18 އަހަރުން މަތީގެ މީހުންނަށް ވެކްސިން ޖަހަން ފަށައިފި

މިއަދުން ފެށިގެން މާލެ ސަރަހައްދުގައި ދިރިއުޅޭ އުމުރުން 18 އަހަރުން މަތީގެ މީހުންނަށް ވެކްސިން ޖެހޭގޮތަށް ހެލްތު ޕްރޮޓެކްޝަން އެޖެންސީ އެޗްޕީއޭއިން ހަމަޖައްސައިފިއެވެ.

ރާއްޖޭގައި ކޯވިޑް-19 ދިފާޢު ވެކްސިން ޕްރޮގްރާމް ފަށާފައިވަނީ މިދިޔަ މަހުގެ 1 ވަނަ ދުވަހުއެވެ. މިހާރު ވެކްސިން ޕްރޮގްރާމް ވަނީ މުޅި ރާއްޖެއަށް ފުޅާކޮށްފައެވެ. އެގޮތުން މިހާރު މާލެ ސަރަޙައްދުގެ 7 ސެންޓަރާއި، އަތޮޅުތަކުގެ 169 ސެންޓަރެއްގައި ވެކްސިން ޖެހުމުގެ ކަންކަން އަންނަނީ ކުރަމުންނެވެ.

advertisement

އެޗްޕީއޭއިން އަންނަނީ އިސްކަންދޭ ތަރުތީބުން އެކި އުމުރުފުރާތަކަށް ވެކްސިން ޖެހުމަށް ހުޅުވާލަމުންނެވެ. އެޗްޕީއޭއިން ވިދާޅުވީ، މާލެ ސަރަހައްދުގައި ދިރިއުޅޭ އުމުރުން 18 އަހަރުން މަތީގެ މީހުންނަށް މިއަދުން ފެށިގެން ވެކްސިން ޖަހަން ހުޅުވާލާނެކަމަށެވެ. މިއާއިއެކު މިހާރު މާލެ ސަރަހައްދުގައި ވެކްސިން ޖެހުމުގެ ހުއްދަ ދޫކޮށްފައިވާ އެންމެންނަށް ވަނީ ވެކްސިން ޖަހަންފަށާފައެވެ. އުމުރުން 18 އަހަރުން ދަށުގެ ކުދިންނަށާއި، މާބަނޑު މީހުންނަށް އަދި ވެކްސިން ޖެހުމުގެ ހުއްދައެއް ނުދެއެވެ.

މާލެ ސަރަހައްދުގައި 18 އަހަރުން މަތީގެ މީހުންނަށް ވެކްސިން ޖަހަން ހުޅުވާލިނަމަވެސް އަތޮޅުތެރޭގެ ރަށްރަށުގައި އަދި ވެކްސިން ޖަހަމުން އަންނަނީ އުމުރުން ދުވަސްވީ މީހުންނާއި، ހައިރިސްކް މީހުންގެ އިތުރުން ފްރަންޓްލައިންގައި މަސައްކަތްކުރާ މުވައްޒަފުންނަށެވެ.

ރާއްޖޭގައި ދޭން ފަށާފައިވަނީ އޮކްސްފޯޑް ޔުނިވަރސިޓީއާ އެސްޓްރާޒެނެކާގެ “ކޮވިޝީލްޑް” ވެކްސިންއެވެ. މި ވެކްސިން ރާއްޖެއަށް ހަދިޔާކޮށްފައިވަނީ އިންޑިއާ ސަރުކާރުންނެވެ. މީގެ 200000 ޑޯޒް މިހާތަނަށް އިންޑިއާއިން ރާއްޖެއަށް ހަދިޔާކޮށްފައިވެއެވެ. މިހާތަނަށް އައިއިރު ރާއްޖޭގެ މުޅި އާބާދީގެ %23 މީހުން މިވަނީ ކޯވިޑް-19އިގެ ފުރަތަމަ ޑޯޒް ވެކްސިން ޖަހާފައެވެ.