ހުޅުމާލޭ 2 ވަނަ ފިޔަވަހީ 2000 ހައުސިންގ ޔުނިޓް އެޅުމަށް އިންޑިއާ ކުންފުންޏަކާ ހަވާލްކޮށްފި

ސަރުކާރުގެ ބޯހިޔާވަހިކަމުގެ ސިޔާސަތުގެދަށުން ހުޅުމާލޭ 2ވަނަ ފިޔަވަހީ 2000 ހައުސިންގ ޔުނިޓް އެޅުމަށް “ފަހި ދިރިއުޅުން ކޯޕަރޭޝަން ލިމިޓެޑް އަދި އިންޑިއާގެ ކުންފުންޏެއްކަމަށްވާ “ޖޭއެމްސީ ޕްރޮޖެކްޓްސް” ލިމިޓެޑްއާއެކު އެއްބަސްވުމުގައި ސޮއިކޮށްފިއެވެ.

ފަހި ދިރިއުޅުން ކޯރޕަރޭޝަންގައި ބޭއްވި ރަސްމިއްޔާރުގައި އެކުންފުނީގެ ފަރާތުން މިއެއްބަސްވުމުގައި ސޮއިކުރެއްވީ ކުންފުނީގެ މެނޭޖިންގ ޑިރެކްޓަރ ސަލްފިއްޔާ އަންވަރުއެވެ. އަދި ޖޭއެމްސީ ޕްރޮޖެކްޓްސް ލިމިޓެޑްގެ ފަރާތުން ސޮއިކުރެއްވީ ކުންފުނީގެ އެސިސްޓަންޓް ވައިސް ޕްރެޒިޑެންޓް ކައްރި ސުދާކަރަ ރެޑީއެވެ.

advertisement

މި މަޝްރޫއުގެ ދަށުން 3 ކޮޓަރިއާއި 3 ފާހަނާގެ 1400 ޔުނިޓާއި، 2 ކޮޓަރިއާއި 2 ފާހަނާގެ 600 ޔުނިޓު އިމާރާތްކުރާނެއެވެ. މަޝްރޫއުގެ ޖުމްލަ ހަރަދު 137 މިލިއަން ޑޮލަރަށްވުރެ ބޮޑު ނުވާނެކަމަށް ލަފާކުރެވެއެވެ. މި މަޝްރޫއުއާއިގުޅޭ “ފައިނެންޝިއަލް ކްލޯޝާ” ވަރަށް އަވަހަށް ނިމި އަވަސް މުއްދަތެއްގެ ތެރޭގައި އިމާރާތްކުރުމުގެ މަސައްކަތް ފެށޭނެކަމަށް ޖޭއެމްސީން ބުނެއެވެ.

ޖޭއެމްސީ ޕްރޮޖެކްޓް އިންޑިއާ ލިމިޓެޑްއަކީ ސިވިލް ކޮންސްޓްރަކްޝަން އަދި އިންފްރާސްޓްރަކްޗަރ އީޕީސީ ކުންފުނިތަކުގެ ތެރޭގައި އެންމެ ކާމިޔާބު އެއް ކުންފުންޏެވެ. ކޮންސްޓްރަކްޝަންގެ ދާއިރާގައި 30 އަހަރުގެ ތަޖުރިބާ ލިބިފައިވާ ޖޭއެމްސީއަކީ ބިލްޑިންގ، ޓްރާންސްޕޯޓޭޝަން، ފެން، އިންޑަސްޓްރިއަލް އަދި ރަށްފުށިގެ ތަރައްޤީއާއިގުޅޭ ކޮންސްޓްރަކްޝަން މަޝްރޫއުތަކަށް ޝައުގުވެރިކަން ހުންނަ ސްޕެޝަލައިޒްޑް ކުންފުންޏެކެވެ.

އެއްވެސް ބަޔަކު ބާކީ ނުވާނެހެން އަތްފޯރާ ފަށުގައި ބޯހިޔާވަހިކަން ފޯރުކޮށްދިނުމަކީ ރައީސް އިބްރާހިމް މުހައްމަދު ސާލިހްގެ ސަރުކާރުގެ އެންމެ މުހިންމު އެއް ވައުދެވެ.