ކުރިން މާލެ ލޮކްޑައުންކުރިއިރު ދޫކޮށްފައިވާ ފާސްތައް މިހާރު ބޭނުން ނުކުރެވޭނެ – ފުލުހުން

މާލެ ސިޓީ ކުރިން ލޮކްޑައުން ކުރި އިރު ދޫކޮށްފައިވާ ފާސްތައް މިހާރު ބޭނުން ނުކުރެވޭނެކަމަށް ފުލުހުން ބުނެފިއެވެ. ފުލުހުން މިހެން ބުނެފައިވަނީ ބައެއް މީހުން ކުރިން މާލެ ލޮކްޑައުން ކުރިއިރު ދޫކޮށްފައިވާ ފާސްތައް ބޭނުންކުރަމުންދާތީއެވެ. ފުލުހުން ވިދާޅުވީ، އެ ފާސް ހިފައިގެން ބޭރުގައި އުޅޭނަމަ ހުއްޓުވާނެ ކަމަށެވެ.

މާލެ ސަރަހައްދުގައި ހަވީރު ހަޔަކުން ހެނދުނު ހަޔަކަށް ވެހިކަލް ދުއްވުން މިހާރު ވަނީ މަނާކޮށްފައެވެ. އަދި ރޭގަނޑު 11 އިން ފަތިހު 4:30 އަށް ކާފިއު އިއުލާންކޮށް ބޭރަށް ނުކުތުން ވަނީ މަނާކޮށްފައެވެ.

advertisement

މާލެ ސަރަހައްދުގައި ވެހިކަލް ދުއްވުމާއި މީހުން ނުކުމެ އުޅުން މަނާ ވަގުތުތަކުގައި ޒަރޫރީ ބޭނުންތަކަށް ވެހިކަލް ބޭނުން ކުރުމަށް ނުވަތަ ބޭރަށް ނުކުތުމަށް ޕޮލިސްގެ ޕާމިޓް ޕޯޓަލް މެދުވެރިކޮށް ހުއްދައަށް އެދުމަށް ފުލުހުން ވަނީ އެދިފައެވެ. ފުލުހުން ބުނީ މަނާ ގަޑީގައި ހުއްދަ ދެވޭނެ ކަންކަމަކީ އިމާޖެންސީ ކަމެއްގައި ނުވަތަ ޑިއުޓީއަށް ދިއުމަށާ މަސައްކަތަށް ދިއުމާއި އައުމަށް އަދި އެއާޕޯޓް ޓްރާންސްފާ އަދި ކާބޯތަކެތި ޑެލިވާކުރުމަށް ކެފޭ/ރެސްޓޯރެންޓުތަކަށް ކަމަށެވެ.

ވެހިކަލް ދުއްވުން މަނާ ގަޑިތަކުގައާއި ކާފިއު ވަގުތު ޒަރޫރީ ބޭނުންތަކަށް ވެހިކަލް ބޭނުން ކުރުމަށް ނުވަތަ ބޭރަށް ނުކުތުމަށް police.gov.mv/permit ޕޯޓަލް މެދުވެރިކޮށް ހުއްދަ ހޯދުމަށް ވަނީ އެދިފައެވެ. ޕޮލިސް ޕާމިޓް ސެންޓާ އަށް ގުޅޭނެ ނަންބަރަކީ 1665 އެވެ.