ހައުސިން ޔުނިޓްތަކުގެ ކެޓަގަރީތައް ފައިނަލްކުރުމުގެ ކުރިން އާންމުންގެ ހިޔާލު ހޯދާނެ – ރައީސް

ބޯހިޔާވަހިކަމުގެ މަޝްރޫޢުގެ ދަށުން ހައުސިންގ ޔުނިޓްތައް ދޫކުރުމަށް ކަނޑައަޅާ ކެޓަގަރީތަކާއި އުސޫލު ފައިނަލްކުރުމުގެ ކުރިން އާއްމުންގެ ޚިޔާލު ހޯއްދަވާނެ ކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިހު ވިދާޅުވެއްޖެއެވެ. ރައީސް މިހެން ވިދާޅުވީ، އެމްޑީޕީގެ ކެމްޕެއިން ހަރަކާތް “ރަށްވެހި ފަތިސް” ޕްރޮގްރާމްގައި ވާހަކަދައްކަވަމުންނެވެ.

“ރަށްވެހި ފަތިސް”ގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވީ ބޯހިޔާވެހިކަން ފޯރުކޮށްދޭ ކެޓަގަރީތައް ފައިނަލްކޮށް އެކަމުގެ އުސޫލުތައް ހަދާނީ ރައްޔިތުންނާއި މަޝްވަރާކޮށް، ޚިޔާލު ހިމަނައިގެންކަމަށެވެ. އަދި ސިޓީ ކައުންސިލާއި މަޖިލީހުގެ ޚިޔާލުވެސް މިކަމުގައި ހިމަނާނެކަމަށް ރައީސް ވިދާޅުވިއެވެ. ރައީސުލްޖުމްހޫރިއްޔާ ވިދާޅުވީ އެންމެ ދަށް އާމްދަނީ ލިބޭ އާއިލާތަކަށް ދޫކުރާ ކައުންސިލް ހައުސިންގ ޔުނިޓްތަކުގެ އަގު އުޅޭނީ 6000 ރުފިޔާގައި ކަމަށެވެ. ރައީސް ވިދާޅުވީ، ކުރީ ސަރުކާރުގެ ހައުސިންގ ސްކީމްގެ ޝަކުވާތައް ސަރުކާރާއި މަޖިލީހުންވެސް އަޑުއަހަމުންދާކަމަށެވެ.

advertisement

ހިޔާ މަޝްރޫޢުގެ މަސައްކަތްތައް އަދިވެސް ކުރިއަށްދިޔަނަމަވެސް، ސަރުކާރުން މިހާރުވަނީ ފްލެޓް ލިބޭ މީހުންގެ ދާއިމީ ލިސްޓް އިޢުލާންކޮށްފައެވެ. ނަމަވެސް ފްލެޓްތައް ދީފައިވާގޮތާއި ބެހޭ ގޮތުން އާންމުންގެ ގިނަ ޝަކުވާ ތަކެއްވަނީ މިފަދަ މައްސަލަ ބެލުމަށް ޤާއިމްކޮށްފައިވާ ފްލެޓްގެ މައްސަލަ ބަލާ ކޮމިޓަށް ހުށަހަޅާފައެވެ. އެކޮމިޓީއިން ބުނީ މިހާތަނަށް ބެލިބެލުމުން ހިޔާ ފްލެޓް ދިނުމުގައި މައްސަލަތައް އެބަހުރިން ފާހަގަވެފައިވާކަމަށެވެ. އެގޮތުން ކެޓަގަރީތަކަށް ނުފެތޭ މީހުން ތިބުމާއި، ފޯމްތައް ފުރުމާއި، މަޢުލޫމާތުގެ ސައްޙަކަން ކަށަވަރު ނުކުރެވިވާ މީހުންނަށްވެސް، ކުރީ ސަރުކާރުން ފްލެޓްދީފައިވާކަމުގެ ޝަކުވާތައް ފެންމަތިވެފައިވާ ކަމަށް ކޮމިޓީންވަނީ ހާމަކޮށްފައެވެ.