ރަމަޟާންމަހު ވެކްސިން ޖަހާނީ ރޭގަނޑު

އަންނަ ރަމަޟާންމަހު ވެކްސިން ޖަހާނީ ރޭގަނޑުގެ ވަގުތުގައިކަމަށް ހެލްތް އިމަރޖެންސީ އޮޕަރޭޝަން ސެންޓަރުން ވިދާޅުވެއްޖެއެވެ.

އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި އެސެންޓަރުގެ ތަރުޖަމާން ޑރ. ނަޒްލާ ރަފީޤް ވިދާޅުވީ ރޯދަމަހު ވެކްސިންދިނުމުގެ ކަންކަން ކުރިއަށްދާނީ ރޭގަނޑުގެ ވަގުތުގައިކަމަށެވެ. ވެކްސިންދޭނެ ގަޑިތަކާއި ވެކްސީން ޖަހާނެތަންތަން ރޯދަމަސް ފެށެން ގާތްވުމުން ހާމަކުރަމުންދާނެކަމަށް އޭނާ ވިދާޅުވިއެވެ.

ކޯވިޑް-19އިން ދިފާއުވުމަށް ރާއްޖޭގައި މިހާތަނަށް 165،675މީހުން ވެކްސީން ޖަހާފައިވާއިރު، ވެކްސިން ޖެހުމުގެ ޚިދުމަތް މިހާރު ދެމުން މާލެ ސަރަހައްދުގެ 8 ސެންޓަރަކާއި އަތޮޅުތަކުން 169 ސެންޓަރަކުންދަނީ ފޯރުކޮށްދެމުންނެވެ. އަދި މާލޭ ސަރަޙައްދުގައި ވެކްސިން ދިނުމަށްޓަކައި 2 މޯބައިލް ޓީމްވެސް ހަރަކާތްތެރިވަމުންދެއެވެ.

ކޮވިޝީލްޑް ވެކްސިން ދިނުމުގެ ހުއްދަ އޮންނަ ހުރިހާ އުމުރުފުރާތަކަށް މިހާރު ވަނީ ރާއްޖޭގައި ވެކްސިން ދޭން ފަށާފައެވެ.