އަހަރުގެ މިހާތަނަށް ރާއްޖެއަށް 223،566 ފަތުރުވެރިން އައިސްފައިވޭ

މިއަހަރުގެ މިހާތަނަށް ރާއްޖެއައި ފަތުރުވެރިންގެ އަދަދު 223566 އަށް އަރައިފިއެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިއީ މިއަހަރުގެ މާރޗް މަހުގެ 11 ވަނަ ދުވަހާއި ހަމައަށް އައި ފަތުރުވެރިންގެ ޖުމްލަ އަދަދެވެ.

މީގެތެރޭގައި ހިމެނެނީ ޖަނަވަރީ މަހު ރާއްޖެއައި 92103 ފަތުރުވެރިންނާއި، ފެބްރުއަރީމަހު ރާއްޖެ އައި 96882 ފަތުރުވެރިންނާއި މިމަހުގެ ފުރަތަމަ 11 ދުވަހު ރާއްޖެއައި 34581 ފަތުރުވެރިންނެވެ.

advertisement

ލޮކްޑައުންއަށްފަހު ރާއްޖޭގެ ބޯޑަރު އަލުން ހުޅުވާލީ މިދިޔަ އަހަރުގެ ޖުލައި މަހުގެ ތެރޭގައެވެ. އެއަށްފަހު ރާއްޖޭގެ ފަތުރުވެރިކަން އަންނަނީ ރަނގަޅުވަމުންނެވެ. ބޯޑަރު ހުޅުލިފަހުން އެއްމަހެއްގައި އެންމެ ގިނަ އަދަދެއްގެ ފަތުރުވެރިން ރާއްޖެ އައިސްފައިވަނީވެސް މިދިޔަ މަހުއެވެ. މިދިޔަ މަހު އެވްރެޖްކޮށް ދުވާލެއްގެ މައްޗަށް ރާއްޖެއަށް 3460 ފަތުރުވެރިން ވަނީ އައިސްފައެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން އަހަރުގެ މިހާތަނަށް އެންމެ ގިނަ އަދަދަކަށް ރާއްޖެއަށް ފަތުރުވެރިން އައިސްފައި ވަނީ އިންޑިއާއިންނެވެ. މިއަހަރުގެ މިހާތަނަށް ރާއްޖެ އައި ފަތުރުވެރިންގެ %23.6 އަކީ އިންޑިއާ ފަތުރުވެރިންނެވެ. 2 ވަނައަށް އެންމެ ގިނަ ފަތުރުވެރިން އައީ ރަޝިއާއިންނެވެ. 3 ވަނައަށް އެންމެ ގިނަ ފަތުރުވެރިން އައީ ޔޫކްރެއިނުންނެވެ.

ރާއްޖޭގައި ފަތުރުވެރިންނަށް ޙިދުމަތްދޭ ތަންތަނުގެ ތެރެއިން 674 ތަނެއް ދަނީ އޮޕަރޭޓްކުރަމުންނެވެ. ފަތުރުވެރިންނަށް ޙިދުމަތްދޭ އެނދުގެ އަދަދު ވަނީ 45000 އިން މައްޗަށް އަރާފައެވެ.