އިތުރު ހަފްތާއަކަށް ކެފޭ ރެސްޓޯރަންޓްތައް ބަންދުކުރަންޖެހޭގޮތަށް ކަނޑައަޅައިފި

މާލެ ސިޓީގެ ކާބޯތަކެތީގެ ހިދުމަތްދޭ ކެފޭ އަދި ރެސްޓޯރެންޓުތަކަށް އެޗްޕީއޭއިން އެޅި ފިޔަވަޅުތައް އިތުރު ހަފްތާއަކަށް އިތުރުކޮށްފިއެވެ. ކޮވިޑް19 ފެތުރުން ކޮންޓްރޯލް ކުރުމަށް ރޭގަނޑު 8:00އިން ފެށިގެން މާލެ ސިޓީގެ ކެފޭ އަދި ރެސްޓޯރަންޓުތައް އާންމުކޮށް ހުޅުވައިގެން ހިދުމަތް ދިނުން މަނާކުރީ މިދިޔަ މަހު 27 ގައެވެ. އެންމެ ފަހުން ހަފްތާއެއްގެ މުއްދަތަށް އެޅި އެ ފިޔަވަޅުތަކުގެ މުއްދަތު ހަމަވަނީ ރޭ 12:00އަށެވެ.

އެޗްޕީއޭއިން ބުނީ ކެފޭ ރެސްޓޯރަންޓްތައް ހުޅުވާފައި ބެހެއްޓޭ ވަގުތައް ގެނައި ބަދަލު އިތުރު ހަފްތާއަކަށް ދިގުދަންމާލާފައިވާކަމަށެވެ. އެހެންކަމުން ރޭގަނޑު 8:00 ން 10:30 އަށް މާލޭ ސިޓީގެ ކެފޭ ރެސްޓޯރަންޓުތަކުން ދެވޭނީ ޑެލިވަރީ އަދި ޓޭކް އަވޭގެ ހިދުމަތް އެކަނި އެވެ. މީގެ ތެރޭގައި މާލެ، ހުޅުމާލެ، ވިލިމާލެ، ތިލަފުށި، އަދި ގުޅީފަޅުގައި ހިންގާ ކެފޭ، ހޮޓާ، ރެސްޓޯރަންޓް ފަދަ، އާންމުންނަށް ކާބޯތަކެތީގެ ހިދުމަތް ދޭ އެންމެހާ ތަންތަން ހިމެނޭނެ އެވެ. އަދި ޓޭކް އަވޭއާއި ޑެލިވަރީގެ ހިދުމަތްތައް ވެސް 22:30 އިން ފެށިގެން ހުއްޓާލަން ޖެހޭނެ އެވެ.

advertisement

އެޗްއީއޯސީން މީގެކުރިން ބުނެފައި ވަނީ ގިނަ އަދަދެއްގެ ބަޔަކު ކެފޭ، ރެސްޓޯރަންޓުތަކަށް ގޮސް މާސްކް ނާޅައި ގިނަ ވަގުތު ވާހަކަދައްކަން ތިބޭކަން ފާހަގަވެފައިވާ ކަމަށެވެ.

ކޯވިޑް19 ފެތުރޭ މިންވަރު މިއަހަރު ފެށުމާއިއެކު މާލެ ސަރަހައްދުގައި ވަނީ ވަރަށް ބޮޑަށް އިތުރުވެފައެވެ. ރާއްޖެއިން ކޮވިޑަށް ޕޮޒިޓިވްވި ޖުމްލަ މީހުންގެ އަދަދު މިހާރު ވަނީ 21،476އަށް އަރާފައެވެ. ބަލިން ރަނގަޅުވި މީހުންގެ އަދަދަކީ، 18،967 އެވެ.