އައު ކެޓަގަރީތަކަކާއިއެކު ނޫސްވެރިކަމުގެ އިނާމަށް ކުރިމަތިލުމުގެ ފުރުސަތު ހުޅުވާލައިފި

މޯލްޑިވްސް މީޑިއާ ކައުންސިލް (އެމްއެމްސީ) އިންދޭ ނޫސްވެރިކަމުގެ އިނާމަށް ނަން ހުށަހެޅުމަށް ހުޅުވައިލައިފި އެވެ. އެމްއެމްސީން އަންނަނީ ކޮންމެ އަހަރަކުވެސް ނޫސްވެރިކަމުގެ އިނާމު ދެމުންނެވެ.

މިއަހަރުގެ އިނާމު ދިނުމަށް ހަމަޖެހިފައިވަނީ ކުރިން ނުދޭ 2 ކެޓަގަރީއެއްވެސް ހިމަނައިގެނެވެ. އޭގެ ތެރޭގައި ނިއުސް ގްރެފިކްސް އާއި އިލެސްޓްރޭޝަން އަދި އޯޑިއޯ ޖާނަލިޒަމްގެ ދާއިރާ ހިމެނެވެ. މިއާއިއެކު މިއަހަރު 12 ކެޓަގަރީއަކުން ނޫސްވެރިކަމުގެ އިނާމުދޭނެއެވެ. އިނާމަށް ނަން ހުށައެޅުމުގެ ފުރުސަތު މިމަހުގެ 16 ވާ އަންގާރަ ދުވަހުގެ މެންދުރުފަހު 2:00 ގެ ނިޔަލަށް އޮންނާނެއެވެ.

advertisement

މި އަހަރު ނޫސްވެރިކަމުގެ އިނާމު ދޭނެ ކެޓަގަރީތަކުގެ ތެރޭގައި ތަހުގީގީ ނޫސްވެރިކަން (އިންވެސްޓިގޭޓިވް ޖާރނަލިޒަމް)، ދެމެހެއްޓެނިވި ތަރައްގީ އާއި އިޖުތިމާއީ ދާއިރާ ސިޔާސީ ދާއިރާ، ޝަރުއީ އަދި ގާނޫނީ ދާއިރާ، ވިޔަފާރިއާއި އިގްތިޟާދީ ދާއިރާ، ކުޅިވަރުގެ ދާއިރާ، ފޮޓޯ ޖާރނަލިޒަމް، ވީޑިއޯ ޖާރނަލިޒަމް، އޯޑިއޯ ޖާރނަލިޒަމް، ނިއުސް ގްރެފިކްސް އާއި އިލެސްޓްރޭޝަންސްގެ ދާއިރާ، ފީޗާ / ރިޕޯޓްގެ ދާއިރާގެ އިތުރުން އެންމެ އުންމީދީ ނޫސްވެރިޔާއެވެ.

މިއަހަރު ކޮންމެ ނޫސްވެރިއަކަށް ވެސް އެ މީހަކު ކުރިމަތިލާން ބޭނުން ދާއިރާއަކަށް ކުރިމަތިލުމުގެ ފުރުސަތު އޮންނާނެކަމަށް އެމްއެމްސީން ބުނެއެވެ. މީގެ ކުރިން ފީޗާ ދާއިރާ ފިޔަވާ ދެން ކުރިމަތިލެވޭނީ އެންމެ ދާއިރާއަކަށެވެ.