ޢާއްމު ޚިދުމަތްދޭ ތަންތަން އެޗްޕީއޭގެ މިންގަނޑަށް ފެތޭތޯ ބެލުމަށް 500 އަށްވުރެ ގިނަ ތަނެއް އިންސްޕެކްޓްކޮށްފި

ކޯވިޑް-19އިގެ ސަބަބުން ޢާއްމު ޚިދުމަތްދޭ ތަންތަން އެޗްޕީއޭގެ މިންގަނޑަށް ފެތޭތޯ ބެލުމަށްޓަކާ ކުރިއަށް ގެންދާ މާސް އިންސްޕެކްޝަންގައި 500 އަށްވުރެ ގިނަ ތަން ބަލައިފިއެވެ. މިއީ އެޗްޕީއޭއިން މާސް އިންސްޕެކްޝަން ކުރިއަށްގެންދާ ފަސްވަނަ ފަހަރެވެ.

އެޗްޕީޢޭގެ ގައިޑްލައިންނާ އެއްގޮތަށް ޚިދުމަތް ދޭތޯ ބެލުމަށްޓަކައި މާސް އިންސްޕެކްޝަން ފަށާފައިވަނީ މިމަހުގެ 3 ވަނަ ދުވަހުއެވެ. އެޗްޕީއޭއިން ބުނީ މިހާތަނަށް މި އިންސްޕެކްޝަންގައި މާލެއިން 568 ތަނެއް ބަލާފައިވާކަމަށެވެ.

advertisement

މާސް އިންސްޕެކްޝަންގައި މިހާތަނަށް ބެލި ތަންތަނުގެ ތެރޭގައި ހިމެނެނީ 344 ފިހާރައަކާއި، ކާބޯތަކެތީގެ ޚިދުމަތް ދޭ 198 ތަނަކާއި، 12 ޖިމްއަކާއި ސެލޫން ނުވަތަ ބޯކަށާ ތަންތަނުގެ ތެރެއިން 10 ތަނެއްގެ އިތުރުން 4 މާކެޓެކެވެ.

ހެލްތު އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި އިކޮނޮމިކް މިނިސްޓްރީގެ ޑެޕިއުޓީ މިނިސްޓަރު ހުސައިން ޒާމިރު ވިދާޅުވީ މިހާތަނަށް ބެލި ތަންތަނުގެ ތެރެއިން 243 ތަނެއް އެޗްޕީއޭގެ ގައިޑްލައިނާއި އެއްގޮތަށް ޚިދުމަތް ދެމުން ގެންދާކަން ފާހަގަވެފައިވާކަމަށެވެ. އަދި ފުރަތަމަ މަރުހަލާގައި 288 ތަނަކަށް ކަންކަން ރަނގަޅު ކުރުމަށް އެދި ވައިޓް ނޯޓިސް ފޮނުވާފައިވާކަމަށާއި ނޯޓިސްއަށްފަހު ދެވަނަ ފަހަރަށް ބެލިބެލުމުން 37 ތަނަކަށް ނޯޓިސް ދީފައިވާ ކަމަށް ހުސައިން ޒާމިރު ވިދާޅުވިއެވެ.

އެޗްޕީއޭއިން އެކުލަވާލާފައިވާ އުޞޫލާ ޚިލާފަށް ޚިދުމަތް ދޭނަމަ ފުރަތަމަ ފަހަރަށް 5000 ރުފިޔާ ދެވަނަ ފަހަރު 25000 ރުފިޔާގެ ޖޫރިމަނާއެއް ކުރާއިރު އެންގުމާ ޚިލާފުވެ ކަންކަން ރަނގަޅު ނުކުރާނަމަ، ތިންވަނަ ފަހަރަށް 50000 ރުފިޔާއިން ޖޫރިމަނާ ކުރާގޮތަށްވަނީ ހަމަޖައްސާފައެވެ. އަދި ހަތަރުވަނަ ފަހަރު ޖޫރިމަނާގެ ގޮތުގައި 75000 ރުފިޔާ ދައްކަންޖެހޭއިރު ފަސްވަނަ ފަހަރުގެ ޖޫރިމަނާއަކީ އެއްލައްކަ ރުފިޔާއެވެ.