އަހަރުގެ މިހާތަނަށް 2 ލައްކައަށްވުރެ ގިނަ ފަތުރުވެރިން ރާއްޖެ އަތުވެއްޖެ

މިއަހަރުގެ މިހާތަނަށް ރާއްޖެއަށް 2 ލައްކައަށްވުރެ ގިނަ ފަތުރުވެރިން އައިސްފިއެވެ.

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިމަހުގެ 5 ވަނަ ދުވަހާއި ހަމައަށް ރާއްޖެއަށް ޖުމްލަ 204،528 ފަތުރުވެރިން ވަނީ އައިސްފައެވެ. މީގެތެރޭގައި ހިމެނެނީ ޖަނަވަރީ މަހު ރާއްޖެއައި 92،103 ފަތުރުވެރިންނާއި، ފެބްރުއަރީމަހު ރާއްޖެ އައި 96،882 ފަތުރުވެރިންނާއި މިމަހުގެ ފުރަތަމަ 5 ދުވަހު ރާއްޖެއައި 15،543 ފަތުރުވެރިންނެވެ.

advertisement

ބޯޑަރު ހުޅުލިފަހުން އެއްމަހެއްގައި އެންމެ ގިނަ އަދަދެއްގެ ފަތުރުވެރިން ރާއްޖެ އައިސްފައިވަނީ މިދިޔަ ފެބްރުއަރީ މަހުއެވެ. މިދިޔަ މަހު އެވްރެޖްކޮށް ދުވާލެއްގެ މައްޗަށް ރާއްޖެއަށް 3،460 ފަތުރުވެރިން ވަނީ އައިސްފައެވެ.

އަހަރުގެ މިހާތަނަށް އެންމެ ގިނަ އަދަދަކަށް ރާއްޖެއަށް ފަތުރުވެރިން އައިސްފައިވަނީ 46،541 ފަތުރުވެރިންނާއިއެކު އިންޑިއާއިންނެވެ. މިމުއްދަތުގައި 42،417 ފަތުރުވެރިންނާއި އެކު 2 ވަނައަށް އެންމެ ގިނަ ފަތުރުވެރިން އައީ ރަޝިޔާއިންނެވެ. އަދި 13،350 ފަތުރުވެރިންނާއިއެކު 3 ވަނައަށް އެންމެ ގިނަ ފަތުރުވެރިން އައިސްފައިވަނީ ޔޫކްރެއިންއެވެ.

ރާއްޖޭގައި ރަޖިސްޓްރީ ކޮށްފައިވާ ފަތުރުވެރިންނަށް ޙިދުމަތްދޭ ތަންތަނުގެ ތެރެއިން 663 ތަނެއް ދަނީ އޮޕަރޭޓްކުރަމުންނެވެ. އޭގެތެރޭގައި ހިމެނެނީ 148 ރިސޯޓާއި، 11 ހޮޓެލްއާއި، 140 ސަފާރީއާއި، 364 ގެސްޓްހައުސްއެވެ. މިއާއިއކެކު ފަތުރުވެރިންނަށް ޙިދުމަތްދޭ އެނދުގެ އަދަދު ވަނީ 45000 އިން މައްޗަށް އަރާފައެވެ.