ހައި ރިސްކް 100 މީހަކު ވަނީ ފެސިލިޓީއަށްދާން ދެކޮޅުހަދާފައި – އެޗްއީއޯސީ

ކޮވިޑް19 އަށް ޕޮޒިޓިވެފައިވާ ހައި ރިސްކު 100 މީހަކު ފެސިލިޓީ އަށް ދާން ދެކޮޅު ހަދާފައިވާކަމަށް ހެލްތު އިމަޖެންސީ އޮޕަރޭޝަން ސެންޓަރުން ބުނެފި އެވެ.

އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި މޮނީޓަރިން ކްލަސްޓާގެ ފަރާތުން ސަނާ ސަލީމް ވިދާޅުވީ ކޮވިޑަށް ޕޮޒިޓިވް 1516 މީހަކު މިވަގުތު ހޯމް އައިސޮލޭޝަނުގައި އެބަތިބި ކަމަށެވެ. އޭގެ ތެރެއިން ހޯމް އައިސޮލޭޝަން ކްރައިޓީރިއާ އަށް ފިޓުވާ 1405 މީހުން ހިމެނޭ ކަމަށް އޭނާ ވިދާޅުވިއެވެ. ގޭގައި ތިބި ބައެއް މީހުންގެ ތެރޭގައި ހައިރިސްކު މީހުން ތިބިކަމަށާއި، މިދިޔަ 14 ދުވަށް ބަލާއިރު ހައިރިސްކު 100 މީހުން ފެސިލިޓީއަށްދާން ދެކޮޅުހަދާފައިވާކަމަށް އޭނާ ވިދާޅުވިއެވެ. ރޫޓިން ކޭސްތަކުގެ ތެރޭގައި އިމަޖެންސީ ހާލަތެއް ދިމާނުވި ނަމަވެސް ފެސިލިޓީ އަކަށް ދާން ބޭނުން ނުވާ 11 މީހަކު އެބަތިބިކަމަށް އޭނާ ވިދާޅުވިއެވެ.

advertisement

ގޭގައި ތިބޭ މީހުންނަށް ގުޅައި ހާލު އޮޅުންފިލުވުމުގެ މަސައްކަތް އެޗްއީއޯސީން އަންނަނީ ކުރަމުންނެވެ. ޕޮޒިޓިވް މީހުންގެ އިތުރުން ކޮންޓެކްޓުންގެ ގޮތުގައި ހޯމް ކަރަންޓީނުގައި ތިބޭ ކެއާ ޓެގް އެޅުވިފައި ތިބި މީހުންނަށްވެސް ގުޅައި ހާލު ބަލައެވެ. ކެއާ ޓެގް މީހުންނަކީ 65 އަހަރުން މަތީގެ މީހުންނާއި 10 އަހަރުން ދަށުގެ ކުޑަކުދިންނާއި ދާއިމީ ބައްޔަކަށް ބޭސް ފަރުވާ ކުރާމީހުންނެވެ.

މިވަގުތު ރާއްޖޭގައި ކޮވިޑް19ގެ އެކްޓިވް ކޭސްތަކުގެ އަދަދަކީ 2،535 އެވެ. އޭގެ ތެރެއިން 165 މީހަކު ތިބީ ހޮސްޕިޓަލުގައެވެ.