވެސް މާ ބޮޑު ހިލާފްތަކެއް ނެތެވެ. އެއީ އެއް ފުރާޅެއްގެ ދަށަށް ގެންދަންޖެހޭ ދެ އިދާރާ ކަމަށް ގިނަ ނޫސްވެރިން ގަބޫލުކުރެއެވެ. ހިޔާލު ތަފާތުވުމެއް އޮތް ނަމަ އޮތީ އެކަން ކުރާނެ ގޮތަކާ މެދުގައެވެ.

މީޑިއާ ކޮމިޝަނެއް ނުވަތަ އެ ނޫން ނަމެއްގައި އެހެން ކޮމިޝަނެއް ވެސް ހަދަންވީއެވެ. ނޫސްވެރިން މިއަދު އަޑު އުފުލަނީ އެކަމާ ދެކޮޅަކަށް ނޫނެވެ. ނޫސްވެރިން އަދި މީޑިއާތަކުން އަބަދުވެސް ވަކާލާތުކުރަމުން އަންނަނީ އެ މަސައްކަތުގެ ތެރެއިން މީޑިއާގެ މިނިވަން ކަމަށް ކުޑަ ވެސް މިންވަރެއްގެ ހުރަހެއް އެޅިގެން ނުވާނެ ކަމަށެވެ. މިހާރު މަޖިލީހަށް ހުށަހަޅާފައިވާ ބިލުގެ ސަބަބުން މީޑިއާގެ މިނިވަންކަން ވަރަށް ބޮޑަށް ހަނިވެ އަނެއްކާ ވެސް މީޑިއާތަކާއި ދެކޮޅަށް ފިޔަވަޅު އެޅުމުގެ ވާހަކަތައް އެ ބިލުގައި ހިމެނިފައި އެބަ ހުއްޓެވެ.

ނޫސްވެރިންނަކީ ވެސް އިންސާނުންނަށް ވީތީ ތަފާތު ފިކުރުތަކުގެ މީހުންނެވެ. އެހެން ނަމަވެސް މިފަދަ ކޮންމެ ދަނޑިވަޅެއްގައި ވެސް އެއް އަންބާއެއް ކިޔައެވެ. ނޫސްވެރިކަމުގެ މިނިވަންކަމަށް ހުރަސް އެޅޭ ފަދަ ކަމެއް މެދުވެރިވާ ކޮންމެ ދަނޑިވަޅެއްގައި މި ފިކުރުތައް އެއްފަރާތްކޮށް އެއް ރާގެއްގައި އެއް ލަވައެއް ކިޔާކަން ފާހަގަ ކުރަންޖެހެއެވެ. މީގެ ކުރިން ވެސް މީޑިއާތައް އޮބިއަޅައި ހުއްޓުވަން ސަރުކާރުތަކުން މަސައްކަތްތައް ކުރިއެވެ. ގައުމީ ސަލާމަތަށް ނުރައްކާވާ ކަމަށް ބުނެ ބްރޯޑްކާސްޓިން ކޮމިޝަން މެދުވެރިކޮށް ރާއްޖެ ޓީވީ ބަންދުކުރަން ވެސް ރައީސް ޔާމީންގެ ވެރިކަމުގައި މަސައްކަތްކުރިއެވެ. އެހެން ނަމަވެސް ސަރުކާރުން ހޮވި މެންބަރުންގެ ތެރެއިން ނޫސްވެރިކަމުގެ ކިރިޔާ ވެސް ކަންފުޅެއް ހުރި މެންބަރެއް ނަމަ އެ ކަމަށް ފަސްޖެހުނެވެ. އެކަން ނުވެ އޮތީ ސަރުކާރުން ހޮވި މެންބަރުންގެ ތެރޭގައި ތިބި ކުރީގެ ނޫސްވެރިންނަށް އެ ވަރުގެ ކަމެއް ކުރަން ނުކެރިގެންނެވެ.

އެކި ފިކުރުގައި އެކި ރާގު ކިޔަމުން ދިޔަ ނަމަވެސް މި ފަހަރުގެ ބިލާ އެކު ވެސް ގިނަ ނޫސްވެރިންނާއި މީޑިއާތަކުން ފެންނަނީ އެއްގަލަކަށް އަރާތަނެވެ. ނޫސްވެރިކަމުގެ މިނިވަންކަން ނުރައްކަލުގެ ތެރެއަށް ވެއްޓިދާނެ ފަދަ ކަމެއް މެދުވެރިވުމަކީ އެއްކޮޅު ވިޔަސް ދެކޮޅު ވިޔަސް ނޫސްވެރިން ބޭނުންވާނެ ގޮތެއް ނޫނެވެ. ކޮންމެ ވެރިކަމެއް އޮތަސް އެ ހަމަ ނޫސްވެރިން ގަބޫލުކުރެއެވެ. އަދި މާޒީން ހާމަވެ، ފެންނަން އޮތީ ނޫސްވެރިންނާއި މީޑިއާތައް އޮބިއަޅައިގެން ނުހިފޭއްޓޭނެ ކަމެވެ. އެ ފުރުސަތު ނޫސްވެރިންނާއި މީޑިއާތަކުންނާއި ރައްޔިތުންވެސް ނުދޭނެ ކަމެވެ.