ވެހިކަލް ދުއްވުން މަނާ ވަގުތުގައި ކޮންމެ ޓެކްސީ ސެންޓަރަކަށް 10 ފާސް ދޫކުރަނީ

މާލެ ސަރަހައްދުގައި ވެހިކަލް ދުއްވުން މަނާ ވަގުތުގައި ޒަރޫރީ ބޭނުންތަކަށް ޓެކްސީ އަދި ޕިކަޕުގެ ހިދުމަތް ދިނުމަށް ކޮންމެ ސެންޓަރަކަށް 10 ފާސް ދޫކުރަން ނިންމާފައިވާކަމަށް މޯލްޑިވްސް ޕޮލިސް ސާވިސްއިން ވިދާޅުވެއްޖެއެވެ.

ޓެކްސީ އަދި ޕިކަޕުގެ ހިދުމަތް ދިނުމަށް ކޮންމެ ސެންޓަރަކަށް 10 ފާސް ދޫކުރާނެކަމަށް ފުލުހުން ބުނެފައިވާއިރު، ޓެކްސީތައް ހުންނަން ޖެހޭނީ އެޗްޕީއޭގެ ގައިޑްލައިނާ އެއްގޮތަށެވެ. ގައިޑްލައިނާއި އެއްގޮތައް ހުރޭތޯ ފުލުހުން ބަލާ ފާސްކުރާނެއެވެ. އަދި އުސޫލަށް ނުފެތޭނަމަ ހުއްދަ ކެންސަލް ކުރާނެ ކަމަށްވެސް ފުލުހުން ވަނީ ބުނެފައެވެ.

advertisement

ފުލުހުން ބުނީ މަނާ ވަގުތުގައި ފެނާއި ގޭހުގެ ހިދުމަތް ދޭ ކުންފުނިތަކަށް ހާއްސަ ހުއްދައެއް ނުނަގާ ހިދުމަތް ދެވޭނެ ކަމަށެވެ. ނަމަވެސް ކޮންމެ ކުންފުންޏަކަށްވެސް ބޭނުން ކުރެވޭނީ ދެ ވެހިކަލެވެ.
ފުލުހުން ވަނީ ފެރީގެ ހިދުމަތާއި ޕަބްލިކް ޓްރާސްޕޯޓްގެ ހިދުމަތްވެސް ރޭގަނޑު 10:30 ގައި ހުއްޓާލުމަށް އަންގާފައެވެ.

ކޯވިޑް ފެތުރުން އިތުރުވާތީ މާލެ ސަރަހައްދުގައި ހަވީރު 6 އިން ހެނދުނު 6 އަކަށް ވެހިކަލް ދުއްވުން ވަނީ މަނާކޮށްފައެވެ. މާލެ ސަރަހައްދުގައި ވެހިކަލް ދުއްވުމާއި މީހުން ނުކުމެ އުޅުން މަނާ ވަގުތުތަކުގައި ޒަރޫރީ ބޭނުންތަކަށް ވެހިކަލް ބޭނުން ކުރުމަށް ނުވަތަ ބޭރަށް ނުކުތުމަށް ޕޮލިސްގެ ޕާމިޓް ޕޯޓަލް މެދުވެރިކޮށް ހުއްދައަށް އެދުމަށް މިއަދު ވަނީ ފުރުސަތު ހުޅުވާލާފައެވެ. ފުލުހުން ބުނީ މަނާ ގަޑީގައި ހުއްދަ ދެވޭނެ ކަންކަމަކީ އިމާޖެންސީ ކަމެއްގައި ނުވަތަ ޑިއުޓީއަށް ދިއުމަށާ މަސައްކަތަށް ދިއުމާއި އައުމަށް އަދި އެއާޕޯޓް ޓްރާންސްފާ އަދި ކާބޯތަކެތި ޑެލިވާކުރުމަށް ކެފޭ/ރެސްޓޯރެންޓުތަކަށް ކަމަށެވެ.