ރާއްޖޭގައި ވެކްސިން ޖެހި މީހުންގެ އަދަދު 129،000 އިން މައްޗަށް

މިހާތަނަށް ރާއްޖޭގައި 129،424 މީހަކު ކޮވިޑް ވެކްސިންގެ ފުރަތަމަ ޑޯޒް ޖަހާފައިވާ ކަމަށް ހެލްތް އިމާޖަންސީ އޮޕަރޭޝަން ސެންޓަރު (އެޗްއީއޯސީ) އިން ބުނެފި އެވެ.
ފާއިތުވި 24 ގަޑިއިރުގެ ތެރޭގައި ރާއްޖޭގައި މުޅިން އަލަށް 5،759 މީހަކު ވަނީ ވެކްސިން ޖަހާފައެވެ. އެއީ މާލެ ސަރަހައްދުން ވެކްސިން ދިން 1،967 މީހަކާއި އަތޮޅުތަކުން ވެކްސިން ދިން 3،792 މީހެކެވެ.

މިހާތަނަށް މާލެ ސަރަހައްދުން 81،323 މީހަކަށް ވަނީ ކޮވިޑް ވެކްސިން ދީފައެވެ. އަދި އަތޮޅުތަކުން 48،101 މީހަކަށް ވެކްސިން ދީފައިވެއެވެ.

advertisement

މާލެ ސަރަހައްދުގައި ދިރިއުޅޭ އުމުރުން 18 އަހަރުން މަތީގެ އެންމެންނަށް ވެކްސިން ޖެހުމަށް އެޗްޕީއޭއިން މިހާރު ވަނީ ހުޅުވާލާފައެވެ. މާލޭގައި ވެކްސިން ޖެހުމުގެ ކަންކަން ކުރިއަށްގެންދަނީ އޭޑީކޭގެ އާއި ހުޅުމާލޭ ހޮސްޕިޓަލާއި ޓްރީޓޮޕް ހޮސްޕިޓަލާއި ވިލިމާލޭ ހޮސްޕިޓަލުގައެވެ. އަދި ސޯޝަލް ސެންޓަރާއި ހުޅުމާލެ ވެކްސިން ސެންޓަރުން ދަނީ ވެކްސިން ޖަހައިދެމުންނެވެ.
ރާއްޖޭގައި ޖަހަނީ އިންޑިއާއިން ހަދިޔާކޮށްފައިވާ ވެކްސިނެވެ. އެއީ އޮކްސްޕޯޑް-އެސްޓަރެޒެނިކާގެ ވެކްސިން ކޮވިޝީލްޑެވެ. ރާއްޖެއަށް އިންޑިއާއިން ވަނީ ކޮވިޝިލްޑްގެ 200،000 ޑޯޒް ހަދިޔާކޮށްފައެވެ. އަދި ސަރުކާރުން ވަނީ އިތުރު 700،000 ޑޯޒް ގަންނަން އެސްޓްރާޒެނެކާއާއެކު އެއްބަސްވުމެއް ވެސް ހަދާފަ އެވެ.