ކޯވިޑަށް ހުށައެޅޭ ޒުވާނުންގެ އަދަދު އިތުރުވާކަމުގެ ކަންބޮޑުވުން ފާޅުކޮށްފި

ރާއްޖޭގައި ކޯވިޑް-19އަށް ހުށައެޅޭ ޒުވާނުންގެ ޢަދަދު އިތުރުވުމުގެ ކަންބޮޑުވުން ހެލްތު އެމަޖެންސީ އޮޕަރޭޝަން ސެންޓަރުން ފާޅުކޮށްފިއެވެ.

ހެލްތު އެމަރޖެންސީ އޮޕްރޭޝަން ސެންޓަރ (އެޗްއީއޯސީ)އިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޑރ.ފާޠިމަތު ނަޒްލާ ރަފީޤް ވިދާޅުވީ ޒުވާނުންނަށް ބަލީގެ ނުރައްކަލެއް ނެތްކަމަށް ޤަބޫލުކުރެވިފައިވާ މަންޒަރު މިހާރު ފެންނަމުންދާކަމަށެވެ. ނަމަވެސް މިބަލީގެ ސަބަބުން އެޑްމިޓްކޮށްގެން ފަރުވާ ދޭންޖެހޭ ޒުވާނުންގެ ޢަދަދުވެސް އިތުރުވަމުން އަންނަކަމުގެ ކަންބޮޑުވުން އޭނާ ވަނީ ފާހަގަކުރައްވާފައެވެ. މިބަލީގެ ނުރައްކާ ކުޑަކަމަށް ޤަބޫލުކޮށް ޒުވާނުން ފަރުވާ ކުޑަނުކުރުމަށް އޭނާ ވަނީ އިލްތިމާސްކުރައްވާފައެވެ.

advertisement

“ބައެއް ޒުވާނުންނަށް ހީވާކަހަލަ މިބަލީގެ ނުރައްކާ ޒުވާނުންނަށް ނުކުރާކަމަށް. ބަލީގެ ސަބަބުން ޢަލާމާތް ނުފެންކަމަށް ޒުވާނުންގެ ތެރޭގައި. އެކަމަކު ރާއްޖޭގައިވެސް ބަލީގަ ބޮޑުވަރުވާ ޒުވާނުންގެ ޢަދަދު އިތުރުވަމުން އަންނައިރު އެޑްމިޓްކޮށްގެން ފަރުވާދޭންޖެހޭ ޒުވާނުންވެސް އިތުރުވަމުން އެބަދޭ.”ޑރ.ނަޒްލާ ވިދާޅުވިއެވެ.

ބަލިޖެހި ރަނގަޅުވާ މީހުންނަށްވެސް ގިނަ މައްސަލަތަކެއް ކުރިމަތިވަމުން އަންނަކަމަށް ނަޒްލާ ވިދާޅުވިއެވެ. އެގޮތުން ދިގުމުއްދަތަކަށް އެކި ކަހަލަ ސިއްޙީ މައްސަލަތައް ކުރިމަތިވަމުން އަންނައިރު އޭގެ ސަބަބުން ޢާއްމު ދިރިއުޅުމުގައިވެސް އެތައް ދަތިތަކާއި ކުރިމަތިލާންޖެހޭ މީހުން ފާހަގަވަމުން އަންނަކަމަށް އޭނާ ވިދާޅުވިއެވެ.

ވައި ބޭރުކުރުމަށް ޕްލާސްޓިކް ހުންނަ މާސްކުން ކޯވިޑް ވައިރަހުން ރައްކާތެރިކަން ކަށަވަރުކޮށްނުދޭކަމަށާއި އެފަދަ މާސްކް ބައެއް ފަރާތްތަކުން އަޅާކަން ޑރ.ނަޒްލާ ވިދާޅުވިއެވެ. މިއަހަރު ފެށުމާއިއެކު އަނެއްކާވެސް ރާއްޖޭގައި ކޯވިޑްގެ ކޭސްތައް ފެންނަ އަދަދުތައް އަންނަނީ އިތުރުވަމުންނެވެ. އެގޮތުން ވޭތުވެދިޔަ 24 ގަދިއިރުގެ ތެރޭގައިވެސް ރާއްޖޭގައި 157 މީހަކު ވަނީ ޕޮޒިޓިވް ވެފައެވެ. މިއާއިއެކު މިހާތަނަށް ރާއްޖެއިން ޖުމްލަ 18،769 މީހަކު ވަނީ ކޯވިޑަށް ޕޮޒިޓިވްވެފައެވެ. އަދި މި ބަލީގައި 60 މީހަކު ވަނީ ނިޔާވެފައެވެ.