ބޭރު މީހުންނަށް ގެސްޓްހައުސް ވިޔަފާރިއަށް އިންވެސްޓްކުރެވޭގޮތައް ޤަވައިދު ހަދަނީ

ރާއްޖެއިން ބޭރުގެ މީހުންނަށް ގެސްޓްހައުސް ވިޔަފާރިއަށް އިންވެސްޓްކުރެވޭގޮތައް ޤަވައިދު ހަދަމުންދާކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ. ޓޫރިޒަމް މިނިސްޓަރ މިހެން ވިދާޅުވީ، މަޖިލީހުގެ މާލިއްޔަތު ކޮމެޓީގައި ވާހަކަދައްކަވަމުންނެވެ.

ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވީ”ޓޫރިޒަމް ޕްރޮޕަޓީތަކުގެ އޯނާޝިޕް” ދިވެހިންނަށް ލިބޭނެ ގޮތަށް ގަވައިދު ހަދަމުންދާ ކަމަށެވެ. މީގެ މައިގަނޑު ބޭނުމަކީ ރާއްޖެއަށް ވަންނަ ޑޮލަރު ބޭރުވުން ހުއްޓުވުންކަން މިނިސްޓަރ ފާހަގަކުރެއްވިއެވެ. މިނިސްޓަރ ވިދާޅުވީ، މި މަސައްކަތުގެ ދަށުން ދިވެހިންގެ 51 އިންސައްތަ ހިއްސާ އާއި ބިދޭސީންގެ 49 އިންސައްތަ ހިއްސާ އޮވެގެން ގެސްޓްހައުސް ތަކަށް ވެސް އިންވެސްޓަރުން ހޯދޭނެ ގޮތައް ޤަވައިދު ހަދަމުންދާކަމަށެވެ. އަދި މިއީ ދުނިޔޭގެ އެހެން ޤައުމުތަކުގައި ކާމިޔާބުކަމާއިއެކު ހިންގަމުންދާ މޮޑެލެއްކަމަށެވެ.
މިނިސްޓަރ ވިދާޅުވީ، މިގޮތައް ޤަވައިދު ބަދަލުކުރުމުގެ ސަބަބުން ބިދޭސީންނަށް އޯނަރޝިޕް ހޯދޭނީ 49 އިންސައްތައާއި ހަމައަށްކަމަށެވެ. އެއިރުން ދިވެހިންނަށް ލިބޭ ފުރުސަތުތައް އިތުރުވެގެންދާނެކަމަށެވެ.

advertisement

ގެސްޓްހައުސް ވިޔަފާރިއަކީ މިހާރު ރާއްޖޭގައި ފުޅާދާއިރާއެއްގައި ކުރިއަރަމުންއަންނަ ވިޔަފާރިއެކެވެ. ރާއްޖޭގައި 600 އަށްވުރެ ގިނަ ގެސްޓްހައުސް މިހާރު އަންނަނީ ހިންގަމުންނެވެ. އަދި މިއީ މިހާރު ރާއްޖޭގެ ފަތުރުވެރިކަމުގެ ސިނާއަތުގައި ނަފާބޮޑު ސިނާއަތެކެވެ.