ފިޔަވަޅުތަކަށް ލުއިދެވޭނީ 2 ވަނަ ޑޯޒް ޖަހައި ކޭސްތައް ދަށްވުމުން – ނަޒްލާ މުސްތަފާ

ފިޔަވަޅުތަކަށް ލުއި ދެވޭނީ އާބާދީގެ ބޮޑު ބަޔަކަށް ދެވަނަ ޑޯޒު ޖަހައި، ކޭސްތައް މަދުވުމުން ކަމަށް ޓެކްނިކަލް އެޑްވައިޒަރީ ގުރޫޕުގެ މެމްބަރު ޑރ. ނަޒްލާ މުސްތަފާ ވިދާޅުވެއްޖެ އެވެ.

ކޮވިޑް19އާ ގުޅޭ މައުލޫމާތު ގެނެސްދިނުމަށް ޕީއެސްއެމްއިން ގެނެސްދޭ ކަވަރޭޖުގައި ޑރ. ނަޒްލާ ވިދާޅުވީ ވެކްސިންގެ ދެ ޑޯޒު ފުރިހަމަ ކުރި ނަމަވެސް އޭގެ އަސަރު ކުރަން ވަގުތު ނަގާ ކަމަށާއި ރައްކާތެރިކަމުގެ ފިޔަވަޅުތައް ދެމެހެއްޓުން މުހިންމު ކަމަށެވެ. އެހެންކަމުން އާބާދީގެ ބޮޑު ބަޔަކު ދެވަނަ ޑޯޒު ޖެހުމަށްފަހު ކޭސްތަކުގެ އަދަދު ދަށްވުމުން މިހާރު އަޅާފައިހުރި ރައްކާތެރިކަމުގެ ފިޔަވަޅުތަކަށް ލުއި ދެވޭނެ ކަމަށް ވެސް އޭނާ ވިދާޅުވި އެވެ.

advertisement

ޑރ. ނަޒްލާ ވިދާޅުވީ ފުރަތަމަ ޑޯޒު ޖަހައިގެން ދެ ހަފުތާ ފަހުން ބައްޔާ ދެކޮޅަށް ލިބޭ ރައްކާތެރިކަން 60 ޕަސެންޓަށް އަރާ ކަމަށެވެ. އަދި ދެވަނަ ޑޯޒުން އިތުރުވާ ރައްކާތެރިކަން ވެސް ލިބޭނީ ދެ ހަފުތާ ފަހުން ކަމަށް ވިދާޅުވި އެވެ. ވެކްސިން ޖެހުމަށްފަހުގައިވެސް ރައްކާތެރިކަމުގެ ފިޔަވަޅުތައް އަޅައި މާސްކު އެޅުމާއި ގައިދުރުކަން ބެހެއްޓުން މުހިންމުކަމަށް ޑރ. ނަޒްލާ ވިދާޅުވި އެވެ.
ރާއްޖޭގައި މިހާރު ޖަހަމުން އަންނަނީ އިންޑިއާއިން ހަދިޔާ ކުރި އޮކްސްފޯޑް-އެސްޓްރާޒެކެނާ ކޮވިޝީލްޑް ވެކްސިންގެ 100،000 ޑޯޒް އެވެ. ޗައިނާއިންވެސް ވަނީ ރާއްޖެއަށް ސައިނޯފާމް ވެކްސިންގެ 100،000 ޑޯޒް ހަދިޔަ ކުރަން ނިންމައިފައެވެ.