ކެލާގައި ފަތުރުވެރިކަމަށް 14 ބީމެއް ދޫކުރަނީ

ހއ. ކެލާގައި ފަތުރުވެރިކަން ތަރައްޤީކުރަން 14 ބީމެއް ދޫކުރުމަށް ކެލާ ކައުންސިލާއި ޓޫރިޒަމް މިނިސްޓްރީއާ ދެމެދު ސޮއިކޮށްފިއެވެ.

މި އެއްބަސްވުމުގައި ސޮއިކޮށްފައިވަނީ ޒޫމް މެދުވެރިކޮށް އޮންލައިންކޮށް ބޭއްވި ރަސްމިއްޔާތެއްގައެވެ. ހއ.ކެލާގައި ފަތުރުވެރިކަން ތަރައްޤީކުރަން 14 ބީމެއް ދޫކުރުމުގެ އެއްބަސްވުމުގައި ޓޫރިޒަމް މިނިސްޓްރީގެ ފަރާތުން ސޮއިކުރެއްވީ، އެ މިނިސްޓްރީގެ ސީނިއަރ ޕޮލިސީ ޑިރެކްޓަރ މުހައްމަދު ޚުއްސާންއެވެ. އަދި ކެލާ ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް އާދަމް ޤުފްރާންއެވެ.

advertisement

މި ބައްދަލުވުމުގައި ޓޫރިޒަމް މިނިސްޓަރ ޑރ. އަބްދުﷲ މައުސޫމްއާއި، ކެލާ ދާއިރާގެ މަޖިލިސް މެންބަރ އިބްރާހިމް ޝަރީފް ވަނީ ބައިވެރިވެވަޑައިގަންނަވާފައެވެ.

ކެލާ ކައުންސިލާއި ޓޫރިޒަމް މިނިސްޓްރީއާއި ދެމެދު ސޮއިކޮށްފައިވަނީ ކެލާގައި ފަތުރުވެރިކަން ތަރައްޤީކުރަން 14 ބީމެއް ދޫކުރުމަށެވެ. މީގެތެރޭގައި ހިމެނެނީ ގެސްޓްހައުސް ތަރައްޤީކުރުމަށް ދޫކުރާ 5000 އަކަފޫޓުގެ 12 ބިމާއި، ސިޓީ ހޮޓާ ތަރައްޤީކުރަން ދޫކުރާ 10000 އަކަފޫޓުގެ 2 ބިމެވެ.

ޓޫރިޒަމް މިނިސްޓްރީން ވިދާޅުވީ، ފަތުރުވެރިކަން ތަރައްޤީކުރުމަށް ކުރެވޭ މަސައްކަތުގައި ކައުންސިލްގެ ބައިވެރިވުން އިތުރުކުރުމަކީ ސަރުކާރުން ވަރަށް ބޮޑު އަހަންމިއްޔަތުކަމެއްދޭކަމެއްކަމަށެވެ. އަދި ފަތުރުވެރިކަމުގެ މަންފާ ސީދާ ރައްޔިތުންނަށް ހޯދައިދިނުމަށްޓަކައި މީހުން ދިރިއުޅޭ ރަށްރަށުގައި ފަތުރުވެރިކަން ތަރައްޤީކުރުމުގެ މަސައްކަތްތައް އިތުރަށް ފުޅާކުރުމަކީ ސަރުކާރުގެ ސިޔާސަތެއްކަމަށްވެސް ޓޫރިޒަމް މިނިސްޓްރީން ވިދާޅުވެއެވެ.

ކެލާގެ އިތުރުން އައްޑޫ ސިޓީ ކައުންސިލާއި، ގދ. ވާދޫ ކައުންސިލާއި، ހއ. ހޯރަފުށީ ކައުންސިލާއި ގުޅިގެން ފަތުރުވެރިކަމަށް ބިން ދޫކުރުމުގެ މަސައްކަތް ދަނީ ކުރަމުންނެވެ.