ގޯ އެއަރއިން ހައިދަރުއާބާދާއި ރާއްޖެއާއި ދެމެދު ސީދާ ދަތުރުތައް ފަށައިފި

ގޯ އެއަރއިން އިންޑިއާގެ ހައިދަރު އާބާދާއި ރާއްޖެ އާއި ދެމެދު ސީދާ ދަތުރުތައް ފަށައިފިއެވެ. ގޯ އެއަރއިން ރާއްޖެއާއި ހައިދަރުއާބާދާއި ދެމެދު ސީދާ ދަތުރުތައް ފަށާފައިވާއިރު ހަފްތާއަކު 4 ދުވަހު ދަތުރުތައް ބާއްވާނެއެވެ.
ގޯ އެއަރއިން ހައިދަރު އާބާދުން ރާއްޖެއަށް ކުރާ ދަތުރުތަކުގެ ޖެނެރަލް ސޭލްސް އެޖެންޓަކީ ވޮޔަޖަސް މޯލްޑިވްސް އެވެ. ގޯ އެއަރއިން މިހާރުވެސް އަންނަނީ އިންޑިއާގެ ނިއުދިއްލީއާއި މުމްބާއީގެ އިތުރުން ބެންގަލޫރުން ސީދާ ދަތުރުތައް ރާއްޖެއަށް ކުރަމުންނެވެ.
މުމްބާއީން ރާއްޖެއަށް އަންނަ ޕްލައިޓްތަކުގެ ދަތުރުތައް އޮންނަނީ ކޮންމެ ބުދަ، ބުރާސްފަތި އަދި ހޮނިހިރު ދުވަހުއެވެ. ދިއްލީ ދަތުރުތައް އޮންނަނީ ހޯމަ، ބުދަ އަދި ހޮނިހިރުގައެވެ. އަދި ބެންގަލޫރް ދަތުރުތައް އޮންނަނީ ބުދަ ދުވަހާއި ހޮނިހިރު ދުވަހުއެވެ.
ކޮވިޑް19 އަށްފަހު އެއް ޤައުމަކުން އެންމެ ގިނަ އެއަރލައިންތައް ރާއްޖެއަށް ދަތުރުފެށި ޤައުމަކީވެސް އިންޑިއާއެވެ. އިންޑިއާގެ ގިނަ އެއަރލައިންއަކުން ރާއްޖެއަށް ދަތުރުކުރަމުންއަންނައިރު މިއަހަރުގެ މިހާތަނަށް ރާއްޖެއަށް އެންމެ ގިނަ އަދަދަކަށް ފަތުރުވެރިން އައި 2 ވަނަ ޤައުމުގެ ގޮތުގައި އޮތީވެސް އިންޑިއާއެވެ. އަހަރުގެ މިހާތަނަށް އިންޑިއާއިން ރާއްޖެއަށް ވަނީ 26،292 ފަތުރުވެރިން އައިސްފައެވެ. އަދި މިދިޔަ އަހަރު ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރި ޤައުމަކީ އިންޑިއާއެވެ. މިދިޔަ އަހަރު ރާއްޖެ ޒިޔާރަތްކުރި ފަތުރުވެރިންގެ ތެރެއިން 11.3 އިންސައްތަ ހިއްސާކުރަނީ އިންޑިއާ ފަތުރުވެރިންނެވެ. އެއީ 62،960 ފަތުރުވެރިންނެވެ.

advertisement