އަމިއްލަ ހިޔާލު: ފްރާންސްގެ އާއިލާގެ ވާހަކަ —ބޮޑު އިހުމާލެއްގެ ތަންކޮޅެއް!

ތ. ވޭމަންޑޫގައި ދިރިއުޅޭ ފްރާންސްގެ އާއިލާއެއްގެ ވާހަކަ އޮންލައިން ނޫސް “މިހާރު” ގައި ޝާއިއުކުރުމާ އެކު ސޯޝަލް މީޑިއާ މި ވަނީ ކެކި އަރައިގެންފައެވެ. ގިނަ މީހުންނަށް ގޯސްވީ އެ ވާހަކަ ގެނެސްދިން ނޫސްވެރިޔާއެވެ. އަނެއް ބަޔަކަށް ގޯސްވީ އެ ރިޕޯޓާއި ގުޅިގެން އިމިގްރޭޝަނުން ނެރުނު ބަޔާނެވެ. އިދާރާތަކުގެ އިހްމާލު ވެސް އެތައް ވަޔަކު ދަނީ ފާހަގަކުރަމުންނެވެ. ހަގީގަތަކީ މިއީ ރާއްޖޭގައި އޮތް ބިދޭސީންގެ ބޮޑު މައްސަލައިގެ ކުޑަ މިންވަރެއް ކަމެވެ.

ގަވާއިދާއި ޚިލާފަށް ރާއްޖޭގައި އުޅޭތާ 12 އަހަރު : އަސާސީ ހިދުމަތްތައް ނުލިބޭ

ވޭމަންޑޫގައި މިހާރު ދިރިއުޅޭ މި އާއިލާ ރާއްޖެ އައީ މީގެ 12 އަހަރު ކުރިންނެވެ. ޓުއަރިސްޓް ވިސާގައި ރާއްޖެ އައީ ދެމަފިރިންނާއި ތިން ކުދިންނެވެ. ނަމަވެސް ރާއްޖޭގައި އުޅެމުން އެ ދެމަފިރިންނަށް އިތުރު ދެ ކުދިން ލިބި މިހާރު ފަސް ކުދިން އެބަ ތިއްބެވެ. ރިޕޯޓްގައިވާ ގޮތުން އެ ދެ މީހުން އެންމެ ފުރަތަމަ ދިޔައީ ގދ. ތިނަދޫއަށެވެ. އެ ރަށުން ލ. އަތޮޅުގެ އެކި ރަށްތަކުގައި އުޅުމަށް ފަހު ތ. ތިމަރަފުށީގައި ދުވަސްތަކެއް ހޭދަކުރިއެވެ. އަދި ފަހުން ވޭމަންޑޫގައި ވަޒަންވެރިވިތާ ވެސް ހައެއްކަ އަހަރު ވެއްޖެއެވެ.

advertisement

އެކި ފަރާތްތަކާ ހަވާލާދީ ރިޕޯޓްގައި ބުނެފައި ވަނީ ފިރިހެން މީހާއަކީ ކުރިން ގޭންގެއްގައި މަސައްކަތްކުރި މީހެއް ކަމަށެވެ. އިސްލާމްވުމަށް ފަހު ފްރާންސްގައި ދިރިއުޅެން އުނދަގޫތަކެއް ކުރިމަތިވުމުން އެންމެ ފުރަތަމަ ދިޔައީ އިނގިރޭސި ވިލާތަށް ކަމަށް ވެސް ލިޔެފައި ވެއެވެ. ވޭމަންޑޫގައި އެ މީހުން ދިރިއުޅެނީ ދިވެހިން ފަދައިންނެވެ. އެ މީހުންނާ ހެދި ބަޔަކަށް އުނދަގޫވެގެން ވެސް ނޫޅެއެވެ.

ފުރަތަމަ ކަމަކީ ޓުއަރިސްޓް ވިސާގެ މުއްދަތަކީ އެންމެ ގިނަ ވެގެން ވެސް ތިން މަހެވެ. އޭގެ ފަހުން ރާއްޖޭގައި ދިރިއުޅޭ ނަމަ އެ ބަޔަކު އެ އުޅެނީ ގަވާއިދާ ހިލާފަށެވެ. ރިޕޯޓްގައިވާ ގޮތުން އެ މީހުން ރާއްޖޭގެ ރަށްވެހިކަން ވެސް ހޯދަން އުޅުނެވެ. އެހެން ނަމަވެސް ރާއްޖޭގެ ރަށްވެހިކަން ހޯދުމަށް ބޭނުންވާ ޝަރުތުތަކާއި ލިޔެކިޔުންތައް އެ މީހުން އަތުގައި ނެތެވެ. ވޯކް ވިސާ އަށް ބަލާއިރު އަންސްކިލްޑް ލޭބަރުންގެ ގޮތުގައި ވިސާ ލިބޭނީ ހަމައެކަނި އެ މަސައްކަތް ކުރާ މީހާ އަށެވެ. އޭނާގެ އާއިލާ އަކަށް ނުލިބޭނެ އެވެ. އެހެންކަމުން އެ މީހުން 12 އަހަރު ހޭދަކޮށްފައި ވަނީ ރާއްޖޭގެ އެއްވެސް ގަވާއިދެއްގެ ތެރެއަށް ނުވަދެއެވެ.

ވޭމަންޑޫ ކައުންސިލްގެ ކަންބޮޑުވުން އޮތީ އެ މީހުން އެ ރަށުގައި އުޅޭތީއެއް ނޫނެވެ. ކަންބޮޑުވުން އޮތީ އެ އާއިލާ އަށް ލިބެންޖެހޭ ހައްގުތަކެއް ނުލިބޭތީއެވެ. ލިޔެކިޔުން ނެތުމުން ސިއްހީ ހިދުމަތެއް ނުލިބެއެވެ. ސްކޫލަކަށް ނުވެއްދެއެވެ. އެ ނޫން ވެސް އަސާސީ އެއްވެސް ހިދުމަތެއް ގަވާއިދާއި ގާނޫނުގެ ތެރެއިން ލިބޭނެ ގޮތެއް ނެތެވެ.

ސަރުކާރުގެ ސިޔާސަތު : ގަވައިދާއި ހިލާފަށް އުޅޭ ބިދޭސީން ޑިޕޯޓްކުރުން

މި ވާހަކަ މީޑިއާ އަށް ތިލަވުމާ އެކު އިމިގްރޭޝަނުން ބުނެފައި ވަނީ އެ މީހުން އަނބުރާ ފޮނުވާލުމަށް މަސައްކަތްކުރަމުން އަންނަ ކަމަށާއި އެ އިދާރާގެ ސަމާލު ކަމަށް އެ މައްސަލަ އައިސްގެން ޖުލައި މަހުން ފެށިގެން ކަންކަން ސާފުކޮށް ކުރަންޖެހޭ މަސައްކަތްތައް ކުރަމުން އަންނަ ކަމަށެވެ. ސޯޝަލް މީޑިއާ ކެކި އަރައިގަތީ އިމިގްރޭޝަން ކޮންޓްރޯލާގެ މި ސްޓޭޓްމަންޓާ އެކުގައެވެ. ފާޑުކިޔާ ފަރާތްތަކުން ބުނަމުން ދަނީ މުސްލިމް އެ އާއިލާއަށް ރާއްޖޭގައި އުޅެވެން ޖެހޭނެ ކަމަށާއި ބަޔަކަށް އުނދަގޫ ނުކޮށް ރީތި ގޮތުގައި އުޅޭ މުސްލިމް އާއިލާއެއް ފޮނުވާލަންޖެހޭ ސަބަބެއް ނެތް ކަމަށެވެ.

ރަނގަޅެވެ. މުސްލިމް އާއިލާއަކަށް ވީމާ ރާއްޖޭގައި އުޅެވޭނެ ގޮތެއް އޮތްތޯ ބަލައި އެ ގޮތަށް އެކަން ކުރުމަކީ ކުރެވިދާނެ ކަމެކެވެ. އެހެން ނަމަވެސް އެ މީހުން ރާއްޖޭގައި ދިރިއުޅޭ ނަމަ އެކަން ކުރަންޖެހޭނީ ގާނޫނާއި ގަވާއިދުތަކުގެ ތެރެއިންނެވެ. ދިވެހި ކޮންމެ ރައްޔިތަކަށް ލިބޭ ކޮންމެ ހައްގެއް އެ މީހުންނަށް ވެސް ލިބޭ ގޮތަށެވެ. އަސާސީ ހިދުމަތްތަކުން އެ ދެމަފިރިންނާއި އެ މީހުން ދަރިން ބާކީ ކޮށްގެން ނުވާނެއެވެ. ހާއްސަކޮށް ސިއްހީ ހިދުމަތާއި ތައުލީމުން މަހްރޫމް ވެގެން ނުވާނެއެވެ. ކަމާ ބެހޭ އިދާރާތައް ގުޅިގެން ވިޔަސް އެ މީހުންނަށް އެ މަގު ތަނަވަސް ކޮށްދޭންޖެހެއެވެ.

ދެން އޮތީ އެ މީހުން އަނބުރާ ފޮނުވާލުމުގެ މައްސަލައެވެ. ރާއްޖޭގެ ގާނޫނުތަކާއި ގަވާއިދުތައް ހުރި ގޮތުން ޓުއަރިސްޓް ވިސާގައި ތިން މަހަށް ވުރެ އިތުރަށް އުޅުމަކީ ގަވާއިދާއި ހިލާފަށް އުޅުމެވެ. އެހެންކަމުން އެ މީހުން ފެތެނީ ގަވާއިދާ ހިލާފަށް އުޅޭ ބިދޭސީންގެ ތެރޭގައެވެ. އެފަދަ މީހުން ހޯދައި ފޮނުވާލުމުގެ މަސައްކަތް މި ސަރުކާރުން ވަރަށް ވަރުގަދަ ކުރާ ދަނޑިވަޅެއްގައި މި މައްސަލަ އަށް އެކަށީގެންވާ ހައްލެއް ނުހޯދައިފި ނަމަ ދެން ކުރިމަތިވާ މައްސަލަތައް މާ ބޮޑެވެ. ރާއްޖޭގައި މުސްލިމް އެތައް ހާސް ބިދޭސީންނެއް ވިސާ ނެތި ގަވާއިދާ ހިލާފަށް އެބަ އުޅެއެވެ. ފްރާންސްގެ މި އާއިލާ އަށް ރާއްޖޭގައި ދިރިއުޅުމުގެ ފުރުސަތު ދޭ ނަމަ އެހެން ބިދޭސީންނަށް ވެސް އެ ފުރުސަތު ނުދޭންޖެހޭ ސަބަބެއް ނެތެވެ.

ފްރާންސްގެ މި އާއިލާ ތިބި ހާލަތަށް ބަލައި ވަޒަންވެރިވުމުގެ ފުރުސަތު ދެވިދާނެ ހެއްޔެވެ؟ ހަނގުރާމައިގެ ވިލާގަނޑެއްގެ ދަށުގައި އޮތް ފަލަސްތީނުގެ ބައެއް އާއިލާތައް ރާއްޖެ ގެނެސް ވަޒަންވެރި ކުރުވާފައި ވެއެވެ. އެހެން ނަމަވެސް ފަލަސްތީނާއި ފްރާންސާއި އަޅާ ކިޔާނީ ކިހިނެއް ހެއްޔެވެ؟ ފްރާންސްގައި ދިރިނޫޅެވޭ ހާލަތެއް މެދުވެރިވެގެން ރާއްޖޭގައި ވަޒަންވެރި ކުރެވިދާނެ ހެއްޔެވެ؟ އެ އާއިލާގެ ދޮށީ އަންހެން ކުއްޖާ “މިހާރު” އަށް ދީފައިވާ އިންޓަވިއުގައިވާ ގޮތުން އެ މީހުން އެނބުރި ފްރާންސަށް ގޮސްފި ނަމަ ޖަލަށް ދާންޖެހޭނެއެވެ. ނަމަވެސް އެއީ އެ އާއިލާ މުސްލިމުންނަށް ވިތީއެއް ނޫނެވެ. ބެލެވޭ ގޮތުގައި އެއީ ކޮންމެވެސް އެހެން ސަބަބަކާ ހުރެ ވެދާނެ ގޮތެކެވެ.

ފްރާންސްގައި މިހާރު ވެސް ހަތް މިލިއަނެއްހާ މުސްލިމުން ދިރިއުޅެއެވެ. އެކި ދާއިރާތަކުގައި އިސް މަގާމުތަކުގައި ވެސް މުސްލިމުން ގިނައެވެ. ސިޔާސީ ދާއިރާގަ އާއި ކުޅިވަރުގެ ދާއިރާގައި ވެސް ނަން މަޝްހޫރު މުސްލިމުން އެބަ ތިއްބެވެ. ދުނިޔޭގެ އެންމެ ވަރުގަދަ ފުޓުބޯޅަ ޓީމްތަކުގެ ތެރޭގައި ހިމެނޭ ފްރާންސްގެ ގައުމީ ޓީމުގައި ވެސް މުސްލިމުން ގިނައެވެ. މުސްލިމުންނަން ފްރާންސްގައި އުނދަގޫތަކެއް ނެތެކޭ ނޫނެވެ. ނަމަވެސް ފުރުސަތުތައް ވެސް ވަކި ކުޑައެއް ނޫނެވެ. އެހެންކަމުން އެ މޭރުމުން ބަލާ ނަމަ ފްރާންސްގެ މި އާއިލާ އަށް ރާއްޖޭގައި ވަޒަންވެރިވުމުގެ ފުރުސަތު ދޭންޖެހޭ ސަބަބެއް ނެތެވެ.

މިއީ އިހުމާލުގެ ކުޑަ މިންވަރެއް

މި އާއިލާ ގަވާއިދާ ހިލާފަށް ރާއްޖޭގައި 12 އަހަރު ހޭދަކޮށް ވަޒަންވެރިވުމުގެ ފުރުސަތު ލިބުނީ ކަމާ ބެހޭ އިދާރާތަކުގެ އިހްމާލުންނެވެ. މިފަދަ އެތައް ހާސް ބަޔަކު ރާއްޖޭގައި އެބަ އުޅެއެވެ. އޭގެ ތެރޭގައި އަމިއްލަ ވަޒަނުގައި ހުރި ގޯތި ގެދޮރު ވިއްކާލައި ދެން އަލުން އަނބުރާ ގައުމަށް ދިއުމުގެ އެއްވެސް ވިސްނުމެއް ނެތް އެތައް ބަޔަކު ވެސް އެބަ ތިއްބެވެ. ސައްހަ ވިސާއެއް ނެތި ބޮޑެތި ވިޔަފާރިތައް އެބަ ހިންގައެވެ. ވިސާއެއް ނެތި 12 އަހަރު ކީއްކުރަން ހެއްޔެވެ؟ ރާއްޖެ އައި ދުވަހެއް ބުނަން ނޭނގޭހާ ދުވަސްވީ މީހުން ރާއްޖޭގައި އެބަ އުޅެއެވެ. މިފަދަ ބައެއް މީހުންނަކީ ކޮންމެ ވެސް ބައެއްގެ ވިސާގައި ރާއްޖެ އައުމަށް ފަހު ފިލައިގެން ނުވަތަ ކޮންމެ ވެސް ސަބަބަކާއި ހުރެ ދޫވެފައި ތިބި މީހުންނެވެ. އަދި ޓުއަރިސްޓް ވިސާގައި އައިސް ގަވާއިދާ ހިލާފަށް މަސައްކަތްކުރާ އެތައް ބަޔަކު ވެސް އެބަ ތިއްބެވެ. މިއިން ކޮންމެ މީހަކީ ވެސް މަޖުބޫރީ ސަބަބެއް އޮތް މީހުންނެވެ. ސުވާލަކީ އެ މީހުންގެ މަޖުބޫރީ ހާލަތަށް ބަލައި އެ މީހުންނަށް ރާއްޖޭގައި ވަޒަންވެރިވުމުގެ ފުރުސަތު ދޭންވީ ހެއްޔެވެ؟

ގަވާއިދާއި ހިލާފަށް ރާއްޖޭގައި ވަޒަންވެރިވުމުގެ ފުރުސަތު އެއްވެސް މީހަކަށް ދެވިގެން ނުވާނެއެވެ. އެއީ މުސްލިމަކަށް ވިޔަސް އަދި އެހެން ދީނެއްގެ މީހަކަށް ވިޔަސް އެ މީހަކަށް ނުވަތަ އެ ބަޔަކަށް ރާއްޖޭގައި ވަޒަންވެރިވެވެން ވާނީ ގަވާއިދާ އެއްގޮތަށެވެ. ދީނަށް ލޯބިކޮށް ހެޔޮ ގޮތުގައި ބަޔަކަށް އުނދަގޫ ނުކޮށް އުޅުމަކީ ރާއްޖޭގެ ގާނޫނުތަކާއި ގަވާއިދުތަކާއި ހިލާފަށް ރާއްޖޭގައި ދިރިއުޅެން ފުރުސަތު ދޭންޖެހޭ ސަބަބެއް ނޫނެވެ. އަދި އެއީ ބަޔަކު ޑިޕޯޓްކުރަންޖެހޭ ނަމަ އެކަން ނުކޮށް ދޫކޮށްލުމަށް އޮތް ހުއްޖަތެއް ވެސް ނޫނެވެ. ފްރާންސްގެ މި އާއިލާ އަށް މެދުވެރިވެފައި މިވާ ގޮތަކީ ގަވާއިދާ ހިލާފަށް އުޅޭ ބިދޭސީންގެ ބޮޑު މައްސަލައިގެ ކުޑަ މިންވަރެކެވެ. މިއީ އިދާރާތަކުގެ އިހްމާލުގެ ކުޑަ ތަންކޮޅެކެވެ.

“އަމިއްލަ ހިޔާލު” ކެޓަގަރީގެ ދަށުން ޝާއިއުކުރެވޭ ލިޔުންތަކުގައި ހިމެނެނީ ލިޔުން ކޮންޓްރިބިއުޓް ކުރާ ފަރާތްތަކުގެ ހިޔާލެވެ. މި ލިޔުންތަކަކީ ކޮންމެހެން އެމްވީ ޕްލަސްގެ އެޑިޓޯރިއަލް ދައްކުވައިދޭ ލިޔުންތަކެއް ނޫނެވެ. އެމްވީ ޕްލަސްއަށް ލިޔުމެއް ހުށައަޅަން ބޭނުންނަމަ media@plus.mv އަށް އީމެއިލް ކުރެއްވުން އެދެމެވެ.