އިތުރު ވެކްސިން ލިބުމާއިއެކު ވެކްސިންގެ ފުރަތަމަ ޑޯޒް ނުޖެހިތިބި މީހުންނަށް ޖަހަން ފެށޭނެ

ކޮވިޑް19 އިން ރައްކާތެރިވުމަށް ޖަހާ ވެކްސިންގެ އިތުރު ޝިޕްމަންޓުތައް ލިބުމުން، ފުރަތަމަ ޑޯޒް ނުދެވި ތިބި މީހުންނަށް ވެކްސިން ދިނުމުގެ ކަންކަން ފަށާނެ ކަމަށް ހެލްތު އެމަޖެންސީ އޮޕަރޭޝަން ސެންޓަރުން ބުނެފި އެވެ.

ރާއްޖޭގައި ކޯވިޑް19 ރައްކާތެރިވުމަށް ވެކްސިން ޖެހުމުގެ ޤައުމީ ޕްރޮގްރާމް ފަށާފައިވަނީ މިދިޔަ ފެބްރުއަރީ މަހުގެ 1 ވަނަ ދުވަހުއެވެ. އަދި ވެކްސިންގެ ފުރަތަމަ ޑޯޒް ޖެހުން މިމަހުގެ 15 ވަނަ ދުވަހުގެ ނިޔަލަށް ކުރިޔަށް ގެންދާނެކަމަށް ހެލްތް މިނިސްޓަރ ވަނީ ވިދާޅުވެފައެވެ. އަދި 15 ވަނަ ދުވަހުން ފެށިގެން ފުރަތަމަ ޑޯޒް ފުރިހަމަ ކުރި މީހުންނަށް ދެވަނަ ޑޯޒް ދޭން ފަށާނެކަމަށް މިނިސްޓްރީއިން ބުނިއެވެ. މިކަމާއި ގުޅިގެން ވެކްސިން ނުޖަހާ ތިބި މީހުން ފުރަތަމަ ޑޯޒް ޖެހުމަށް ސެންޓަރުތަކަށް ވަނީ ދާންފަށާފައެވެ. އަދި މިކަމުގެ ސަބަބުން ސެންޓަރުތަކަށް ވަނީ ނުކަތާ ވަރަށް ބާރުބޮޑުވެފައެވެ. ވެކްސިން ސެންޓަރުތައް ހުޅުވުމުގެ މާކުރިން އެތަންތަން ކުރިމަތީގައި މީހުންނަށް ކިއު ދަމާލައެވެ.

advertisement

ރާއްޖޭގެ މުޅި އާބާދީއަށް ވެކްސިން ޖަހާނެކަން މީގެކުރިންވެސް ސަރުކާރުން ވަނީ ހާމަކޮށްފައެވެ. އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ސެންޓަރުގެ ތަރުޖަމާނު ޑރ. ނަޒްލާ ވިދާޅުވީ، ކޮވިޑް19 ގެ އިތުރު ވެކްސިން ރާއްޖެއަށް ލިބުމާއެކު، ފުރަތަމަ ޑޯޒް ނުދެވި ތިބި މީހުންނަށް ވެކްސިން ދިނުމުގެ ކަންކަން ފަށާނެ ކަމަށެވެ.

މިހާތަނަށް ރާއްޖެއަށް ގެނެސްފައި ވަނީ 212،000 ޑޯޒްގެ ވެކްސިން އެވެ. އެއީ އިންޑިއާއިން ހަދިޔާކުރި ކޮވިޝީލްޑްގެ ދެ ލައްކަ ޑޯޒް އާއި ކޮވެކްސް ފެސިލިޓީން ހަދިޔާކުރި 12،000 ޑޯޒް އެވެ.