ރައްކާތެރިކަން ކަށަވަރުކުރުމަށް ވިޔަފާރި ބަނދަރަށް ވަންނަ ފަރާތްތަކުން ތަމްރީނެއް ހަދަން ލާޒިމްކުރަނީ

މާލެ ވިޔަފާރި ބަނދަރުގެ ރައްކާތެރިކަން ވަރުގަދަ ކުރުމުގެ ގޮތުން، ބަނދަރަށް މަސައްކަތްކުރަން ވަންނަ ފަރާތްތަކުން ތަމްރީނެއް ހަދަން ލާޒިމް ކޮށްފި އެވެ.
މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ މެނޭޖިން ޑިރެކްޓަރު ޝާހިދު އަލީ ވިދާޅުވީ ބަނދަރު ފަރުމާވެފައިވާގޮތުން ބަނދަރު ތެރެއަށް އެމްޕީއެލްގެ މުވައްޒަފުން ނޫން އެހެން ގިނަ ބަޔަކު މަސައްކަތުން ވަންނަން ޖެހޭ ކަމަށެވެ. މި ފަހުން ބަނދަރުގައި ހިނގާފައިވާ ހާދިސާތަކުގައި ގެއްލުންވެފައިވަނީ މިގޮތަށް ބަނދަރަށް ވަދެ މަސައްކަތް ކުރާ އެމްޕީއެލް މުވައްޒަފުން ނޫން މީހުންނަށް ކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ، އަލަށް ފަށާ “އިންޑެކްޝަން ޕްރޮގްރާމް” ފުރިހަމަކޮށްގެން ނޫނީ ކުރިއަށް އޮތްތަނުގައި ބަނދަރަށް ނުވަދެވޭނެ ކަމަށެވެ. ކުރިއަށް އޮތް ހަ މަސް ތެރޭގައި ބަނދަރަށް ވަންނަން ފާސް ދޫކުރާނީ މި ތަމްރީން ފުރިހަމަ ކުރުމަށްފަހުގައިކަމަށް އެމްޕީއެލްއިން ބުނެއެވެ. މިއީ 6 ގަޑިއިރުގެ ތަމްރީން ޕްރޮގްރާމެކެވެ.

advertisement

މި ތަމްރީންގައި ބަނދަރުގައި ހިނގައިދާނެ ހާދިސާ ތަކަކީ ކޮބައިކަމާއި، ރައްކާތެރިކަމަށް އެޅިދާނެ ފިޔަވަޅު ތައް ކިޔަވައިދޭނެކަމަށް އެމްޕީއެލްއިން ވިދާޅުވެއެވެ. އަދި ސެޓްފިކެޓްދޭނީ ކުއިޒަކުން ފާސްވާ ފަރާތްތަކަށެވެ.

މާލޭ ވިޔަފާރި ބަނދަރަކީ ދޭތެރެދޭތެރެއިން ނުރައްކާތެރި ހާދިސާތައް ހިނގާ ސަރަހައްދެކެވެ. އަދި މިފަދަ ހާދިސާގައި ގިނަބައެއްގެ ފުރާނަވެސް ވަނީ ގެއްލިފައެވެ.