ބީއެމްއެލްގެ ހިއްސާގެ ފައިދާ ހިއްސާދާރުންނަށް ބަހަން ފަށައިފި

މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ހުއްދަ ލިބުމާއެކު ބޭންކް އޮފް މޯލްޑިވްސްގެ ހިއްސާގެ ފައިދާ ބަހަން ފަށައިފި އެވެ.

ކުންފުނީގެ ފައިދާއިން ހިއްސާއަކަށް 26 ރުފިޔާ ބަހަން ފާސްކުރީ މިދިޔަ އޯގަސްޓު މަހުގެ ބޭއްވި އަހަރީ އާންމު ޖަލްސާގައެވެ. ކުންފުނީގެ ފައިދާއިން ހިއްސާދާރުންނަށް ޖުމްލަ 139،929،920 ރުފިޔާ ބަހަން ބީއެމްއެލްއިން ވަނީ ފާސްކޮށްފައެވެ.

advertisement

ހިއްސާގެ ފައިދާ ބެހުން ލަސްކޮށްފައިވަނީ ކޮވިޑްގެ ހާލަތާ ގުޅިގެން ބޭންކުތަކުގެ ލިކުއިޑިޓީއަށް އަސަރުކޮށްފާނެތީ ހިއްސާގެ ފައިދާ ބެހޭނީ އެމްއެމްއޭގެ ހުއްދަ ލިބިގެން ކަމަށް އެ އިދާރާއިން އަންގާފައިވާތީއެވެ. ބީއެމްއެލް އިން ބުނީ އެ ހުއްދަ އެމްއެމްއޭއިން ދީފައިވާތީ މިހާރު ހިއްސާގެ ފައިދާ ހިއްސާދާރުންނަށް ބަހަންފަށާފައިވާކަމަށެވެ. ހިއްސާގެ ފައިދާ އެކައުންޓަށް ޖަމާކުރަން އެދިފައިވާ ހިއްސާދާރުންގެ ފައިދާ މިހާރު އެމީހުންގެ އެކައުންޓްތަކަށް ޖަމާކޮށްދީފައިވާނެކަމަށް ބީއެމްއެލްއިން ބުނެއެވެ. ބީއެމްއެލްގެ 2019 ވަނަ އަހަރުގެ ހިއްސާގެ ފައިދާ ބަހަނީ 18 އޮގަސްޓް 2020 އާ ހަމައަށް ބޭންކުގެ ހިއްސާދާރުންގެ ރަޖިސްޓްރީގައި ހިމެނިފައިވާ ހިއްސާދާރުންނަށެވެ.