ސިރަމް އިންސްޓިޓިއުޓުން 3 ލައްކަ ޑޯޒްގެ ވެކްސިން ގެންނަނީ

ކޮވިޝީލްޑްގެ އިތުރު 300،000 ޑޯޒްގެ ވެކްސިން ރާއްޖެއަށް ހޯދުމަށްކަމަށް އިންޑިއާގެ ސިރަމް އިންސްޓިޓިއުޓާއެކު އެއްބަސްވެފައިވާކަމަށް ހެލްތް އެމްޖެންސީ އޮޕަރޭޝަން ސެންޓަރ (އެޗްއީއޯސީ)ގެ ތަރުޖަމާނު ޑރ.ނަޒްލާ ރަފީޤު ވިދާޅުވެއްޖެއެވެ.

އެޗްއީއޯސީގެ ނޫސްވެރިންގެ ބައްދަލުވުމުގައި ޑރ.ނަޒްލާ ވިދާޅުވީ މިހާތަނަށް ރާއްޖެއަށް 201،200 ޑޯޒްގެ ކޮވިޝީލްޑް ވެކްސިން ލިބިފައިވާކަމަށެވެ. އެއީ އިންޑިއާއިން ހަދިޔާކުރި 20،000 ޑޯޒްއާއި ކޯވެކްސް ފެސިލިޓީއިން ރާއްޖެއަށް ލިބުނު ކޮވިޝީލްޑްގެ 12،000 ޑޯޒްގެ ވެކްސިންއެވެ. މިހާރު ރާއްޖޭގައި ދެމުންދަނީ މި ވެކްސިންއެވެ.

advertisement

ނޫސްވެރިންގެ ބައްދަލުވުމުގައި ޑރ. ނަޒްލާ ވިދާޅުވީ، ފައިޒާ ވެކްސިންގެ 58،050 ޑޯޒް ހޯދަމުންދާކަމަށާއި އަދި އިންޑިއާގެ ސީރަމް އިންސްޓިއުޓުން ކޮވިޝީލްގެ އިތުރު 300،000 ޑޯޒް ގެނައުމަށްވެސް ރާއްޖެއިން އެއްބަސްވެފައިވާކަމަށެވެ.

ރާއްޖެއަށް ސައިނޯފާމްގެ 18،000 ޑޯޒްގެ ވެކްސިންވެސް ވަނީ ލިބިފައެވެ. މި ވެކްސިންއަށް ހުއްދަ ދިނުމުގައި ބަލަންޖެހޭ ކަންކަން ރާއްޖޭގެ ފުޑް އެންޑް ޑްރަގް އޮތޯރިޓީން މިހާރު އަންނަނީ ބަލަމުންނެވެ. ރާއްޖޭގެ އާބާދީއަށް ބޭނުންވާވަރަށް ވެކްސިން ހޯދުމުގެ މަސައްކަތް ކުރަމުންދާކަމަށް ސަރުކާރުން ވިދާޅުވެއެވެ. ޗައިނާއިން ރާއްޖެއަށް ހަދިޔާކުރާ 200،000 ޑޯޒްވެސް މިހާރު ވަނީ ރާއްޖެއަށް ލިބުމުގެ މަގުމަތީގައެވެ.