ރާއްޖޭގައި ޓޫރިޒަމާ ގުޅުންހުރި ދަތުރު ރާވައި ހިންގުމުގެ އައު ޤަވައިދު ގެޒެޓްކޮށްފި

ރާއްޖޭގައި ޓޫރިޒަމާ ގުޅުންހުރި ދަތުރު ރާވައި ހިންގުމުގެ ހިދުމަތްދިނުމާބެހޭ އާ ގަވާއިދެއް އެކުލަވާލާ، ގެޒެޓް ޝާއިއުކޮށްފި އެވެ. މި ޤަވައިދު ގެޒެޓްކޮށްފައިވަނީ ދިވެހި ވިޔަފާރިތަކަށް އިތުރު ފުރުސަތުތައް ލިބޭނެގޮތަށެވެ.

މި ގަވައިދަކީ ޓޫރިޒަމާބެހޭ ގާނޫނުގެ 32 ވަނަ މާއްދާ އާއި 33 ވަނަ މާއްދާގެ ދަށުން އެކުލަވާލި ގަވައިދެއް ކަމަށް ޓޫރިޒަމް މިނިސްޓްރީ އިން ވަނީ ބުނެފައެވެ.
އާ ގަވާއިދުގައިވާގޮތުން ދަތުރު ރާވައި ހިންގުމުގެ ހިދުމަތް ދިނުމުގެ ހުއްދަ ބޭރުގެ ފަރާތްތަކަށް ނުވަތަ ރާއްޖޭން ބޭރު ގައުމެއްގެ ރައްޔިތެއް ހިމެނޭ ކުންފުންޏަކަށް ނުދެވޭނެ ކަމަށް ވަނީ ބުނެފައެވެ.
ނަމަވެސް ރާއްޖެއިން ބޭރުގައި ރަޖިސްޓްރީ ކޮށްފައިވާ ޓްރެވަލް އެޖެންސީއެއް ނުވަތަ އޮންލައިން ޓްރެވަލް އޭޖެންސީއެއް ނުވަތަ ޓުއަރ އޮޕަރޭޓަރުންނަށް، އެފަދަ ތަންތަނުން ރާއްޖެ އަންނަ ޓޫރިސްޓުންގެ ކަންތައްތައް ބެލެހެއްޓުމަށްޓަކައި އެފަދަ ތަންތަނުގެ ރެޕްރެޒެންޓޭޓިވް އޮފީހެއް ރާއްޖޭގައި ރަޖިސްޓްރީކޮށްފައިވާ ޓްރެވަލް އޭޖެންސީއަކާ އެފިލިއޭޓް ވެގެން ރާއްޖޭގައި އޮފީހެއް ގާއިމުކުރެވިދާނެ ކަމަށް ވަނީ ބުނެފައެވެ. އަދި މިގޮތަށް އޮފީހެއް ހުޅުވާއިރު އެކަމަށްޓަކައި މިނިސްޓްރީ އޮފް ޓޫރިޒަމުން ހާއްސަ ހުއްދަ ނަގަންޖެހޭނެ ކަމަށް ގަވައިދު ބުނެފައިވެ އެވެ.
އައު ގަވާއިދުގެ ދަށުން ދަތުރު ރާވައި ހިންގުމުގެ ހިދުމަތްދޭ ތަނެއްގެ ގޮތުގައި އޮފީހެއް ހުރުމަކީ ލާޒިމްކަމެއް ނޫނެވެ. ނަމަވެސް ހިދުމަތްދޭ ފަރާތާއި ގުޅޭނެ ފޯނު ނަންބަރެއް އަދި އީމެއިލް އެޑްރެހެއް އޮންނަންވާނެ ކަމަށް ވަނީ ބުނެފައެވެ. އަދި، ކުންފުންޏެއް ނުވަތަ އެނޫންވެސް ވިޔަފާރި ޖަމާއަތެއްނަމަ، އެކުންފުނީގެ ނުވަތަ އެވިޔަފާރި ޖަމާއަތުން ކުއްލި ހާލަތުގައި ޖަވާބުދާރީވާނެ ފަރާތެއް އައްޔަންކޮށް އެފަރާތަކާ ގުޅޭނެ ނަންބަރާއި އަދި އީމެއިލް އެޑްރެހެއް އޮތުން ގަވައިދު ލާޒިމު ކުރެއެވެ.
މި ގަވައިދުގެ ދަށުން، ރަޖިސްޓަރީ ނުކުރާ ތަނެއް، ރަޖިސްޓަރީ ކުރި ތަނެއްގެ ގޮތުގައި އިސްތިހާރު ކުރުމާއި ވެބްސައިޓުގައި ނުވަތަ ޝާއިއުކުރާ ލިޔުންތަކުގައި ތެދު ނޫން މައުލޫމާތު ހިމެނުމާއި ހިދުމަތްތަކާ ގުޅޭގޮތުން ތެދު ނޫން މަޢުލޫމާތު އާންމުކުރުން އަދި މިނިސްޓްރީގައި ރަޖިސްޓަރީ ނުކުރާ އެއްވެސް ތަނެއްގައި ޓޫރިސްޓުން ބޭތިއްބުމަކީ މަނާކަމެކެވެ.
އަދި ދަތުރު ރާވައި ހިންގުމުގެ ހިދުމަތް ދޭ ތަނަކުން ދޭ ހިދުމަތުގެ ފެންވަރު ޓޫރިޒަމް މިނިސްޓްރީން ކަނޑައަޅާ މިންގަނޑުތަކަށްވުރެ ދަށްވެއްޖެނަމަ، އެ ތަނެއް އެއް މިލިއއަން ރުފިޔާއަށްވުރެ ބޮޑުނޫން އަދަދަކުން ޖޫރިމަނާ ކުރުމާއި،ކަމުގެ ކުޑަބޮޑުމިނަށް ބަލައި، އެ ތަނަކަށް ދޫކޮށްފައިވާ ހުއްދަ، އެ ކަމެއް އިސްލާހު ކުރަންދެން ހިފެހެއްޓުމުގެ އިޚްތިޔާރު މިނިސްޓްރީ އޮފް ޓޫރިޒަމަށް އެ ގަވައިދު ދަށުން ލިބެއެވެ.
އަލަށް ގެޒެޓްކުރެވުނު ޤަވާއިދުގައި ބުނާގޮތުން އެއަރޕޯޓު ރެޕުންގެ ގޮތުގައި ހަރަކާތްތެރިވާން ޖެހޭނީ އިނގިރޭސިބަހުން ރަނގަޅަށް ވާހަކަދައްކަން އެނގޭ ދިވެހީންނެވެ. އަދި އެއަރޕޯޓް ރެޕުންގެ ގޮތުގައި ބިދޭސީންނަށް ހަރަކާތްތެރިވެވޭނީ މިނިސްޓްރީގެ ހުއްދައާއެކުކަމަށްވެސް ޤަވާއިދުގައި ބުނެފައިވެއެވެ. މީގެއިތުރުން އެއަރޕޯޓުގައި ރެޕުން ހަރަކާތްތެރިވާން ޖެހޭނީ އެފަރާތެއް މަސައްކަތްކުރާ ތަން ތަމްޒުކޮށްދޭ ޙާއްސަ ޔުނީފޯމެއްގައިކަމަށްވެސް މިޤަވާއިދުގައި ބުނެއެވެ.
ރާއްޖޭގައި ހިނގާ ޓްރެވަލް އެޖެންސީތަކާއި ޓުއަރ އޮޕަރޭޓަރުންނަށް އިތުރު ފަސޭޙަތަކެއް ލިބިދޭ ގޮތަށް “ދިވެހިރާއްޖޭގައި ޓޫރިޒަމާއި ގުޅުންހުރި ދަތުރު ރަވައި، ހިންގުމުގެ ޚިދުމަތް ދިނުމާބެހޭ ޤަވާއިދު” ގެޒެޓްކޮށްފައިވާއިރު، ޓުއަރ އޮޕަރޭޓަރުންނާއި ޓުއަރ އެޖެންސީތަކަށް ޙާއްސަ ޤާނޫނެއް އެކުލަވާލުމުގެ މަސައްކަތްވެސް ސަރުކާރާއި ރައްޔިތުންގެ މަޖިލީހުން ދަނީ ކުރަމުންނެވެ.

advertisement