އިންޑިއާ ވިސާއަށް އޮންލައިންކޮށް އެދެވޭނެގޮތަށް ހަމަޖައްސައިފި

ދިވެހިންނަށް ލުއިފަސޭހަކޮށްދިނުމުގެ ގޮތުން އިންޑިއާ ވިސާ އޮންލައިންކޮށް އެދެވޭނެގޮތަށް ހަމަޖައްސައިފިއެވެ.
އިންޑިއާ ހައިކޮމިޝަނުން ވިދާޅުވީ ވިސާއަށް އެދުމުގައި ދިމާވާ ދަތިތައް ހައްލުކުރުމަށް އެޕޮއިންޓްމެންޓް ހެއްދުމުގެ ނިޒާމަށް މިމަހުގެ 7 ވަނަ ދުވަހުން ފެށިގެން ބަދަލުތަކެއް ގެނެސްފައިވާކަމަށެވެ. އެގޮތުން އޮންލައިންކޮށް ވިސާ އެޕްލިކޭޝަން ފޯމު ފުރުމަށްފަހު، އެޕޮއިންޓްމަންޓް ބުކް ކުރެވޭނެކަމަށް ހައިކޮމިޝަނުން ވިދާޅުވެއެވެ.

އިންޑިއާއަށް ދާ ދިވެހިންނަށް ވިސާ ހޯދުމުގައި ދިމާވާ މައްސަލައަށް ހައްލެއް ގެނައުމުގެ މަސައްކަތް ކުރަމުންދާކަމަށް މިދިޔަ މަހު ރާއްޖޭގައި ހުންނަ އިންޑިއާ ހައިކޮމިޝަނުން ވަނީ ވިދާޅުވެފައެވެ.

advertisement

މި ލިންކް މެދުވެރިކޮށް އިންޑިއާ ވިސާ އޮންލައިންކޮށް އެދެވޭނެއެވެ.(https://indianvisaonline.gov.in/visa/index.html) އޮންލައިންކޮށް ވިސާ ކާމިޔާބުކަމާއިއެކު ފުރިހަމަކުރެއްވުމުން އޮންލައިންކޮށް ވިސާ އެޕޮއިންޓްމަންޓް ހެއްދޭނެ އިންތިޒާމްވެސް އިންޑިއަން އެމްބަސީން މިހަރު ވަނީ ހަމަޖައްސާފައެވެ.

މި ބަދަލާއެކު ހޮޓްލައިން ނަންބަރު މެދުވެރިކޮށް އެޕޮއިންޓްމެންޓް ހެދުމަށް ހުޅުވާލާފައިވާއިރު، ހައިކޮމިޝަނުން ޓޯކަން ދޫކުރުންވެސް މިހާރު ވަނީ ހުއްޓަލާފައެވެ.