ސައުތު އޭޝިއަން ޓްރެވެލް އެވޯޑްސްއަށް ނަން ހުށަހެޅުމުގެ ފުރުސަތު ހުޅުވާލައިފި

ސައުތު އޭޝިއަން ޓްރެވެލް އެވޯޑްސް، ސަޓާއަށް ނަން ހުށަހެޅުމުގެ ފުރުސަތު ހުޅުވާލައިފިއެވެ.
ސަޓާ އެވޯޑް އިންތިޒާމްކުރާ ހައިރައިޒުން ބުނީ މި އަހަރުގެ އެވޯޑަށް ނަން ހުށަހެޅުމުގެ ފުރުސަތު 52 ކެޓަގަރީއަކުން ހުޅުވާލާފައިވާ ކަމަށެވެ. މީގެތެރޭގައި ފަތުރުވެރިކަމުގެ ޙިދުމަތްދޭ ތަންތަނާއި، ބްރޭންޑްތަކާއި، ވިޒިޓާރސް ޗޮއިސް އެވޯޑަކާއި، ޙިދުމަތުގައި ފާހަގަކޮށްލެވޭ ފަރާތަކަށް ޙާއްސަ ކެޓަގަރީއެއް ހިމެނެއެވެ.

ހައިރައިޒުން ބުނީ އެވޯޑަށް ނަން ހުށައެޅުމުގެ ފުރުސަތު އަންނަމަހުގެ 10 ވަނަ ދުވަހާއި އޮންނާނެކަމަށެވެ. އަދި މި އެވޯޑަށް ނޮމިނޭޓްވުމަށް އެ ތަނުގެ ވެބްސައިޓް މެދުވެރިކޮށް ފޯމް ހުށައެޅޭނެކަމަށްވެސް ހައިރައިޒުން ބުނެއެވެ.

advertisement

ކޮންމެ އަހަރަކުވެސް ސަޓާ އެވޯޑަށް ދެކުނު އޭޝިއާގައި ހިމެނޭ، ބަންގްލަދޭޝް، ބޫޓާން، އިންޑިއާ، ނޭޕާލް، ރާއްޖެ، އަދި ސްރީލަންކާގެ ފަތުރުވެރިކަމުގެ ސިނާޢަތްތަކުގައި ހަރަކާތްތެރިވާ ފަރާތްތައް ކުރިމަތިލައެވެ. ސަޓާ އެވޯޑަކީ ދެކުނު އޭޝިޔާ ސަރަޙައްދުގައި ދޭ ފަތުރުވެރިކަމުގެ ދާއިރާގެ އެންމެ ޝަރަފުވެރި އެއް އެވޯޑެވެ.

ކޯވިޑާއި ގުޅިގެން މިދިޔަ އަހަރު ސަޓާ އެވޯޑު ހަފްލާ ބާއްވާފައިވަނީ ވާޗުއަލްކޮށެވެ.
މިއީ ސަޓާ އެވޯޑު ބާއްވާ 6 ވަނަ ފަހަރެވެ. ސަޓާ އެވޯޑްގެ ފުރަތަމަ ހަފްލާ 2016 ވަނަ އަހަރު ލަންކާގައި ބޭއްވިއިރު 2019 ވަނަ އަހަރުވެސް މި ހަފްލާ އޮތީ އެޤައުމުގައެވެ. 2017 ވަނައަހަރުގެ އެވޯޑް ނައިޓް ރާއްޖޭގައި ބޭއްވިއރު ޖެހިގެން އައި އަހަރު އެ ހަފްލާ އޮތީ އިންޑިއާގައެވެ. ކޮންމެ އަހަރަކުވެސް ސަޓާ އެވޯޑްގެ ގިނަ އެވޯޑްތަކެއް ރާއްޖެއަށް ލިބެއެވެ.