ހާއްސަ ކެޓަގަރީތަކަށް ވެކްސިންގެ ފުރަތަމަ ޑޯޒް ޖަހަން ހޮނިހިރު ދުވަހު އަލުން ފަށާނެ

ކޯވިޑް-19 ވެކްސިންގެ ފުރަތަމަ ޑޯޒު ދިނުން މެދުކަނޑާލުމަށް ފަހު، ވެކްސިން ދޭންޖެހޭ ޚާއްސަ ކެޓަގަރީގެ މީހުންނަށް ފުރަތަމަ ޑޯޒު ދޭންފަށާނީ އަންނަ ހޮނިހިރު ދުވަހުން ފެށިގެންކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ހާމަކުރައްވައިފިއެވެ.

ކޯވިޑް ވެކްސިންގެ ފުރަތަމަ ޑޯޒު މާލެ ސަރަހައްދުގައި ދިނުން މެދުކަނޑާލާފައިވަނީ އިއްޔެއެވެ. މާލެ ސަރަހައްދުގައި ކޮވިޑް ވެކްސިންގެ ފުރަތަމަ ޑޯޒް ޖެހުން މިހާރު މެދުކަނޑާލާފައިވާއިރު މިހާތަނަށް ވެކްސިންގެ ފުރަތަމަ ޑޯޒް ނުޖަހާ ތިބި މީހުންނަށް ވެކްސިން ޖަހަން ފަށާނީ ވެކްސިންގެ ދެވަނަ ބުރު ޕްލޭންކުރުމަށް ފަހު ފައިނަލް ވުމުން ކަމަށް އެޗްއީއޯސީން ވަނީ ވިދާޅުވެފައެވެ. އެޗްއީއޯސީން ވިދާޅުވީ އާންމުންނަށް ވެކްސިންގެ ފުރަތަމަ ޑޯޒް ދިނުން މެދުކަނޑާލިނަމަވެސް ޚާއްސަ ކެޓަގަރީތަކުގައި ހިމެނޭ މީހުންނަށް މިމަހުގެ 20ވަނަ ދުވަހުން ފެށިގެން ވެކްސިން ޖަހަން އަލުން ފަށާނެކަމަށެވެ.

ޚާއްސަ ކެޓަގަރީގައި ހިމެނެނީ އުމުރުން ދުވަސްވީ މީހުން، ބޮޑެތި ބަލިތަކުގައި އުޅޭ މީހުން، ކޮވިޑަށް ޕޮޒިޓިވްވެ މިހާރު އެކަހެރިވެފައިވާ މީހުނެވެ. މީގެ އިތުރަށް ކޮންޓެކްޓަށްވެ ކަރަންޓީނުގައި ތިބި މީހުންނާއި ރާއްޖެއިން ބޭރުން ދަތުރުކުރުމަށް ފަހު ކަރަންޓީނުގައި ތިބި މީހުންނަށްވެސް މިމަހުގެ 20ގެ ފަހުން ވެކްސިން ޖެހޭނެ އިންތިޒާމް ވަނީ ހަމަޖައްސާފައެވެ. އަދި، މާލެއިން ދަތުރުކުރުމަށް ފަހު ކަރަންޓީނުގައި ތިބި މީހުންނާއި ބައްޔެއް ނުވަތަ ސިއްހީ ހާލަތެއްގެ ސަބަބުން ވެކްސިން ޖެހުން ލަސްކުރަން ޖެހުނު މީހުންންވެސް ވެކްސިން ދޭގޮތަށް ވަނީ ނިންމާފައެވެ.
ރާއްޖޭގައި މިހާތަނަށް ޖަހާފައިވަނީ ކޮވިޝިލްޑް ވެކްސިންނެވެ. ނަމަވެސް އިތުރު ދެ ވެކްސިންއެއް ރާއްޖޭގައި ބޭނުންކުރުމުގެ ހުއްދަ އިއްޔެ މޯލްޑިވްސް ފުޑް އެންޑް ޑްރަގް އޮތޯރިޓީން ވަނީ ދީފައެވެ. އެއީ ފައިޒާ ވެކްސިންއާއި ސިނޮފަރމް ވެކްސިންއެވެ.