25 އަހަރުން މަތީގެ މީހުންނަށް ވެކްސިން ޖެހުމުގެ ފުރުސަތު ހުޅުވާލައިފި

އުމުރުން 25 އަހަރުން މަތީގެ މީހުން ވެކްސިން ޖެހުމަށް އެޗްޕީއޭއިން ހުޅުވާލައިފިއެވެ.
އެޗްޕީއޭއިން އަންނަނީ ވެކްސިން ޖެހުމަށް އިސްކަންދޭ ތަރުތީބުން އެކި އުމުރުފުރާގެ މީހުންނަށް ވެކްސިން ޖެހުމުގެ ފުރުސަތު ހުޅުވާލަމުންނެވެ. އެގޮތުން މި ހަފްތާގެ އާދިއްތަ ދުވަހުން ފެށިގެން ވަނީ 30 އަހަރުން މަތީގެ މީހުންނަށް ވެކްސިން ޖެހުމުގެ ފުރުސަތު ހުޅުވާލާފައެވެ. އަދި މިއަދުން ފެށިގެން އުމުރުން 25 އަހަރުން މަތީގެ މީހުންނަށް ވެކްސިން ޖެހުމުގެ ފުރުސަތު ހުޅުވާލާފައިވާކަމަށް އެޗްޕީއޭއިން ވިދާޅުވެއެވެ.
ޢުމުރުން 25 އަހަރުން މަތީގެ އުމުރުފުރާއަށް ވެކްސިން ޖެހުމަށް ހުޅުވާލިނަމަވެސް، ބޮޑެތި ބަލިތަކަށް ބޭސްފަރުވާކުރާ އުމުރުން 18އަހަރުން މަތީގެ އެންމެނަށްވެސް މިހާރުވެސް ވެކްސިން ޖެހޭނެއެވެ.

ރާއްޖޭގެ ކޯވިޑް19ގެ ތަފާސްހިސާބުތަކަށް ބަލާއިރު، ޒުވާނުންގެ މެދުގައި ބަލި ފެތުރޭ މިންވަރު އިތުރުވެފައިވާކަމަށް އެޗްޕީއޭއިން ވަނީ ހާމަކޮށްފައެވެ.
ރާއްޖޭގައި ކޯވިޑް ވެކްސިން ޖަހަންފަށާފައިވަނީ މިމަހުގެ 1 ވަނަ ދުވަހުއެވެ. ރާއްޖޭގައި ފުރަތަމަ ވެކްސިން ދޭންފެށީ ކޯވިޑް19އާ ގުޅިގެން ފްރަންޓްލައިންގައި މަސައްކަތްކުރާ މީހުންނަށެވެ. ނަމަވެސް ފަހުންވަނީ އުމުރުން ދުވަސްވީ މީހުންނާ، އަދި އަތޮޅުތަކުގައިވެސް ވެކްސިން ދިނުމުގެ މަސައްކަތް ފަށާފައެވެ. މިހާތަނަށް ރާއްޖޭގައި 85000އަށްވުރެ ގިނަ މީހުންވަނީ ވެކްސިން ޖަހާފައެވެ.

advertisement