އެމްޓީސީސީގެ ވަޒީފާތަކަށް ދިވެހިން ހޯދަނީ، ވޯކްއިން އިންޓަވިއު މިއަދު ކުރިޔަށްދާނެ

މޯލްޑިވްސް ޓްރަންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ އެކި ޕްރޮޖެކްޓް ސައިޓްތަކުގައި މަސައްކަތް ކުރުމުގެ ފުރުސަތު ދިވެހިންނަށް ހުޅުވާލައިފިއެވެ. މިގޮތުން އެމްޓީސީސީން ވަނީ އެކުންފުނީގެ 254 ވަޒީފާއެއްގައި ދިވެހިން މަސައްކަތް ކުރުމަށް ފުރުސަތު ހުޅުވާލާފައެވެ.

މި ވަޒީފާތަކަށް ވަންނަން ބޭނުންވާ ދިވެހިންނަށް ވޯކްއިން އިންޓަވިއު މިއަދުން ފެށިގެން މިމަހުގެ 11 ވަނަ ދުވަހުގެ ނިޔަލަށް ކުރިއަށްދާނެކަމަށް އެމްޓީސީސީއިން ބުނެއެވެ. ވޯކްއިން އިންޓަވިއު ކުރިޔަށްދާނީ އެމްޓީސީސީ މާލޭގައި ހުންނަ ހުޅުމާލޭ ފެރީ ޓާމިނަލް، ފެންނަ ގިމަތައިގައި ކޮންމެ ދުވަހަކު މެންދުރުފަހު 2 ކުން ހަވީރު 5 ޖަހަންދެނެވެ. އެމްޓީސީސީއިން ފުރުސަތު ހުޅުވާލާ ވަޒީފާތަކުގެ ތެރޭގައި ހިމެނެނީ ހެވީ ވެހިލަކް އޮޕަރޭޓަރުން، ވެލްޑަރުން، ކާޕެންޓަރުން، މޭސަނުން، މެކޭނިކުން އަދި އިންޖީނިއަރުންގެ ވަޒީފާއެވެ. މި ވަޒީފާތަކަށް ޝައުޤުވެރިކަން ފާޅުކުރާ ފަރާތްތަކުގެ ތެރެއިން މަސައްކަތައް ހޮވާ ފަރާތްތަކަށް އެ ކުންފުނިން ވަޒީފާއާއި ގުޅުން ހުރި ފަންނީ ތަމްރީން ފަހިކޮށްދޭނެއެވެ. މި ވަޒީފާތަކުގެ އެންމެ ކުޑަ އުޖޫރައަކީ 10،000 ރުފިޔާކަމަށް އެމްޓީސީސީއިން މައުލޫމާތުދެއެވެ.

advertisement

އެމްޓީސީސީއަކީ ގިނަ އަދަދެއްގެ މަޝްރޫއުތައް ރާއްޖޭގެ އެކި ސަރަހައްދުތަކުގައި ހިންގާ ކުންފުންޏެކެވެ. މިވަގުތުވެސް ރާއްޖޭގެ އެކި ކަންކޮޅުތަކުގައި 50 މަޝްރޫއުއެއް ދަނީ ހިންގަމުންނެވެ. އަދި 21 މަޝްރޫއުއެއް ކުރިއަތްއޮތް ތަނުގައި ފެށޭނެކަމަށް އެ ކުންފުނިން ބުނެއެވެ.

އެމްޓީސީސީއަކީ ދިވެހި މުވައްޒަފުންގެ ނިސްބަތްވެސް ގިނަ ކުންފުންޏެކެވެ. ކުންފުނީގައި މިހާރު ވަޒީފާ އަދާކުރާ 2183 މުވައްޒަފުންގެ ތެރޭގައި ގިނައީ ދިވެހިންކަން އެމްޓީސީސީން ފާހަގަކުރެއެވެ.