އިމްޕޯޓް އެކްސްޕޯޓް ދަށްވެ، ދައުލަތައް ލިބުނު އާމްދަނީވެސް %12 ދަށްވެއްޖެ

މިދިޔަމަހު ރާއްޖެއަށް އިމްޕޯޓްކުރި މުދަލާއި ރާއްޖެއިން އެކްސްޕޯޓުކުރި މުދަލުގެ އަދަދު ދަށްވެ، ދައުލަތަށް ލިބުނު އާމްދަނީ 12 އިންސައްތަ ދަށަށް ހިނގައްޖެއެވެ.

މޯލްޑިވްސް ކަސްޓަމްސް ސަރވިސްއިން އާއްމުކޮށްފައިވާ ތަފާސް ހިސާބުތައް ދައްކާގޮތުން 2020 ވަނަ އަހަރުގެ ޖަނަވަރީމަހު ދިވެހިރާއްޖެއަށް 3.8 ބިލިއަން ރުފިޔާގެ މުދާ އިމްޕޯޓް ކޮށްފައިވާއިރު، މި އަހަރުގެ ޖަނަވަރީމަހު މި ޢަދަދުވަނީ 2.9 ބިލިއަން ރުފިޔާއަށް ދަށްވެފައެވެ. އެހެންކަމުން މިއީ 24 އިންސައްތައިގެ ދަށްވުމެކެވެ.

advertisement

ތަފާސް ހިސާބުތައް ދައްކާގޮތުން މިދިޔަ އަހަރުގެ ޖެނުއަރީމަހު 420 މިލިއަން ރުފިޔާގެ މުދާ އެކްސްޕޯޓްކޮށްފައިވާއިރު މިއަހަރުގެ ޖެނުއަރީމަހު މިއަދަދު އުޅެނީ 316 މިލިއަން ރުފިޔާގައެވެ. މިއީ 25 އިންސައްތަ ދަށް އަދަދެކެވެ.

2020 ވަނަ އަހަރުގެ ޖަނަވަރީ މަހު އިމްޕޯޓް އެކްސްޕޯޓުން ދައުލަތައް ލިބުނު އާމްދަނީއަކީ 272 މިލިއަން ރުފިޔާއެވެ. މި އަހަރުގެ ޖަނަވަރީމަހު މި ޢަދަދު އުޅެނީ 240 މިލިއަން ރުފިޔާގައެވެ. އެހެންކަމުން މިއީ 12 އިންސައްތައިގެ ދަށްވުމެކެވެ.

މިދިޔަ ޖަނަވަރީ މަހު ދިވެހިރާއްޖެއަށް އެންމެ ގިނައިން މުދާ އެތެރެކޮށްފައިވާ ގައުމުތަކަކީ އޫ.އޭ.އީ، ޗައިނާ އަދި އޮމާނެވެ. ޔޫ.އޭ.އީއިން 386 މިލިއަން މުދާ އެތެރެކޮށްފައިވާއިރު ޗައިނާއިން 365 މިލިއަން ރުފިޔާގެ މުދާ އަދި އޮމާނުން 364 މިލިއަން ރުފިޔާގެ މުދާ ވަނީ ރާއްޖެއަށް އެތެރެކޮށްފައެވެ.