އީއައިބީގެ ކޮވިޑް ރިލީފް ލޯނަށް ހުށައެޅުމުގެ ފުރުސަތު އަލުން ހުޅުވާލައިފި

ބީއެމްއެލް އިން ޔޫރަޕިއަން އިންވެސްޓްމަންޓް ބޭންކް (އީއައިބީ)ގެ ކޮވިޑް ރިލީފް ލޯނަށް އެދި ފޯމު ހުށަހެޅުމުގެ ފުރުސަތު ދެވަނަ ފަހަރަށް ހުޅުވާލައިފި އެވެ.

ބީއެމްއެލްއިން ބުނީ އީއައިބީގެ ކޮވިޑް ރިލީފް ލޯނަށް އެދި ހުށައެޅުމަށް އަލުން ހުޅުވާލީ ފުރަތަމަ ބުރުގެ ފުރުސަތުގައި ހުށަހެޅި ފޯމުތައް އިވެލުއޭޓު ކުރުމަށް ފަހު ފަންޑުގައި އިތުރު ލޯން ދެވޭނެ މިންވަރަށް ފައިސާ ހުރުމުންކަމަށެވެ. މި ފަންޑަކީ ރާއްޖޭގެ ކުދި އަދި މެދު ފަންތީގެ ވިޔަފާރިތަކަށް ކޮވިޑް-19ގެ ސަބަބުން ދިމާވި ގެއްލުންތަކަށް އަރައިގަތުމަށް އީއައިބީން ތައާރަފު ކުރި ލޯނެކެވެ. އެގޮތުން، މިސްކީމްގެ ދަށުން އީއައިބީއިން ރާއްޖެއަސް ވަނީ 15.42 މިލިއަން ރުފިޔާ ދީފަ އެވެ.

advertisement

އަލުން ހުޅުވި ފުރުސަތުގެ ދަށުން މި މަހުގެ ނިޔަލަށް ފޯމު ހުށަހެޅޭނެ އެވެ. ލޯނަށް އެދި ހުށަހަޅާ ފޯމާއި އެހެނިހެން ލިޔެ ކިޔުންތައް ބީއެމްއެލްގެ ވެބްސައިޓު eibreliefloan@bml.com.mv އިން ޑައުންލޯޑު ކުރެވޭނެ އެވެ.

އީއައިބީގެ ލޯނަކީ ހަ ޕަސެންޓު އިންޓްރެސްޓް ރޭޓުގައި ދޫކުރާ ލޯނެކެވެ. އަދި ލޯނަށް އަނބުރާ ފައިސާ ދެއްކުމަށް ހަތަރު އަހަރާއި ހަތް އަހަރާ ދެމެދުގެ މުއްދަތެއް ލިބޭނެ އެވެ. ފުރަތަމަ ބުރުގައި ލޯނަށް އެދި ހުށަހެޅުމުގެ އެންމެ ފަހު ތާރީހުގެ ގޮތުގައި ކަޑައެޅީ މިދިޔަ އަހަރުގެ ޑިސެމްބަރު މަހުގެ 29 ގައެވެ.