352 ގެސްޓްހައުސްއެއް އަލުން ހުޅުވައިފި

ރާއްޖޭގައި އޮޕަރޭޓްކުރާ 350 އަށްވުރެ ގެސްޓްހައުސް އަލުން ހުޅުވުމުގެ ހުއްދަ ޓޫރިޒަމް މިނިސްޓްރީން ދީފިއެވެ.

ޓޫރިޒަމް މިނިސްޓްރީގެ އެންމެ ފަހުގެ ތަފާސް ހިސާބުތައް ދައްކާގޮތުން މިދިޔަ އަހަރުގެ އޮކްޓޯބަރ މަހުގެ 15 ވަނަ ދުވަހުން ފެށިގެން މިމަހުގެ 18 ވަނަ ދުވަހުގެ ނިޔަލަށް ރާއްޖޭގައި އޮޕަރޭޓްކުރާ 352 ގެސްޓްހައުސްއެއް ވަނީ ހުޅުވުމުގެ ހުއްދަ ދީފައެވެ. މީގެތެރޭގައި ގްރޭޓަރ މާލެ ސަރަހައްދުގެ ގެސްޓްހައުސްތަކާއި އަތޮޅުތަކުގެ ގެސްޓްހައުސްތައްވެސް ހިމެނެއެވެ.

advertisement

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ގްރޭޓަރ މާލެ ސަރަހައްދުގެ 46 ގެސްޓްހައުސްއެއް ހުޅުވުމުގެ ހުއްދަ މިހާރު ވަނީ ދީފައެވެ. މިއާއެކު މާލެ ސަރަހައްދުގެ ގެސްޓްހައުސްތަކުގައި ފަތުރުވެރިންނަށް ޙިދުމަތްދޭ އެނދުގެ އަދަދު ވަނީ 1330 އަށް އަރާފައެވެ.

މާލެ ސަރަހައްދު ނުހިމަނައި ރާއްޖޭގެ 19 އަތޮޅެއްގެ 306 ގެސްޓްހައުސްއެއް މިހާރު ވަނީ ހުޅުވާފައެވެ.
ކޯވިޑް19 އަށްފަހު ގެސްޓްހައުސްތައް ބަންދުކޮށްފައި ހުރުމަށްފަހު އަތޮޅުތެރޭގެ ގެސްޓްހައުސްތައް ހުޅުވުމުގެ ހުއްދަ ޓޫރިޒަމް މިނިސްޓްރީން ދީފައިވަނީ މިދިޔަ އޮކްޓޯބަރުމަހުގެ 15 ވަނަ ދުވަހުއެވެ. އަދި މާލެ ސަރަހައްދުގެ ގެސްޓްހައުސްތައް ހުޅުވުމުގެ ހުއްދަ ދިނީ މިދިޔަ ޑިސެމްބަރުމަހުގެ 14 ވަނަ ދުވަހުއެވެ.

ކޮންމެ ރަށެއްގެ ގެސްޓްހައުސްއެއް ހުޅުވުމުގެ ކުރިންވެސް ވަކި ހާއްސަ އެސްއޯޕީއެއް، އެ ގެސްޓްހައުސްއަކުން ޓޫރިޒަމް މިނިސްޓްރީއަށް ހުށައަޅަންޖެހެއެވެ. ޓޫރިޒަމް މިނިސްޓްރީން ހުއްދަ ދެނީ މި އެސްއޯޕީތަކަށް ބެލުމަށްފަހުގައެވެ.