އެޗްޕީއޭ ގައިޑްލައިން އިސްލާހުކޮށް އިންތިހާބު ބޭއްވުމަށް ލުއިތަކެއް ދޭން ނިންމައިފި

ކުރިއަށް އޮތް ލޯކަލް ކައުންސިލްތަކުގެ އިންތިޚާބު ބޭއްވުމަށް އެޗްޕީއޭއިން ހަދާފައިވާ ގައިޑްލައިންގައި ހުރި މައްސަލަތައް އިޞްލާހުކޮށް އިންތިޚާބު ބޭއްވުމަށް ލުއިތަކެއް ދިނުމަށް ނިންމައިފިއެވެ.

އެޗްޕީއޭއިން އިންތިޚާބު ކުރިއަށް ގެންދާނެގޮތުގެ ގައިޑްލައިނެއް އެކުލަވާލާ އިލެކްޝަންސް ކޮމިޝަނަށް ކުރިން ވަނީ ފޮނުވާފައެވެ. ނަމަވެސް އެ ގައިޑްލައިނާއި އެއްގޮތަށް އިންތިޚާބު ކުރިއަށް ގެންދިއުމުގައި ބޮޑެތި ގޮންޖެހުންތަކެއް ހުރިކަން ފާހަގަކޮށް އިލެކްޝަންސް ކޮމިޝަނުން ވަނީ ރައްޔިތުންގެ މަޖިލީހާއި މިކަން ހިއްސާކުރައްވާފައެވެ.
އިންތިޚާބު ބޭއްވުމަށް ހުރި ގޮންޖެހުންތަކާއި ގުޅޭގޮތުން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީންވަނީ އިލެކްޝަންސް ކޮމިޝަންގެ މެންބަރުންނާއި، ޑިރެކްޓަރ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރާއި ބައްދަލުކުރައްވާފައެވެ.

advertisement

ކޮމިޓީ ބައްދަލުވުމުގައި އިލެކްޝަންސް ކޮމިޝަންގެ ރައީސް އަޙްމަދު ޝަރީފް ވިދާޅުވީ، އެޗްޕީއޭގެ ގައިޑްލައިންގައި ވަނީ ކޯވިޑް-19އާއި ގުޅޭ އާންމު އުސޫލްކަމަށާއި، ކޯވިޑްގެ ތެރޭގައި އިންތިޚާބު ބޭއްވި ދުނިޔޭގެ ހުރިހާ ޤައުމެއްގައިވެސް އިންތިޚާބު ބާއްވާފައިވަނީ ލުއިތަކެއް ދީގެންކަމަށެވެ. ޝަރީފް ވިދާޅުވީ އެޗްޕީއޭގެ ގައިޑްލައިންގައި ހިމަނާފައިވާ ކަންކަމުގެ ތެރެއިން އެންމެ ބޮޑު ގޮންޖެހުމަކީ، ކޯވިޑަށް ޕޮޒިޓިވް އަދި ކަރަންޓީގައި ތިބޭ މީހުންނަށްވެސް ވޯޓުލެވޭނެ އިންތިޒާމް ހަމަޖެއްސުންކަމަށެވެ. އެހެންކަމުން އިންތިޚާބު ބާއްވާ ދުވަހު ޕޮޒިޓިވް ވާމީހުންނަށްވެސް ވޯޓުލުމުގެ ފުރުޞަތު ދޭންޖެހޭކަން ޝަރީފް ފާހަގަކުރެއްވިއެވެ.

ކޮމިޓީގައި ވާހަކަ ދައްކަވަމުން ޑިރެކްޓަރ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ވަނީ އިލެކްޝަންސް ކޮމިޝަންގެ ކަންބޮޑުވުންތައް ޤަބޫލުކުރައްވާކަމަށް ވިދާޅުވެފައެވެ. ނަމަވެސް މައިމޫނާ ވަނީ ކޯވިޑް-19އިގެ ހާލަތަށް ބަލާ ލުއިތަކެއް ދިނުމަކީ އެކަމުގެ ރިސްކު ބޮޑުވާނެކަމެއްކަންވެސް ފާހަގަކުރައްވާފައެވެ. މައިމޫނާ ވިދާޅުވީ މިހާރުވެސް ރާއްޖޭގެ ހާލަތު އޮތީ ފިޔަވަޅުތައް އިތުރަށް ވަރުގަދަކުރަންޖެހޭ ޙާލަތުގައިކަމަށެވެ.