މާލެ ސަރަހައްދުގައި އުޅޭ އުމުރުން 40 އަހަރުން މަތީގެ މީހުންނަށް ވެކްސިން ޖެހުމުގެ ފުރުސަތު ހުޅުވާލައިފި

މިއަދުން ފެށިގެން މާލެ ސަރަހައްދުގައި އުޅޭ އުމުރުން 40 އަހަރުން މަތީގެ މީހުންނަށް ވެކްސިން ޖެހުމުގެ ފުރުސަތު ހުޅުވާލައިފިއެވެ. އެޗްޕީއޭއިން އަންނަނީ އިސްކަންދޭ ތަރުތީބުން އެކި އުމުރުފުރާގެ މީހުންނަށް ވެކްސިން ޖެހުމުގެ ފުރުސަތު ހުޅުވާލަމުންނެވެ.

އެޗްޕީއޭ އިން ބުނީ މިއަދުން ފެށިގެން ވެކްސިން ދޭނީ 40 އަހަރުން މަތީގެ މީހުންނަށާއި އުމުރުން 18 އަހަރާ 40 އަހަރާ ދެމެދުގެ މީހުންގެ ތެރެއިން ދިގު މުއްދަތަކަށް ބޭސް ފަރުވާ ކުރާ މީހުންނަށް ކަމަށެވެ.
މާލޭގައި ވެކްސިން ޖަހާނީ ސޯޝަލް ސެންޓަރާއި އިސްލާމީ މަރުކަޒު ގައި ހެނދުނު ނުވަޔަކުން ހަވީރު ފަހަކަށެވެ. ވިލިމާލޭ ޒުވާނުންގެ މަރުކަޒުގައި ވެކްސިން ޖެހުން ހެނުދު ނުވަޔަކުން މެންދުރު އެކަކަށް ކުރިއަށްދާއިރު ހުޅުމާލޭ ފްލޫ ކްލިނިކު ހިންގި އިމާރާތުގައި ނިވަޔަކުން ފަހަކަށް ވެކްސިން ޖެހުން ކުރިއަށް ދާނެއެވެ.
މިމަހުގެ 1 ވަނަ ދުވަހު ރާއްޖޭގައި ވެކްސިން ޖެހުމުގެ ޤައުމީ ޕްރޮގްރާމް ވަނީ ފަށާފައެވެ. އަދި މިހާތަނަށް ރާއްޖެއިން ބައި ލައްކައަށްވުރެ ގިނަ މީހުންނަށް ވަނީ ވެކްސިން ދީފައެވެ. ރާއްޖޭގައި މިހާރު ޖަހަމުން އަންނަނީ އިންޑިއާއިން ހަދިޔާ ކުރި އޮކްސްފޯޑް-އެސްޓްރާޒެކެނާ ކޮވިޝީލްޑް ވެކްސިންގެ 100،000 ޑޯޒް އެވެ.

advertisement