ރިޕޯޓް: މުޖްތަމައުގެ ހުރިހައި ދާއިރާއެއްގަވެސް އަންހެނުން ދަނީ ތަފާތު ދައްކަމުން!

މުޖްތަމައުގައި އަންހެނުންނާއި ފިރެނުންގެ ތަފާތު ކުރުންތަކުގެ ވާހަކައަކީ އަބަދުވެސް ދެކެވެމުންއަންނަ ވާހަކައެކެވެ. މިތަފާތުކުރުންތަކުގެ ސަބަބުން މުޖްތަމައުގައި އަންހެނުންނަށް ދީފައިވާ ދަރަޖަ ކުޑަ ޒަމާނެއްވެސް ދިޔައެވެ. އަންހެނުންނަކީ ވަކި ކަމެއް ނުކުރެވޭ ނުވަތަ ވަކި މަސައްކަތެއްކޮށްގެން ނުވާނެ ބަޔެއްކަމަށް ޤަބޫލު ކުރެވުނު ޒަމާނެއްވެސް ދިޔައެވެ. ނަމަވެސް މިއަދު މުޅި ދުނިޔޭގައިވެސް ފިރެހެނުންނާއި އެއްހަމައެއްގައި ހުރިހައި ދާއިރާއެއްގައިވެސް އަންހެނުން އަންނަނީ ފައިތިލަ ސާބިތުކުރަމުންނެވެ.

އަޅުގަނޑުމެންގެ ދިވެހި މުޖްތަމައުއަށް ބަލާލިނަމަވެސް ކުރިއާއި އަޅާބަލާއިރު އަންހެނުންނާއި ފިރެހެނުންގެ މެދުގައި ގެންގުޅޭ ތަފާތުކުރުންތައް މިއަދު ވަނީ ކުޑަވެފައެވެ. މުޖްތަމައުގެ ތެރޭގައާއި އާއިލާގެ ތެރޭގައިވެސް އަންހެނުންނާއި އަންހެން ކުދިންނާއި ދެމެދު ތަފާތު ކުރުންތަކެއް ކުރިން ވަނީ ގެންގުޅެފައެވެ. ނަމަވެސް މިހާރު މަޑުމަޑުން މިކަން ވަނީ ބަދަލްވާން ފަށާފައެވެ.

advertisement

އަންހެނުންނަށް ނުވާނެކަމަށް މީގެކުރިން ބުނި އެތަކެއް ދާއިރާއެއްގައި މަސައްކަތްކޮށް މުޖްތަމައުގައި އަންހެނުން އަންނަނީ ތަފާތު ދައްކައި އެއީވެސް އަންހެނުންނަށް ވާނެ ކަންތައްތައްކަން ސާބިތުކޮށްދެމުންނެވެ. މިއަދު އަޅުގަނޑުމެންގެ ތެރޭގައި އަންހެން ޕައިލެޓުން އެބަތިއްބެވެ. އަންހެން އިންޖީނިއަރުންނާއި، ކައްޕިންނާއި، އަންހެން ފަނޑިޔާރުންނާއި، އަންހެން ސިފައިންނާއި އެކި ކުޅިވަރުތަކުގައިވެސް މިއަދު ފިރެހެނުންނާއި އެއްހަމައެއްގައި ދިވެހި އަންހެނުން އަންނަނީ ވާދަކުރަމުންނެވެ.

މި ސަރުކާރުންވެސް އަންނަނީ އަންހެނުން ބާރުވެރިކުރުވުމަށް ގިނަ މަސައްކަތްތަކެއް ކުރައްވަމުންނެވެ. އެގޮތުން ސަރުކާރުގެ އެކި ދާއިރާތަކުގެ އިސްސަފުގައި ފިރެހެނުންނާއި އެއްހަމައެއްގައި ބައިވެރިވުމުގެ ފުރުސަތު އަންހެނުންނަށް ފަހިކޮށްދޭކަން ފާހަގަކޮށްލެވެއެވެ. އެގޮތުން ސިފައިންގެ ލަފާދޭ މަޖިލީހަށް އަންހެން ދެ އޮފިސަރަކު މިއަހަރު ވަނީ އައްޔަން ކުރައްވާފައެވެ. ކޯޓްތަކަށް އައްޔަންކުރި އަންހެން ފަނޑިޔާރުންގެ ނިސްބަތް މިދިޔަ އަހަރު ތިން އިންސައްތަވެސް ވަނީ އިތުރުވެފައެވެ.

ދިވެހި ސިފައިންގެ ތާރީޚުގައި ފުރަތަމަ ފަހަރަށް ލެފްޓެނެންޓް ކާނަލްގެ މަޤާމަށް 3 އަންހެން ސިފައިން ވަނީ ރޭންކްކޮށްފައެވެ. މި ސަރުކާރުން އެންމެ މަތީ ޝަރުއީ ކޯޓު ކަމުގައިވާ ސުޕްރީމް ކޯޓަށް ފުރަތަމަ ފަހަރަށް އަންހެން ފަނޑިޔާރުން ވަނީ އައްޔަންކުރައްވާފައެވެ. އަދި މިނިވަން މުއައްސަސާތަކުގެ ވެރިންގެ މަޤާމްތަކުގައި އަންހެނުން އިތުރުކަން ފާހަކަކުރެވެއެވެ. ރާއްޖޭގެ ލޯކަލް ކައުންސިލްތަކުގެ %33 ގޮނޑި، އަންހެނުންނަށް ޚާއްސަކޮށް ލާމަރުކަޒީ ޤާނޫނަށް އިސްލާޙު ގެނެސް، ކައުންސިލްތަކުގައި އަންހެނުންގެ ބައިވެރިވުންވެސް މި ސަރުކާރުން ވަނީ އިތުރުކޮށްފައެވެ.

ކޮންމެ އަހަރެއްގެވެސް މާރޗް މަހުގެ 8 ވަނަ ދުވަސް ފާހަގަކުރަނީ ބައިނަލްއަޤްވާމީ އަންހެނުންގެ ދުވަހުގެ ގޮތުގައެވެ. ބައިނަލްއަޤްވާމީ ފެންވަރުގައި އަންހެނުންނަށް ޙާއްސަކޮށް މިފަދަ ދުވަހެއް ފާހަގަކުރުމުގެ އެންމެ ބޮޑު ބޭނުމަކީ މުޖްތަމައުގައި އަންހެނުންނަށް ކުރާ ތަފާތުކުރުންތައް ނައްތާލައި، އެމީހުންނަށް ކުރިއަށްދިއުމުގެ ފުރުސަތުތައް ފަހިކޮށްދިނުމެވެ.

މިދިޔަ އަހަރުގެ އަންހެނުންގެ ދުވަހުގެ މުނާސަބަތުގައި ތަޙްނިޔާ ފޮނުވައި ކުރެއްވި ޓުވީޓެއްގައި ރައީސުލްޖުމްހޫރިއްޔާ ވިދާޅުވެފައިވަނީ އަންހެނުންނަށް ކުރިމަތިވެފައިވާ ގޮންޖެހުންތަކާއި ހުރަސްތައް ނައްތާލައި ހަމަހަމަ ދުނިޔެއެއް ޤާއިމު ކުރުމަށް މަސައްކަތް ކުރަން ޖެހޭކަމަށެވެ. މީގެއިތުރުން ރައީސް ވަނީ ވަޒީފާގެ ބާޒާރުގައި އަންހެނުންނަށް ހުރި ދަތިތައް ޙައްލުކޮށްދެއްވާނެކަމަށްވެސް ވިދާޅުވެފައެވެ.

އާއިލާގެ ތެރެއިންވެސް މީގެކުރިން ގިނަ އަންހެނުންނަށް ވަނީ ގޮންޖުހުންތަކަކާއި ކުރިމަތިލާން ޖެހިފައެވެ. އަންހެނުންނަކީ ވަޒީފާއަށް ނުގޮސް ގޭގައި ތިބެންޖެހޭ ބައެއްކަމަށް ބައެއް އާއިލާތަކުން ދެކުނެވެ. ނަމަވެސް މިއަދު ވަޒީފާގެ ބާޒާރުގައިވެސް ގިނައީ އަންހެނުންނެވެ. އަދި ކޮލެޖް ޔުނިވަރސިޓީތަކުގައި ކިޔަވަމުންދާ ގިނަ ދަރިވަރުންނަކީވެސް އަންހެނުންނެވެ.

މިހުރިހައި ކަމަކަށް ބަލާލިނަމަވެސް މިއަދު އަންހެނުންނަކީ މުޖްތަމައުގައި ފިރެހެނުންނާއި އެއްހަމައެއްގައި ފައިތިލަ ސާބިތުކުރެވޭނެ ބައެއްކަން ޔަޤީނެވެ. އަންހެނުންގެ ހިއްސާ ޤައުމުގެ ތަރައްޤީގައާއި ޤައުމު ބިނާކުރުމުގައި މުހިންމެވެ. އެމީހުންގެ ޙިޔާލާއި މަޝްވަރާ ޤައުމަށް ބޭނުންވެއެވެ. އަންހެނުންނަށް ވަކި ކަމެއް ނުވާނެކަމަށް ބުނި ޒަމާން މާޒީވެ ހިނގައްޖެއެވެ.