މާލެ ސަރަހައްދުގައި 10 މީހުންނަށްވުރެ ގިނަ މީހުން އެއްވެ އުޅުން މަނާކޮށްފި

މާލެ ސަރަޙައްދުގައި އެއްފަހަރާ 10 މީހުންނަށްވުރެ ގިނަ މީހުން އެއްވެ އުޅުން މަނާކޮށްފިއެވެ. ޑިރެކްޓަރ ޖެނެރަލް އޮފް ޕަބްލިކް ހެލްތު ސޮއިކުރައްވައި ނެރުއްވާފައިވާ އެންގުމުގައިވަނީ މާލޭ ސަރަޙައްދުގައި މަގުމައްޗާއި އާއްމު ތަންތަނަށް އެއްފަހަރާ އެންމެގިނައިން އެއްވެ އުޅެވޭނީ 10މީހުންނަށްކަމަށެވެ. މާލެއާ ހުޅުމާލެ ވިލިމާލެ ގުޅީފަޅު ތިލަފުށި އަދި ހުޅުލޭގައިވެސް ޢަމަލުކުރަމުންދާނީ މި އުސޫލުގެ މަތިންނެވެ.

މި އެންގުމުގައިވަނީ މާލޭ ސަރަޙައްދުގައި މަގުމައްޗާއި އާއްމު ތަންތަނަށް މިޙާލަތުގައި 10 މީހުންނަށްވުރެ އިތުރަށް އެއްވެވޭނީ ޚާއްސަ ޙާލަތްތަކުގައި އެޗްޕީއޭއިން އަންގާ ގޮތެއްގެ މަތިންކަމަށެވެ. އަދި ފިޔަވަޅު ތަންފީޒުކުރުމުގައި ވަގުތާއި ޙާލަތަށް ބަލައި އަޅަންޖެހޭ އެންމެހައި ފިޔަވަޅުތައް މޯލްޑިވްސް ޕޮލިސް ސަރވިސްއާ ކަމާބެހޭ އެހެނިހެން މުޢައްސަސާތަކުން އަޅަމުންދާނެކަމަށެވެ.
މާލޭ ސަރަޙައްދުގައި އެންމެ ގިނައިން އެއްވެ އުޅެވޭނެ މީހުންގެ އަދަދު ކަނޑައަޅާފައިވަނީ، ކޯވިޑް-19އަކީ ފަސޭހައިން ފެތުރޭ ބައްޔަކަށްވާތީ މީހުން ދިމާވާ މިންވަރު ވީހާވެސް ކުޑަކުރުމަށެވެ. ކޯވިޑް-19އާ ގުޅިގެން މީގެކުރިންވެސް މިފަދަ ފިޔަވަޅުތައްވަނީ އަޅާފައެވެ. އެގޮތުން 5 މީހުންނަށްވުރެ ގިނައިން އެއްވެ އުޅުން އޭރު މަނާކުރިއެވެ.

advertisement

މާލެ ސަރަހައްދުގައި އެއްވެ އުޅެވޭ މީހުންގެ އަދަދު 10 އަކަށް ހަދާފައިމިވަނީ ރާއްޖޭގައި ވަކިން ހާއްސަކޮށް މާލެ ސަރަހައްދުގައި ކޯވިޑް19 ފެތުރޭ މިންވަރު އިތުރުވާން ފެށުމާއިއެކު އެކަން ހުއްޓުވުމުގެ ގޮތުންނެވެ.