އަމިއްލަ ހިޔާލު: ސިޔާސީ އެކްޓިވިސްޓުން — ވައްކަން ކުރިޔަސް ވެރިންގެ ދިފާއުގައި!

ރާއްޖޭގެ ސިޔާސީ މަސްރަހުގައި އެކްޓިވިސްޓުންގެ ދައުރު ވަރަށް ބޮޑެވެ. ހާއްސަކޮށް އާ ގާނޫނު އަސާސީއާ އެކު ޕާޓީތަކުގެ ވެރިކަން ހިނގަން ފެށިފަހުން ސިޔާސީ ހަރަކާތުގެ އެންމެ ނުފޫޒު ގަދަ އެއް ގުނަވަނަކީ އެކްޓިވިސްޓުންނެވެ. އެހެން ނަމަވެސް ފެންނަން އޮތް ހަގީގަތަކީ އެ ބަޔަކު ސަޕޯޓްކުރާ ބަޔަކު ކޮންމެ ފަދަ ކަމެއް ކުރި ނަމަވެސް އެ ކަމެއްގެ ދިފާއުގައި މި ބުނާ އެކްޓިވިސްޓުން އަޑު އުފުލާ ކަމެވެ. ކުރީގެ ވެރިކަންތަކުގައި ވެސް މިކަން އޮތީ މި ގޮތަށެވެ. އަދި މިހާރު ވަކިން ކަންތައް ބޮޑެވެ.

މި ވެރިކަމުގައި ވެސް ނަގާ ކިޔާ ހައެއްކެ އެކްޓިވިސްޓުން އުޅެއެވެ. އެ މީހުންގެ ކަމަކަށް އޮންނަނީ ވެރިންނާއި ސަރުކާރުގެ ދިފާއުގުގައި ރެއާ ދުވާލު ސޯޝަލް މީޑިއާގައި އަޑުގަދަ ކުރުމެވެ. ހަމައެކަނި ސޯޝަލް މީޑިއާގައި އެކަންޏެއް ވެސް ނޫނެވެ. އިދިކޮޅު ފަރާތްތަކުން މުޒާހަރާއެއް ބޭއްވިޔަސް އެ ތަނަކަށް މި ބުނާ ބަޔަކު ގޮސް އިދިކޮޅު މީހުންނަށް ރައްދު ދެއެވެ. ސަރުކާރާއި ސަރުކާރުގެ ކުންފުނިތަކުން ބާއްވާ ނޫސްވެރިންގެ ބައްދަލުވުންތަކަށް ވެސް މި ބުނާ ބަޔަކު އެބަ ވަދެއެވެ. ވަންނަނީ ކިހިނެއް ކަމެއް ވެސް ނޭނގެއެވެ.

advertisement

ކޮންމެ ސަރުކާރެއްގައި ވެސް މި ބުނާ އެކްޓިވިސްޓުން ތިބެނީ ސަރުކާރުގެ ސިޔާސީ މަގާމުތަކުގައެވެ. ނުވަތަ ސަރުކާރު ހިއްސާވާ ކުންފުންޏެއްގެ ބޮޑު މުސާރަ ލިބޭ ކޮންމެ ވެސް ބޮޑު މަގާމެއްގައެވެ. އެއް ބަޔަކީ އެ ތިބޭ ގޮތެއްގައި ނުވަތަ އެ ބުނާ ބަހެއްގައި ހިފަހައްޓައިގެން ތިބޭ މީހުންނެވެ. އަނެއް ބަޔަކީ އަބަދު ވެސް އެ އިރެއްގައި އޮންނަ ވެރިކަން ކުރާ ނުވަތަ ރައީސަކަށް ހުންނަ ފަރާތެއްގެ ދިފާއުގައި ބަސް ބުނެ އުޅޭ މީހުންނެވެ.

ސަރުކާރު ބަދަލުވުމާ އެކު މި މީހުން ވެސް ބަދަލުވަނީއެވެ. މިސާލަކަށް އެމްޑީޕީގެ ސަރުކާރުގައި ސޯޝަލް މީޑިއާގައި ވާހަކަ މި ބުނާ މީހުން މިހާރު ސަނާ ކިޔަނީ މިހާރުގެ ރައީސް ޑރ. މުހައްމަދު މުއިއްޒު އަށެވެ. އޭރު ތިބީ އެ ސަރުކާރުގެ ސިޔާސީ މަގާމުތަކުގައެވެ. މިހާރު މި ސަރުކާރުގެ ސިޔާސީ މަގާމުތަކުގައެވެ.

އަނެއް ބަޔަކީ ވަކި ފިކުރަކަށް ވީތީ އިދިކޮޅު ނުވަތަ އެއްކޮޅު މީހުންނެވެ. މިސާލަކަށް ސީދާ އެމްޑީޕީ ނުވަތަ ޕީއެންސީގެ ފިކުރުގެ މީހުންނާ ދެކޮޅު އެކްޓިވިސްޓުންނެވެ. އަނެއް ބަޔަކު ސޯޝަލް މީޑިއާގެ ޕްލެޓްފޯމްތައް މެދުވެރިކޮށް އެ މީހުން ގަބޫލުކުރާ އުސޫލްތައް ނޫން ކޮންމެ ފިކުރަކީ “ލާދީނީ” ނުވަތަ އިސްލާމްދީނާ ހިލާފު ފިކުރެއްގެ ގޮތުގައި ކަނޑައަޅައި އެކަމަށް ފާޑުކިޔުމެވެ. އަދި މީގެ އިތުރުން ވަކި ސިޔާސީ ލީޑަރަކަށް ވަކާލާތުކުރާ އެކްޓިވިސްޓުންނަށް އެހެން ހުރިހާ ލީޑަރުން ގޯހެވެ.

މި ހުރިހާ ވައްތަރެއްގެ އެކްޓިވިސްޓުންގެ ކިބައިން ވެސް ފާހަގަކުރެވޭ އެއް ސިފައަކީ ހާމައަށް ފެންނަން ހުންނަ ކަންތައްތަކުގައި ވެސް އެ ސަރުކާރެއް ނުވަތަ އެ ވެރިއަކު ދިފާއުކުރުމުގައި ހައްދުފަހަނައަޅާ ދިއުމެވެ. މި ފަހަކަށް އައިސް ސަރުކާރުގެ ތެރެއިން ފެންމަތިވި ކޮރަޕްޝަންގެ މައްސަލަތަކުގައި ވެސް ފެންނަން އޮތީ މިފަދަ މަންޒަރެކެވެ. ވެރިންގެ ދިފާއުގަ އާއި ސަރުކާރުގެ ދިފާއުގައި ސޯޝަލް މީޑިއާގައި މި ބުނާ އެކްޓިވިސްޓުން ނިދިފިޔައެއް ނުޖަހައެވެ. ބޮޑެތި ވައްކަންތައް ހާމަކަން ބޮޑު ގޮތެއްގައި ހިންގަމުންދާ އިރު އެކްޓިވިސްޓުންގެ ކަމަކަށް އޮތީ އެކަން ދިފާއުކޮށް ވާހަކަ ދެއްކުމެވެ. ނިމިގެންދިޔަ ސަރުކާރުތަކުގައި ވެސް ކިތަންމެ ބޮޑު ދޮގެއް ހެދިޔައް އަދި ވައުދުތައް ނުފުއްދުނަސް އެކްޓިވިސްޓުންގެ ކަމަކަށް އޮތީ ވެރިން ދިފާއުކުރުމެވެ. ސިޔާސީ ގޮތުން ލިބޭ ކުޑަ މަންފާއަކަށް ނުވަތަ ވަޒީފާއަކަށް، އެކްޓިވިސްޓުންނަށް އޮތީ، އަމިއްލަ ނަފުސަށް އޮޅުވާލައި، ދީނުގެ އަސާސްތައް ދޫކޮށް، ދޮގާއި މަކަރުގެތެރެއިން އެބަޔަކު ތާއީދުކުރާ ވެރިންގެ ވައްކަންތައް ދިފާއުކޮށް ޕްރޮމޯޓްކުރުމެވެ.

“އަމިއްލަ ހިޔާލު” ކެޓަގަރީގެ ދަށުން ޝާއިއުކުރެވޭ ލިޔުންތަކުގައި ހިމެނެނީ ލިޔުން ކޮންޓްރިބިއުޓް ކުރާ ފަރާތްތަކުގެ ހިޔާލެވެ. މި ލިޔުންތަކަކީ ކޮންމެހެން އެމްވީ ޕްލަސްގެ އެޑިޓޯރިއަލް ދައްކުވައިދޭ ލިޔުންތަކެއް ނޫނެވެ. އެމްވީ ޕްލަސްއަށް ލިޔުމެއް ހުށައަޅަން ބޭނުންނަމަ media@plus.mv އަށް އީމެއިލް ކުރެއްވުން އެދެމެވެ.