ކަސްޓަމްސް ބްރޯކަރ ކުންފުނިތަކުގެ ލައިސަންސްއަށް އޮންލައިންކޮށް އެދެވޭ ގޮތައް ހަދައިފި

ކަސްޓަމްސް ބްރޯކަރ ކުންފުނިތަކުގެ ލައިސަންސް އާކުރުމަށް އޮންލައިންކޮށް އެދެވޭނެ އިންތިޒާމް އެއިދާރާއިން ހަމަޖައްސައިފިއެވެ.

ބްރޯކަރ ކުންފުނިތަކުގެ ލައިސަންސް މުއްދަތު ހަމަވެ، ލައިސަންސް އާނުކުރާ ފަރާތްތަކުގެ ޚިދުމަތް އަންނަ މަހުގެ 1 ވަނަ ދުވަހުން ފެށިގެން މެދުކެނޑޭނެކަމަށާއި އޭގެކުރިން ލައިސަންސް އައުކުރުމަށް ކަސްޓަމްސްއިން ވަނީ އެދިފައެވެ.

advertisement

ކަސްޓަމްސް ބްރޯކަރ ކުންފުނިތަކުގެ ލައިސަންސްގެ މުއްދަތަކީ ލައިސަންސް ދޫކުރި ތާރީޚުން ފެށިގެން 1 އަހަރެވެ. މިގޮތުން ލައިސަންސްގެ މުއްދަތު ހަމަވުމުން، ލައިސަންސް އާކުރުމަށް އެދި ކަސްޓަމްސް އަށް އެޕްލިކޭޝަން ހުށަހަޅަން ޖެހެއެވެ.

މޯލްޑިވްސް ކަސްޓަމްސް ސަރވިސްއިން ވިދާޅުވީ، ކަސްޓަމްސް ބްރޯކަރ ކުންފުނިތަކުގެ ލައިސަންސް އާކުރުމަށް އެޕްލިކޭޝަން ފޯމު ކަސްޓަމްސް އަށް ހުށަހެޅުމުގެ ބަދަލުގައި ކަސްޓަމްސް އީ-ޕޯޓަލް މެދުވެރިކޮށް، ވެރިފަރާތައް ލައިސަންސް އައުކުރެވޭގޮތަށް މިހާރު ހަމަޖައްސާފައިވާކަމަށެވެ. ޚިދުމަތް އަލުން ހޯދުމަށް ކަސްޓަމްސްގެ އީ- ޕޯޓަލް މެދުވެރިކޮށް ކުންފުނީގެ ލައިސަންސް ރިނިއުކޮށް، ޕޭމަންޓް ދެއްކެވުމުން އަލުން ޚިދުމަތް ލިބޭނެކަމަށް އެ އިދާރާއިން ވަނީ ބުނެފައެވެ. އަދި މިގޮތަށް ހަމަޖެހުމުން، ބްރޯކަރ ކުންފުނިތަކުގެ ލައިސަންސް މުއްދަތު ހަމަވުމުން މިއޮފީހުގެ “އަސިކުޑާ” ސިސްޓަމުން ޚިދުމަތް މެދުކެނޑޭނެއެވެ.

ކަސްޓަމްސްއިން ވިދާޅުވީ، އީ- ޕޯޓަލް މެދުވެރިކޮށް ލައިސަންސް އައުކުރި ކަމުގައި ވިއަސް އެކުންފުނީގައި އެވަގުތު މަސައްކަތްކުރަމުން ގެންދާ ބްރޯކަރުގެ މަޢުލޫމާތާއި، ބްރޯކަރު ވަޒީފާ އަދާކުރާކަމުގެ ލިޔުން އަދި ކުންފުނީގެ ޑައިރެކްޓަރުންގެ ބޯޑަށް ބަދަލެއް އައިސްފައިވާނަމަ، އެކަން އެނގޭނެ ލިޔުމެއް، ކަސްޓަމްސްގެ އީ-މެއިލްއަށް ފޮނުވަންޖެހޭނެކަމަށެވެ.