ޕޮޒިޓިވްވެ ކުދި އަލާމާތްތައް ހުންނަ މީހުން ކުއްލިއަކަށް ހާލުދެރަވާކަން ފާހަގަވޭ – އެޗްއީއޯސީ

ކޮވިޑް-19އަށް ޕޮޒިޓިވްވެ ކުދި އަލާމާތްތައް ހުއްނަ މީހުން ކުއްލިއަކަށް ހާލު ދެރަވާކަން ފާހަގަކުރެވޭ ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) ބުނެފި އެވެ.

އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ކްލިނިކަލް މެނޭޖްމަންޓް އެޑްވައިޒަރީ ޓީމްގެ ފަރާތުން ޑރ. މޫސާ މުރާދު ވިދާޅުވީ، ކުދިކުދި އަލާމާތްތައް ހުންނަ މީހުންވެސް، ކުއްލިއަކަށް ހާލު ދެރަވާކަމަށާއި އެއީ ކަންބޮޑުވާ ކަމެއް ކަމަށެވެ.

advertisement

“ވަރަށް ގިނަ ފަހަރަށް އަޅުގަނޑުމެންނަށް ފާހަގަ ކުރެވޭ އެހާ ބޮޑެތި އަލާމާތްތަކެއް ފެންނަން ނެތް ކަމުގައި ވިޔަސް ކުއްލިއަކަށް ހާލު ދެރަވާ މީހުންވެސް ވަރަށް ގިނައިން އަޅުގަނޑުމެންނަށް އެބަ ފާހަގަ ކުރެވޭ. މިއީ ހަގީގަތުގައި ވަރަށް ކަންބޮޑުވާ ކަންތައްތަކެއް ސިއްހީ އެހީތެރިންގެ ނަޒަރުން ވިސްނާ އިރުގައި،” ޑރ. މުރާދު ވިދާޅުވި އެވެ.

ގޭގައި އައިސޮލޭޓުވާ ބަލި މީހުންވެސް ކުރިން ފާހަގަ ނުވާ ކަމެއް، ނުވަތަ ކުރިން ނެތް އަލާމާތެއް ކުއްލިއަކަށް ފެންނަނަމަ ވީހާވެސް އަވަހަށް އެޗްޕީއޭއަށް އަންގުމަށް ޑރ. މުރާދު ވަނީ އިލްތިމާސް ކުރައްވާފައެވެ.

ރާއްޖޭގައި ކޯވިޑް19 އަށް ޕޮޒިޓިވްވާ ޒުވާނުންގެ އަދަދު އިތުރުވުމުގެ ކަންބޮޑުވުންވެސް އެޗްއީއޯސީން ވަނީ ފާޅުކުރައްވާފައެވެ. ކުރިއާ އަޅާ ބަލާއިރު އެޑްމިޓްކޮށްގެން ފަރުދޭ މީހުންގެ ތެރޭގައި ޅަ އުމުރުގެ މީހުން މިހާރު ގިނަކަން އެޗްއީއޯސީން ފާހަގަ ކުރައްވައެވެ. ކޯވިޑްގައި އެޑްމިޓްކޮށްގެން ފަރުވާދޭންޖެހޭ މީހުންގެ އަދަދު އިތުރުވުމަކީ ސިއްހީ ނިޒާމަށް ބުރަބޮޑުވެގެންދާނެކަމެއްކަމަށްވާތީ އަދަދުތައް ދަށްކުރުމަށް އެންމެން އެހީތެރިވެދިނުމަށް އެޗްއީއޯސީން ވަނީ އެދިވަޑައިގަންނަވާފައެވެ. އޭގެތެރޭގައި ރައްކާތެރިކަމުގެ ފިޔަވަޅުތައް އެޅުން ހިމެނެއެވެ.