އަމިއްލަ ހިޔާލު: އެކްސިޑެންޓުތަކުގައި ޓުއަރިސްޓުން މަރުވުން އާންމުވެ، ޓޫރިޒަމް އިންޑަސްޓްރީ ހާސްކަމެއްގެތެރެއަށް

ޓުއަރިސްޓުން ގެނބިގެން މަރުވުން ނުވަތަ ބުރަފަތީގައި ޖެހިގެން މީހުންނަށް އަނިޔާވުމާއި މަރުވުމުގެ ހާދިސާތައް އަބަދު ވެސް ހިނގައެވެ. ހާއްސަކޮށް މޫދަށް އެރި އުޅޭ ޓުއަރިސްޓުންނަށް މިފަދަ ހާދިސާތައް ދިމާވާ މިންވަރު އިތުރެވެ. މި ފަހަކަށް އައިސް މިފަދަ ހާދިސާތައް ވަނީ އިތުރުވެފައެވެ. މިދިޔަ މަހާއި މި މަހުގެ ވެސް ބުރަފަތީގައި ޖެހިގެން މީހުން މަރުވެފައި ވެއެވެ. މިފަދަ ކޮންމެ ހާދިސާއަކާ އެކު އިހްމާލުތަކުގެ ވާހަކަ ދެކެވެއެވެ. 

މިދިޔަ މަހު ހިނގި ހާދިސާއެއްގައި އދ. ދިގުރަށު ކައިރީގައި މޫދަށް އެރި އުޅުނު ސިންގަޕޫރުގެ ކުޑަކުއްޖަކު ގައިގައި ދޯންޏެއްގެ ބުރަފަތިން ޖެހި މަރުވެފައިވާ އިރު މި މަހުގެ 10 ވަނަ ދުވަހު އެ އަތޮޅު ރިސޯޓެއް ކައިރީގައި މޫދަށް އެރި އުޅުނު އިޓަލީގެ އުމުރުން 55 އަހަރުގެ މީހަކު ވަނީ މަރުވެފައެވެ. މީގެ އިތުރުން ގެނބިގެން މީހުން މަރުވުމުގެ ހާދިސާތައް މިދިޔަ އަހަރުގެ ތެރޭގައި ވެސް ހިނގާފައި ވެއެވެ. 

advertisement

މި ހާދިސާތަކާ އެކު ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ. ހާއްސަކޮށް ކަމާ ބެހޭ ފަރާތްތަކުން އެކަށީގެންވާ ގޮތެއްގައި މޮނީޓާނުކުރާކަން ފާހަގަކޮށް ކަނބޮޑުވުން ފާޅުކޮށްފައި ވެއެވެ. ސޯޝަލް މީޑިއާގައި ހިޔާލުފާޅުކުރި މީހަކު ބުނެފައި ވަނީ ރާއްޖޭގެ އިގްތިސާދު ޓުއަރިޒަމަށް ބިނާވެފައިވާ އިރު ޓުއަރިސްޓުންގެ ރައްކާތެރިކަމަށް އެކަށީގެންވާ ފިޔަވަޅުތައް އަޅާފައި ނެތް ކަމަށެވެ. އަދި ޓުއަރިސްޓުންގެ ރައްކާތެރިކަމަށް އަޅަންޖެހޭ ފިޔަވަޅުތައް އެޅުމަށް ގަވާއިދާ ގާނޫނުތަކުގައި ހިމަނާފައި ހުރި ނަމަވެސް އެކަންކަން ފުރިހަމަވެފައި ހުރިތޯ ކަމާ ބެހޭ ފަރާތްތަކުން ނުބަލާ ކަމަށް ވެސް އޭނާ ފާހަގަކޮށްފައި ވެއެވެ. 

ރައްކާތެރިކުރުމަށް ބޭނުންކުރެވިދާނެ ބައެއް އާލާތްތަކުގެ ފޮޓޯއާ އެކު އެކްސްގައި މީހަކު ކޮށްފައިވާ ޕޯސްޓެއްގައި ބުނެފައި ވަނީ ލައިސަންސް ނެތި ދުއްވާ އެތަކެއް ކައްޕިއެއް އުޅޭ ކަމަށާއި ސަލާމަތީ ކަންކަން ރަނގަޅު ނޫން އެތަކެއް އުނޅަދެއް އުޅޭ ކަމަށެވެ. ފުލުހުން ނުކުމެ އެއްގަމު އުޅަނދުފަހަރުގައި ސްޓިކާ ޖަހައި ބޮޑެތި އަދަދުތަކުން ޖޫރިމަނާ ކުރާ އިރު ކަނޑުމަތީގެ އުޅަނދުފަހަރު އެ ގޮތަށް މޮނިޓާނުކުރެވެނީ ކީއްވެތޯ އޭނާ ސުވާލުކޮށްފައި ވެއެވެ.

“އެއްގަމުގައި ޖޯޝުގައި ބޮޑެތި އަދަދުން ޖޫރިމަނާ ކުރާ ގޮތަށް ކަނޑުމަތިން ނުކުރެވެނީ ކީއްވެ. ޑައިވް ސައިޓްތަކުގައި ބަޔަކު އެރި ތިބީޔާ އެތަނުގައި ނިޝާން ހުރިތޯ ނެއްތޯ ބަލާނެ ފަރާތެއް ނެތް، އަދި ފަތުރު ވެރިންނާއި އެއްކޮށް އެރެނީ އެކްސްޕަޓުންތޯ ބަލާނެ ގޮތެއް ނޯވޭ،” އޭނާ ކޮށްފައިވާ ޕޯސްޓްގައި ވެއެވެ.

ޓުއަރިސްޓުންނަށް ހިދުމަތް ދޭ އުޅަނދުފަހަރުގައި ރައްކާތެރިކަމުގެ ފިޔަވަޅުތައް އެޅުމަށް ލާޒިމްކުރެއެވެ. އެކްސްކާޝަންގެ ހިދުމަތް ދޭ އުޅަނދުފަހަރުގައި ވެސް ހާދިސާއެއް ހިނގައިފި ނަމަ އަމަލުކުރާނެ އުސޫލްތަކެއް ހުރެއެވެ. އަދި ފުރަތަމަ އެހީ ދެވޭނެ އާލާތްތައް ވެސް ހުންނަންޖެހެއެވެ. އެހެން ނަމަވެސް މި ފިޔަވަޅުތައް ހުރީ ފުރިހަމަ ކޮށްފައިތޯ ބެލެނީ ކިހާ ވަރަކަށް ހެއްޔެވެ؟ ލޯކަލް ޓުއަރިޒަމް ފުޅާވެފައިވާ ހުޅުމާލެ އާއި ރާއްޖޭގެ އެހެން ރަށްރަށުގައި ވޯޓަ ސްޕޯޓްސް އާއި އެކްސްކާޝަންގެ ހިދުމަތް ދޭ އެތައް ބަޔަކު އެބަ އުޅެއެވެ. އެހެން ނަމަވެސް އެ ހިދުމަތް ދޭ ފަރާތްތަކުން ގެންގުޅޭ އުޅަނދުފަހަރުގައި ނަގާ ކިޔަން ތިބެނީ ބިދޭސީ މަސައްކަތްތެރިންނެވެ. އުޅަނދުގައި އުފުލާ މީހުންނަށް ހިދުމަތް ދިނުމަށް އެކަށީގެންވާ ވަރަށް މުވައްޒަފުން ނުތިބޭ ފަހަރު މަދެއް ނޫނެވެ. ލައިފްޖެކެޓާއި، އަނިޔާއެއް ވެއްޖެ ނަމަ ކުއްލި ފަރުވާ ދެވޭނެ ތަކެތި ދޯނީގައި ނެތި ދަތުކުރާ އެތައް އުޅަނދެއް އެބަ ހުއްޓެވެ. އެހެން ނަމަވެސް މިއިން ކަމެއް ރަނގަޅުކުރުމަށް ނުވަތަ ރަނގަޅަށް ހުރިތޯ ބަލަނީ ކޮން ބައެއް ހެއްޔެވެ؟ 

ރިސޯޓްތައް ޗެކް ކުރަން ޓުއަރިޒަމް މިނިސްޓްރީގެ ދޭތެރެ ދޭތެރެއިން ދަތުރުތައް ކުރިޔަސް އެކްސްކާޝަން އާއި ވޯޓާ ސްޕޯޓްސްގެ ހިދުމަތް ދޭ ތަންތަން މި ގޮތަށް މޮނީޓާކުރާނެ ބަޔަކު ނެތެވެ. އުޅަނދުފަހަރުގައި ސަލާމަތީ ކަންކަން ރަނގަޅަށް ހުރިތޯ ދޭތެރެ ދޭތެރެއިން ކޯސްޓް ގާޑުން ބެލި ނަމަވެސް ޓުއަރިސްޓުންނަށް ހިދުމަތް ދޭތީ ވަކި ހާއްސަ ގޮތަކަށް ބަލައި މޮނިޓައެއް ނުކުރެއެވެ. އެހެން ނަމަވެސް މިހާރު ހިނގަމުންދާ ހާދިސާތަކަށް ބަލާއިރު އެއީ ނުކޮށް ދޫކޮށްލާވަރުގެ ކަމެއް ނޫނެވެ. 

“އެކްސްކާޝަން އަށް ބޭނުން ކުރާ ދޯނި ލޯންޗު ފަހަރުގައި ފުލޯޓިން ސުޓްރެޗާ ހުރުން ބަޖުބޫރު ކުރަން ޖެހޭ، އަދި ޑައިވްތަކަށް ދާ އިރު ޑޮކުޓަރެއް ހުރުން މަޖުބޫރު ކުރުވަން ޖެހޭ ހިސާބަށް ކަންތައް މިއޮތީ ގޮއްސަ. ލޯންޗުފަހަރުގައި ޕުރޮޕް ގާރޑް އަޅުވަން މަޖުބޫރުކުރަންވެސް ލަސްވެއްޖެ،” އެކްސްގައި މީހަކު ކަންބޮޑުވުން ފާޅުކޮށްފައި ވެއެވެ. 

ކަނޑުމަތީގައި އެތަކެއް ބައިވަރު ނުރައްކާތެރި އެކުސިޑެންޓެއް ހިނގާ އެތަކެއް ބަޔަކު ނިޔާވެފައި ވާއިރު ސީރިއަސްކޮށް މިކަން ސަރުކާރު ތަކުން ނުނަގަނީ ކީއްވެ؟

ލައިސަންސް ނެތި ދުއްވާ އެތަކެއް ކައްޕިއެއް އުޅޭ، ސަލާަމަތީ ކަންކަން ރަނގަޅު ނޫން އެތަކެއް އުނޅަދެއް އުޅޭ. އެއްގަމުގައި… https://t.co/ApOQAnan9d pic.twitter.com/xlQhCfLnbG— Pohthu™ (@Pohthu) January 10, 2025

އޭނާ ވަނީ ބާ އަތޮޅު ހަނިފަރު ފަޅުގައި ފިހުރިހި ބެލުމަށް ޓުއަރިސްޓުން ހަރަކާތްތެރިވާ މަންޒަރު ހިމެނޭ ވީޑިއޯއަކާ އެކު ވެސް ކަންބޮޑުވުން ފާޅުކޮށްފައެވެ. އެއީ ވެސް ބަލަން އުނދަގޫ މަންޒަރުތައް ހިމެނޭ ވީޑިއޯތަކެކެވެ. އެތައް ބައިވަރު ޓުއަރިސްޓުން އެއް ތަނަކަށް ފީނަމުންދާ އިރު ވަށައިގެން އުޅަނދުފަހަރުތައް ދުއްވަމުން ދަނީ ނުރައްކާތެރި ގޮތަށެވެ. އަދި ޓުއަރިސްޓެއްގެ ގައިގާ ލޯންޗުން ޖެހޭ މަންޒަރު ވެސް އެ ވީޑިއޯ އިން ފެނެއެވެ. ބޮޑު އަގު ދީގެން ނޫނީ ނުވަދެވޭ މި ސަރަހައްދުގައި ވެސް ކަން ހިނގަމުން ދަނީ ރަނގަޅަށް ނޫންކަން އެ ވީޑިއޯތަކުން ވެސް އެނގެއެވެ. 

“ބޮޑު އަގުތަށް ނަގައިގެން ފެހުރިހި އާއި މަންތާ ދައްކަން އެތަކެއް ޓުއަރިސްޓުންއެއް ގެންދަނީ އެއްވެސް ކަހަލަ ޒިންމާއެއް ބޮލުގައި އަޅައިގެން ތިބެ އެއް ނޫން. މިއީ ހުއްޓުވަން ވެއްޖެކަމެއް. ކަމުގެ ތަޖުރިބާ ނެތި ބޭނުންހާ ގޮތަކަށް ކުރަން ވީމާ އެތަކެއް ހިތާމަވެރި ހާދިސާއެއް ހިގާނެ. ރެގިއުލޭޓް ނުކުރެވެންޔާ މިކަން ހުއްޓުވާ، ޓުއަރިސްޓުން ރާއްޖެ އަންނަނީ ދިވެހިންގެ އިހުމާލުން އާއިލާއާއި ވަކި ވާކަށް ނޫން،” 

ބޮޑު އަގުތަށް ނަގައިގެން ފެހުރިހި އާއި މަންތާ ދައްކަން އެތަކެއް ޓުއަރިސްޓުންއެއް ގެންދަނީ އެއްވެސް ކަހަލަ ޒިންމާއެއް ބޮލުގައި އަޅައިގެން ތިބެ އެއް ނޫން. މިއީ ހުއްޓުވަން ވެއްޖެކަމެއް. ކަމުގެ ތަޖުރިބާ ނެތި ބޭނުންހާ ގޮތަކަށް ކުރަން ވީމާ އެތަކެއް ހިތާމަވެރި ހާދިސާއެއް ހިގާނެ.… https://t.co/PvYjPczrRU pic.twitter.com/WaXs2TCFrx— Pohthu™ (@Pohthu) January 11, 2025

އޭނާ ފާހަގަކުރިހެން ޓުއަރިސްޓުން ރާއްޖެ އަންނަނީ ހިތްހަމަޖެހުން ހޯދުމަށެވެ. އެ މީހުން ރާއްޖެ އަންނަނީ ދިވެހިންގެ މިފަދަ އިހްމާލުތަކުގެ ސަބަބުން ބޮޑެތި އަނިޔާތަކެއް ލިބޭކަށެއް ނޫނެވެ. އަދި ބައެއް މިފަދަ ހާދިސާތަކުގެ ސަބަބުން އާއިލާއާ ވަކިވާ ކަށެއް ނޫނެވެ. އަދި މިއީ އެޑްވެންޗަރަސް ސްޕޯޓްސް ފަދަ ކަމެއް ވެސް ނޫނެވެ. އުޅަނދުފަހަރުގައި ކަނޑުމައްޗަށް ނުކުމެ ސްނޯކްލިން ގިއަރާ އެކު މޫދަށް ފައިބަނީ އެ މީހުން ގޮވައިގެން ދާ އުޅަނދުފަހަރުގައި ތިބޭ މީހުންނަށް ބަރޯސާ ވެގެންނެވެ. 

އެހެން ނަމަވެސް ވިޔަފާރި އާއި ލިބޭ ފައިދާ އަށް އެކަނި ވިސްނައިގެން ދޫކޮށްލެވޭ ކަންކަމުގެ ސަބަބުންނާއި އިހްމާލުވުމުގެ ސަބަބުން ޓުއަރިސްޓުންނަށް ބޮޑެތި އަނިޔާތައް ލިބި އެ މީހުން މަރުވާ ނަމަ ރާއްޖޭގެ ޓުއަރިޒަމަށް އޭގެ ނޭދެވޭ އަސަރުކުރާނެއެވެ. ރާއްޖެ މިހިސާބަށް އައީ އަމާން ރައްކާތެރި ތަނެއްގެ ގޮތުގައެވެ. ދިވެހިންގެ ހިތްހެޔޮ މިޒާޖާއި ހިނިތުންވުން ދުނިޔެ އަށް މަޝްހޫރެވެ. އެހެން ނަމަވެސް ބޮޑު ފައިދާގެ ބޭނުމުގައި މިފަދަ ވިޔަފާރިތައް ބިދޭސީންގެ އަތް މައްޗަށް ދޫކޮށްލައި ވެރިން ހަމަ އެކަނި ޑޮލަރު ގުނަން ތިބޭ ނަމަ މި އިންޑަސްޓްރީ އިހް އޮތް ގޮތަށް ދެމިގެން ނުދާނެއެވެ. އަދި ކަމާ ބެހޭ އިދާރާތަކުން ބަލަންޖެހޭ ވަރަށް ނުބަލާ ނަމަ މުޅި އިންޑަސްޓްރީ ހަލާކުވެ ހިނގައިދާނެއެވެ.

“އަމިއްލަ ހިޔާލު” ކެޓަގަރީގެ ދަށުން ޝާއިއުކުރެވޭ ލިޔުންތަކުގައި ހިމެނެނީ ލިޔުން ކޮންޓްރިބިއުޓް ކުރާ ފަރާތްތަކުގެ ހިޔާލެވެ. މި ލިޔުންތަކަކީ ކޮންމެހެން އެމްވީ ޕްލަސްގެ އެޑިޓޯރިއަލް ދައްކުވައިދޭ ލިޔުންތަކެއް ނޫނެވެ. އެމްވީ ޕްލަސްއަށް ލިޔުމެއް ހުށައަޅަން ބޭނުންނަމަ media@plus.mv އަށް އީމެއިލް ކުރެއްވުން އެދެމެވެ.