އަހަރުގެ މިހާތަނަށް ދައުލަތުން ލޯނުތައް ދެއްކުމަށް 161 މިލިއަން ރުފިޔާ

ސަރުކާރުގެ ލޯނުތައް އަދާކުރުމަށް މި އަހަރުގެ މިހާތަނަށް 161 މިލިއަން ރުފިޔާ ދައްކާފައިވާކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.
ފިނޭންސް މިނިސްޓްރީން އާންމުކޮށްފައިވާ “ވީކްލީ ފިޒްކަލް ޑިވެލޮޕްމަންޓް” ރިޕޯޓުގައިވާގޮތުން ފެބްރުއަރީ މަހުގެ 11 ވަނަ ދުވަހުގެ ނިޔަލަށް ދައުލަތައް އާމްދަނީއާއި ހިލޭ އެހީގެ ގޮތުގައި ލިބިފައިވަނީ 2.2 ބިލިއަން ރުފިޔާއެވެ. އަދި މި މުއްދަތުގައި ދައުލަތުގެ ޙަރަދުތައް އުޅުނީ 2 ބިލިއަން ރުފިޔާގައެވެ.
މިއަހަރުގެ މިހާތަނަށް ދައުލަތައް އާމްދަނީގެ ގޮތުގައި އެންމެ ބޮޑު އަދަދެއް ލިބިފައިވަނީ ޓުކުހުގެ ގޮތުގައެވެ. މި މުއްދަތުގައި ދައުލަތައް ލިބުނު އާމްދަނީގެ %88 ހިއްސާކުރަނީ ޓެކުހުގެ ގޮތުގައި ލިބުނު އާމްދަނީއެވެ. އަދި އަނެއް %12 އަކީ ޓެކްސް ނޫން ގޮތްގޮތުން ލިބުނު އާމްދަނީކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައެވެ.
ފެބްރުއަރީ މަހުގެ 11 ވަނަ ދުވަހާއި ހަމައަށް ދައުލަތައް ލިބުނު ޓެކްސް އާމްދަނީ 2 ބިލިއަނާއި ގާތްކުރެއެވެ. ޓެކްސް އާމްދަނީގެ ގޮތުގައި އެންމެ ބޮޑު އަދަދެއް ލިބިފައިވަނީ ބީޕީޓީގެ ގޮތުގައެވެ. އެއީ 871.9 މިލިއަން ރުފިޔާއެވެ. 2 ވަނައަށް އެންމެ ބޮޑު އާމްދަނީއެއް ލިބިފައިވަނީ ޖީއެސްޓީގެ ގޮތުގައެވެ. އެއީ 797.2 މިލިއަން ރުފިޔާއެވެ.
މި މުއްދަތުގައި ދައުލަތުން ކުރި ޙަރަދުގެ %74 އަކީ ރިކަރަންޓް ޙަރަދުތަކެވެ. އަދި %26 އަކީ ކެޕިޓަލް ޙަރަދުތަކެވެ. ރިކަރަންޓް ޙަރަދުތަކަށް 1.5 ބިލިއަން ރުފިޔާ ވަނީ ޙަރަދުކޮށްފައެވެ.

advertisement