މިދިޔަ އަހަރު ބީއެމްއެލްއިން 100 އަށްވުރެ ގިނަ ރަށަކަށް ވަނީ އެހީތެރިކަން ފޯރުކޮށްދީފައި

ބޭންކް އޮފް މޯލްޑިވްސް (ބީއެމްއެލް) ގެ އިޖުތިމާއީ ޒިންމާގެ ދަށުން މިދިޔަ އަހަރު 100 އަށް ވުރެ ގިނަ ރަށަށް އެހީވެފައިވާ ކަމަށް އެ ބޭންކުން ބުނެފިއެވެ.

ބީއެމްއެލް އިން މިދިޔަ އަހަރު ކުރި މުހިންމު މަސައްކަތްތަކާއި މުޖުތަމަ އަށް އެހީތެރިވުމަށް މާލީ ގޮތުން ވެދީފައިވާ އެހީތެރިކަމާ ގުޅޭ މައުލޫމާތު ހިމެނޭ “ސަސްޓެއިނަބިލިޓީ ރިޕޯޓް 2020” ގައިވާ ގޮތުން ޖަމިއްޔާތަކާއި އާންމު ފަރުދުންނަށް އަމާޒުކޮށް ބޭންކުން ހިންގި ޕްރޮޖެކްޓްތަކާއި ސްޕޮންސާޝިޕްތައް މެދުވެރިކޮށް މިދިޔަ އަހަރު 100 އަށްވުރެ ގިނަ ރަށަކަށް އެހީތެރިކަން ފޯރުކޮށްދީފައިވާކަމަށެވެ.

advertisement

މި ރިޕޯޓުގައި ބުނެފައިވާ ގޮތުގައި ކޮވިޑް-19އާ ގުޅިގެން މިދިޔަ އަހަރު އިޖުތިމާއީ ޒިންމާގެ ދަށުން ޕްރޮޖެކްޓްތައް ކުރިއަށް ގެންދަން ގިނަ ގޮންޖެހުންތަކެއް ވަނީ ކުރިމަތިވެފަ އެވެ. ނަމަވެސް މި ހާލަތުގައި ވެސް އެކި ރަށްރަށުގެ ޖަމިއްޔާތަކާއި އާއްމުންނަށް އަމާޒުކޮށްގެން ޕްރޮޖެކްޓުތަކާއި ސްޕޮންސާޝިޕް މެދުވެރިކޮށް ވަނީ އެހީތެރިކަން ފޯރުކޮށްދީފަ އެވެ.

ބޭންކުގެ ތަފާސްހިސާބުތައް ދައްކާގޮތުގައި މިދިޔަ އަހަރު “އަހަރެންގެ ބޭންކް ކޮމިއުނިޓީ ފަންޑު”ގެ ދަށުން އެއް މިލިއަން ރުފިޔާގެ 20 ޕްރޮޖެކްޓެއް ރާއްޖޭގެ އެކި ކަންކޮޅުތަކުގައި ވަނީ ހިންގައިފަ އެވެ. މީގެ ތެރޭގައި ސްކޫލްތަކަށް ބޭނުންވާ ސާމާނު ހޯދައި ދިނުމާއި، ލައިބްރަރީ ތަރައްގީ ކުރުމާއި، ޕާކު އަދި އައުޓް ޑޯ ޖިމް ހެދުމާއި ނޭޗާ ޕާކު ތަރައްގީ ކުރުމާއި، ސޯލާ ލައިޓް ހަރުކުރުމުގެ ޕްރޮޖެކްޓުތައް ހިމެނެ އެވެ.

ކޮވިޑް-19ގެ ސަބަބުން އެހީތެރިކަން ބޭނުންވެފައި ތިބި ކުދިންނަށް އެހީވުމުގެ ގޮތުން އާކް އެއިޑް ޕްރޮގްރާމަށް 150،000ރ. ބީއެމްއެލް އިން ވަނީ ހަދިޔާކޮށްފަ އެވެ. އަދި ހިނގާބިގާވެ އުޅެން ދަތި 65 މީހަކަށް ވީލް ޗެއާ ހަދިޔާ ކޮށްފައިވާއިރު ނުކުޅެދުންތެރިކަން ހުންނަ މީހުންގެ ދިރިއުޅުމުގެ ފެންވަރު ރަނގަޅު ކުރުމަށް 1.2 މިލިއަން ރުފިޔާ ވަނީ ހޭދަކޮށްފަ އެވެ.

ބީއެމްއެލް އިން ވަނީ އެ ބޭންކުގެ ހިދުމަތްތައް ފުޅާ ކުރުމަށް މިދިޔަ އަހަރު ނުވަ ރަށެއްގައި އަލަށް ސެލްފް ސާވިސް އޭޓީއެމް ސެންޓަރުތައް ގާއިމްކޮށްފަ އެވެ. އަދި ފަސް އޭޓީއެމެއް އަޕްގްރޭޑުކޮށް ކޭޝް އޭޖެންޓުންގެ ވިއުގަ ވެސް ވަނީ ފުޅާކޮށްފަ އެވެ.

ކޮވިޑް 19 ގެ ސަބަބުން ރާއްޖޭގެ އިގްތިސާދަށަށް އައިސްފައިވާ ހީނަރުކަމުގެ ސަބަބުންނާއި މި ހާލަތުން އަރައިގަނެވޭނެ މުއްދަތެއް އަދި އަންދާޒާ ކުރަން ދަތިވެފައިވީ ނަމަވެސް ބޭންކުން މިއަހަރު ތެރޭގައިވެސް ރާއްޖޭގެ ރައްޔިތުންނާއި މުޖުތަމައުގެ ލާބައާއި މަންފާއަށް ގިނަ މަސައްކަތްތަކެއް ކުރުމަށްވަނީ ނިންމާފަ އެވެ.