ހުއްދަ ނެތި ކެމްޕެއިން މެޓީރިއަލް ހަރުކުރާނަމަ ޖޫރިމަނާކުރަނީ

މާލޭ ސިޓީ ކައުންސިލްގެ ހުއްދަ ނެތި މާލޭ ސިޓީގައި ކެމްޕެއިން މެޓީރިއަލް ހަރުކުރާ ނަމަ ޖޫރިމަނާ ކުރާނެ ކަމަށް އެ ކައުންސިލުން އިންޒާރުދީފިއެވެ.

މާލޭ ސިޓީ ކައުންސިލުން ކުރި އިއުލާނެއްގައި ބުނީ ކުރިއަށް އޮތް ލޯކަލް ކައުންސިލް އިންތިހާބުގައި ވާދަކުރާ ކެންޑިޑޭޓުންނަށް ފީ އަކާ ނުލައި މާލޭ ސިޓީގައި އިސްތިހާރު ހަރުކުރުން ފަދަ ކަންތަކަށް ހުއްދަ ދޭން ނިންމާފައިވާ ކަމަށެވެ.

advertisement

އިސްތިހާރު ހަރުކުރަން ހުއްދަ ދޭނެ އުސޫލެއް އެ ކައުންސިލުން އެކުލަވަލާފައިވާ އިރު، އެ އުސޫލާ ހިލާފަށް އަދި ހުއްދަ ނެތި އިސްތިހާރު ނުވަތަ ކެމްޕެއިން މެޓީރިއަލް އާންމު ތަންތާގައި ހަރުކޮށްފައި ބަހައްޓާ ކޮންމެ ދުވަހަކަށް 1،000 ރުފިޔާ އާއި 2،000 ރުފިޔާ އާ ދެމެދުގެ އަދަދަކުން ޖޫރިމަނާ ކުރާނެ ކަމަށްވެސް ސިޓީ ކައުންސިލުން ބުނެއެވެ. އަދި އިސްތިހާރު ނަގަން ޖެހޭ މުއްދަތު ހަމަވުމުން އިސްތިހާރު ނުނަގާ، ފާއިތުވާ ކޮންމެ ދުވަހަކަށް 2،000 ރުފިޔާ އިން ޖޫރިމަނާ ކުރާނެ ކަމަށް ވެސް ކައުންސިލުން ވަނީ ބުނެފައެވެ.

އިސްތިހާރު ހަރުކުރަން ހުއްދަ އަށް އެދޭ އިރު ކައުންސިލް އިންތިހާބުގައި ވާދަކުރާ ކެންޑިޑޭޓެއްކަން އަންގައިދިނުމަށް އިލެކްޝަންސް ކޮމިޝަނުން ދީފައިވާ ލިޔުން ހުށަހަޅަން ޖެހެ އެވެ. މީގެ އިތުރުން ހަރު ކުރަން ބޭނުންވާ އިސްތިހާރެއްގެ ހާޑް ކޮޕީ ކުލަކޮށް ހުށަހަޅަން ޖެހޭނެ ކަމަށާއި ދީނާ ގުޅުންހުރި ލިޔުމެއް ލިޔެފައިވާ އިސްތިހާރެއް ނަމަ، މިނިސްޓްރީ އޮފް އިސްލާމިކް އެފެއާޒް ހުއްދަ ނަގަން ޖެހޭނެ ކަމަށް ވެސް ބުނެފައިވެ އެވެ.