ވޯޓަކާއި ނުލައި 120 ކެނޑިޑޭޓަކަށް ގޮނޑި ކަށަވަރުވެއްޖެ

ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީއަށް ވޯޓަކާ ނުލައި 120 ކެންޑިޑޭޓުން މަގާމަށް ހޮވިއްޖެ އެވެ. މި ކެނޑިޑޭޓުން ވޯޓަކާއި ނުލައި ހޮވިފައިވަނީ އިންތިހާބަށް ކުރިމަތިލި ބައެއް ކެންޑިޑޭޓުންގެ ނަން ނެގުމާއި ގުޅިގެންނެވެ.

އިލެކްޝަން ކޮމިޝަނުން ވިދާޅުވީ، ކައުންސިލް އިންތިޚާބުގެ ދިހަ ދާއިރާއަށް 15 މެމްބަރުން ހޮވިފައިވާއިރު، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ހަތް ދާއިރާއަކަށް 28 މެމްބަރުން ހޮވިފައިވާ ކަމަށެވެ.

advertisement

އިލެކްޝަންސް ކޮމިޝަނުން ވިދާޅުވީ، ނަން އަނބުރާ ގެންދިޔުމަށް ހުޅުވާލި ފުރުސަތުގައި، 308 ކެންޑިޑޭޓަކު ނަން އަނބުރާ ގެންގޮސް ބައެއް މީހުންގެ ކެންޑިޑެސީ ވަނީ ބާތިލްކޮށްފަ އެވެ. ކައުންސިލް އިންތިޚާބުގައި ވާދަކުރި 169 މީހުން ނަން އަނބުރާ ގެންގޮސްފައިވާއިރު، އަންހެނުންގެ ތަރައްގީއަށް މަސައްކަތްކުރާ ކޮމެޓީއަށް ކުރިމަތިލި 139 މީހަކުވެސް ވަނީ ނަން އަނބުރާ ގެންގޮސްފައެވެ.

ލޯކަލް ކައުންސިލް އިންތިޚާބުގައި މިހާރު ވާދަކުރަނީ 3،934 ކެނޑިޑޭޓުންނެވެ. އެއީ ކައުންސިލް އިންތިޚާބުގައި ވާދަކުރާ 2،264 މީހުންނާއި އަންހެނުންގެ ކޮމެޓީތަކަށް ވާދަކުރާ 1،670 މީހުންނެވެ. އިންތިހާބު ބޭއްވުމަށް މިހާރު ތާވަލްކޮށްފައިވަނީ އަންނަ އޭޕްރީލް މަހުގެ 10 ވަނަ ދުވަހުއެވެ.