މާރޗް 25 އިން ފެށިގެން ދައުލަތުގެ އޮފީސްތަކުގެ ފައިސާ ބަލައިގަންނާނީ އޮންލައިންކޮށް

އަންނަ މަރޗް މަހުގެ 25 އިން ފެށިގެން ދައުލަތުގެ ހުރިހާ އޮފީސްތަކުން ފައިސާ ބަލައިގަންނާނީ ހަމައެކަނި ޑިޖިޓަލް ވަސީލަތްތަކުން ކަމަށް ފިނޭންސް މިނިސްޓްރީން ވިދާޅުވެއްޖެއެވެ.

ފިނޭންސް މިނިސްޓްރީން މާލިއްޔަތާއި ބެހޭގޮތުން އާންމުކުރި ސަރކިއުލާއެއްގައި ވަނީ ދައުލަތުގެ ހުރިހައި އޮފީސްތަކުން ބަލައިގަންނަ ފައިސާ މޯބައިލް ޕޮއިންޓް އޮފް ސޭލް މެދުވެރިކޮށް ބަލައިގަތުމުގެ އިންތިޒާމް ހަމަޖެއްސުމަށްޓަކައި މިމަހުގެ 25 ވަނަ ދުވަހުގެ ކުރިން އެ މިނިސްޓްރީގެ އީމެއިލް އެޑްރެހަށް ފޮނުވުމަށް އަންގަވާފައެވެ. އަދި މޯބައިލް ޕޮއިންޓް އޮފް ސޭލް މެދުވެރިކޮށް ބަލައިގަންނަ ފައިސާގެ ހިސާބުތައް ދައުލަތުގެ މާލިއްޔަތުގެ ޤަވާއިދުގެ 5.8 މާއްދާގައި ވާގޮތުގެ މަތިން ޕަބްލިކް އެކައުންޓިންގ ސިސްޓަމްގައި ރިކޯޑްކުރަމުން ގެންދިއުމަށްވެސްވަނީ އަންގަވާފައެވެ.

advertisement

އަންނަ މަހުގެ 25 ވަނަ ދުވަހުން ފެށިގެން ދައުލަތުގެ ހުރިހައި އޮފީސްތަކުން ޑިޖިޓަލް ވަސީލަތްތައް މެދުވެރިކޮށް ފައިސާ ބަލައިގަތުމަށް ފިނޭންސް މިނިސްޓްރީން އަންގަވާފައިވާއިރު އެކަމުން 3 އޮފީހެއް އިސްތިސްނާވާނެކަމުގައި ފިނޭންސް މިނިސްޓްރީން ވަނީ ވިދާޅުވެފައެވެ. އެއީ މޯލްޑިވްސް އިންލެންޑް ރެވެނިއު އޮތޯރިޓީއާއި، ރާއްޖެއިން ބޭރުގައި ޤާއިމްވެފައިވާ ދައުލަތުގެ އޮފީސްތަކާއި، ލޯކަލް ކައުންސިލްތަކެވެ.

ޑިޖިޓަލް ވަސީލަތްތައް މެދުވެރިކޮށް ދެވޭ މާލީ ޚިދުމަތްތައް ކުރިއަރުވައި ރާއްޖޭގެ އިޤްތިސާދުގައި ޗެކާއި ނަގުދު ފައިސާއަށް ބަރޯސާވާ މިންވަރު ކުޑަކުރުމުގެ ގޮތުން ދައުލަތުގެ އޮފީސްތަކުން ބަލައިގަންނަ ފައިސާ ބޭންކް އޮފް މޯލްޑިވްސްގެ ޕޮއިންޓް އޮފް ސޭލް މެދުވެރިކޮށް ބަލައިގަނެވޭނެ އިންތިޒާމް ފިނޭންސް މިނިސްޓްރީން ވަނީ ތައާރަފްކޮށްފައެވެ.